كەشە اقوردادا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ پرەزيدەنت قاسىم-جومارت توقاەۆتىڭ تاپسىرماسى بويىنشا مەملەكەتتىك ناگرادالاردى, ديپلومدار مەن توسبەلگىلەردى سالتاناتتى جاعدايدا تاپسىردى.
ءىس-شاراعا ءبىر توپ بەلگىلى مادەنيەت, عىلىم, ءبىلىم, دەنساۋلىق ساقتاۋ سالالارىنىڭ قايراتكەرلەرى, وندىرىستىك سالا وكىلدەرى قاتىسىپ, ولارعا قازاقستان رەسپۋبليكاسىنىڭ مەملەكەتتىك ناگرادالارى, سونداي-اق ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق, ديپلومدار مەن توسبەلگىلەر سالتاناتتى جاعدايدا تاپسىرىلدى.
تاۋەلسىزدىك كۇنى قارساڭىندا مەملەكەت باسشىسى قازاقستاننىڭ دامۋى مەن وركەندەۋىنە ەرەكشە ۇلەس قوسقان قازاقستاندىقتاردى مەملەكەتتىك ناگرادالارمەن جانە سىيلىقتارمەن ماراپاتتاۋى يگىلىكتى داستۇرگە اينالعان.
«مەملەكەتتىك ناگرادالار مەن سىيلىقتار – بۇل سىزدەردىڭ ەلىمىزدى الەمدەگى داۋلەتتى, پاراساتتى ءارى باسەكەگە قابىلەتتى مەملەكەتكە اينالدىرۋداعى جاسامپاز ەڭبەكتەرىڭىزگە, بىلىمدەرىڭىزگە, قاجىر-قايراتتارىڭىزعا جانە ايرىقشا قۇلشىنىستارىڭىزعا بەرىلگەن جوعارى باعا», دەدى قىرىمبەك كوشەرباەۆ.
مەملەكەتتىك حاتشى ماراپات يەلەرىن جوعارى مەملەكەتتىك ناگرادالارىمەن جانە سىيلىقتارىمەن قۇتتىقتاپ, جاڭا تابىستار مەن جەتىستىكتەر تىلەدى, دەپ حابارلادى Akorda.kz.