جۋىردا باسەكەلەستىكتى قورعاۋ جانە دامىتۋ اگەنتتىگىنىڭ جانىنداعى كەدەرگىلەر جونىندەگى كەڭەستىڭ ءبىرىنشى وتىرىسىندا ەنەرگەتيكا مينيسترلىگىنىڭ كۆوتالاۋ نەگىزىندەگى سۇيىتىلعان مۇناي گازىن ءبولۋ جۇيەسى تالقىلاندى.
قاتىسۋشىلار سۇيىتىلعان مۇناي گازىنا گاز جەلىسى ۇيىمدارىنىڭ شەكتەۋلى شەڭبەرى تومەن باعالار بويىنشا قول جەتكىزەتىنىن, بۇل باسەكەلەستىكتى دامىتۋ قاعيداسىن بۇرمالايتىنىن جانە سۇيىتىلعان گاز ءوندىرىسىنىڭ ينۆەستيتسيالىق تارتىمدىلىعىن تومەندەتەتىنىن جەتكىزدى. ياعني باعانى مەملەكەتتىك رەتتەۋ جۇيەسىنەن تەك گاز جەلىسى ۇيىمدارى عانا ۇتادى.
– سۇيىتىلعان مۇناي گازىنىڭ ەلەكتروندى ساۋداسىن جەتىلدىرۋ اياسىندا جەرگىلىكتى نارىق شەڭبەرىندەگى ساۋدادان باسەكەلەستىكتى كەڭەيتۋگە جاردەمدەسەتىن نەعۇرلىم ءىرى وڭىرلىك نارىقتارعا كوشۋدى ۇسىنامىن. سونداي-اق اشىقتىقتى ارتتىرۋ ءۇشىن تىكەلەي وڭىرلەردە ەلەكتروندى ساۋدانى ۇيىمداستىرۋ جەكەلەگەن وبلىستار دەڭگەيىندە تاپشىلىقتىڭ تۋىنداۋى بويىنشا تاۋەكەلدەردى تومەندەتۋگە مۇمكىندىك بەرەدى. مونوپولياعا قارسى ورگاننىڭ اتىنا كەدەرگىلەر جونىندەگى كەڭەستىڭ ءوزىنىڭ مونوپولياعا قارسى جۇمساق ساياساتىن جەتىلدىرۋ تۇرعىسىنداعى ۇسىنىستارىنىڭ ءبىرى مونوپولياعا قارسى كومپلاەنس ينستيتۋتىن ەنگىزۋ بولۋى مۇمكىن, – دەدى «ەتس تاۋار بيرجاسى» اق نۇر-سۇلتان قالاسى بويىنشا فيليالىنىڭ ديرەكتورى نۇرجان بەگالين.
كەدەرگىلەر جونىندەگى كەڭەس سالانى رەتتەۋدىڭ قولدانىستاعى وڭ تەتىگىن جەتىلدىرۋ, نارىقتى ىرىقتاندىرۋعا, ونىڭ ىشىندە 2022 جىلعا دەيىن سۇيىتىلعان مۇناي گازى ساۋدا-ساتتىعىنا تولىق كوشۋ جانە گاز جەلىسى ۇيىمدارىن اككرەديتتەۋ ينستيتۋتىن جويۋ جونىندە ۇسىنىمدار ازىرلەدى. قازىر اگەنتتىكتىڭ وڭىرلىك بولىمشەلەرى باتىس قازاقستان, سولتۇستىك قازاقستان, پاۆلودار, قوستاناي, قاراعاندى وبلىستارىندا 10 گاز جەلىسى ۇيىمىنا قاتىستى تەكسەرۋ جۇرگىزىپ جاتىر. بۇدان باسقا, وڭىرلىك بولىمشەلەر كولەمدەردى ءبولۋ كەزىندە اكىمدىكتەردىڭ ءىس-ارەكەتتەرىنە شاعىمداردى جىل سايىن قارايدى.