الماتىنىڭ ءسانىن كەلتىرىپ تۇرعان مۇسىندىك تۋىندىلاردىڭ قاتارىندا «تۇيەلەر» پاننوسى دا بار. ۋاقىت وتە كەلە جادىگەرگە اينالعان مۇسىندىك تۋىندى اۆتورى پاۆەل شوروحوۆ جۋىردا قالا اكىمى باقىتجان ساعىنتاەۆتىڭ وتىنىشىنە قۇلاق اسىپ, ەسكىرىپ ءارى ۆاندالدار ابدەن سىزات سالعان كومپوزيتسيانى باستاپقى قالپىنا كەلتىرۋدى قولعا العان بولاتىن.
شاھار باسشىسى ءوزىنىڭ الەۋمەتتىك پاراقشاسىندا پاننونىڭ الماتىلىقتار ءۇشىن سۇيىكتى ساۋلەتتىك جادىگەرلەردىڭ ءبىرى ەكەندىگىن ەسكە سالا وتىرىپ: «تۇيەلەر» ساندىك بەدەرلى پاننوسىنىڭ اۆتورى ءارى ءمۇسىنشى پاۆەل شوروحوۆ كومپوزيتسيانى باستاپقى قالپىنا كەلتىرۋ تۋرالى ءوتىنىشىمدى قابىل الدى. 1982 جىلى جاسالعان پاننو «دوستىق» سكۆەرىندە تۇر. بۇگىندە ول الماتىلىقتاردىڭ سۇيىكتى ارحيتەكتۋرالىق بەينەلەرىنىڭ ءبىرى», – دەپ جازعان بولاتىن.
مەگاپوليس جەتەكشىسى الماتىنىڭ ۆيزيتتىك كارتوچكاسىنا اينالعان بىرقاتار مۇسىندىك تۋىندىلاردىڭ اۆتورى پاۆەل شوروحوۆ ەكەنىن ەسكە سالادى. بۇلار – ارباتتا تۇرعان «ويىنداعى بالالار», «فلامينگو», «لوتوس», سونداي-اق قازاق مەملەكەتتىك تسيركىنىڭ جانىنداعى «اكروباتكا», «پانتەرا», «سايقىمازاق» سىندى بىرەگەي تۋىندىلار. ءمۇسىنشىنىڭ باسقا دا جۇمىستارى قازاقستان, رەسەي, گەرمانيا, اۋستريا, يتاليا مۋزەيلەرىنە قويىلعان.
پاننونىڭ قاس بەتىن قالپىنا كەلتىرۋ جۇمىستارىمەن اينالىسىپ وتىرعان اۆتور: «كورىپ تۇرعاندارىڭىزداي, مىس قابىقتىڭ وڭ جانە سول جاق شەتتەرى ج ۇلىنىپ قالعان. كوپ زيان كەلتىرىلگەن. مىس قاباتىنىڭ شامامەن ۇشتەن ءبىر بولىگى زاقىمدالعان. مودەلدىڭ ءوزى تەمىربەتونمەن قۇراستىرىلعان», – دەگەن بولاتىن.
مۇسىندىك تۋىندىنىڭ اۆتورى پاننونى قالپىنا كەلتىرۋ قيىن ءارى ونى جوندەۋگە شامامەن ون كۇن قاجەت بولعانىن ايتادى.
الماتى