تاۋەلسىزدىك كۇنى قارساڭىندا ءماجىلىس توراعاسى نۇرلان نىعماتۋلين دەپۋتاتتارعا جانە اپپارات قىزمەتكەرلەرىنە پرەزيدەنت جارلىعىمەن بەرىلگەن مەملەكەتتىك ماراپاتتاردى تاپسىردى, دەپ حابارلادى ءماجىلىستىڭ ءباسپاسوز قىزمەتى.
نۇرلان نىعماتۋلين تاۋەلسىزدىك كۇنىنىڭ بارلىق قازاقستاندىقتار ءۇشىن ماڭىزدىلىعى, ەلىمىزدىڭ وسى جىلدارداعى جەتىستىكتەرى تۋرالى ايتا كەلىپ: «تۇڭعىش پرەزيدەنتىمىز, ەلباسى نۇرسۇلتان ءابىش ۇلى نازارباەۆتىڭ كەمەل ساياساتىنىڭ ارقاسىندا بۇكىل الەمگە جەدەل دامۋشى ەل رەتىندە تانىمال بولدىق. زامانعا ساي ءبىلىمدى, رۋحتى ۇرپاقتارىمىز ءوسىپ كەلەدى», دەدى.
سونداي-اق پالاتا سپيكەرى قازاقستانىمىز دۇنيە ءجۇزىنىڭ ساياساتكەرلەرى, وركەنيەتتى ەل باسشىلارى, الەمدىك قايراتكەرلەر باس قوساتىن سىيلى شاڭىراققا اينالعانىن, بۇگىنگى كۇنى مەملەكەت باسشىسى قاسىم-جومارت كەمەل ۇلى توقاەۆ وسى تولاعاي تابىستارىمىزدى ساقتاپ, ستراتەگيالىق دامۋ باعىتىن ودان ءارى جالعاستىرىپ جاتقانىنا نازار اۋداردى.
نۇرلان نىعماتۋلين دەپۋتاتتىق كورپۋستىڭ ەلىمىزدى ودان ءارى جاڭعىرتۋ بويىنشا ەلباسى مەن مەملەكەت باسشىسى قويعان بارلىق مىندەتتەردىڭ ورىندالۋىن زاڭنامالىق تۇرعىدان قامتاماسىز ەتۋ ءۇشىن قازىرگى كۇردەلى جاعدايدا جۇمىستىڭ جاڭا نىساندارى مەن مەحانيزمدەرىن ەنگىزگەنىن اتاپ ءوتتى.
مەملەكەتتىك جانە قوعامدىق قىزمەتى ءۇشىن, ەلىمىزدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى ىنتىماقتاستىق پەن دوستىقتى نىعايتۋعا قوسقان ەلەۋلى ۇلەسى ءۇشىن ءىىى دارەجەلى «بارىس» وردەنى ءماجىلىس دەپۋتاتى ومارحان وكسىكباەۆقا بەرىلسە, «پاراسات» وردەنى جەكسەنباي دۇيسەباەۆقا جانە دانيا ەسپاەۆاعا تابىس ەتىلدى. «قۇرمەت» وردەنىنە جامبىل احمەتبەكوۆ يە بولدى. ال «ەرەن ەڭبەگى ءۇشىن» مەملەكەتتىك مەدالى اپپارات قىزمەتكەرلەرى ناريمان العوجينگە, بوتاگوز بوتاباەۆاعا جانە كلارا ماۋتەنباەۆاعا بەرىلدى.
قازاقستان رەسپۋبليكاسىنىڭ قۇرمەت گراموتاسى اپپارات قىزمەتكەرلەرى ايتبەك ءالىپوۆ, ايگەرىم نۇرجانوۆا جانە تاتيانا سىزدىقوۆاعا تابىستالدى.
سونىمەن قاتار ءماجىلىس توراعاسى تمد پارلامەنتارالىق اسسامبلەياسىنىڭ «دوستىق» وردەنىن باس پروكۋروردىڭ ورىنباسارى مارات احمەتجانوۆقا, تمد پارلامەنتارالىق اسسامبلەياسىنىڭ «پارلامەنتارالىق ىنتىماقتاستىقتى نىعايتۋ ءۇشىن» مەدالىن ادىلەت ءمينيسترى مارات بەكەتاەۆقا جانە ءماجىلىس دەپۋتاتى سەرگەي زۆولسكيگە تابىستادى. تمد پارلامەنتارالىق اسسامبلەياسىنىڭ قۇرمەت گراموتالارىن ءابدىماناپ بەكتۇرعانوۆ پەن مۇحتار ەرمان الدى.
ءىس-شارا بارىسىندا پالاتا سپيكەرى نۇرلان نىعماتۋلين زاڭ جوبالارىمەن ءتيىمدى جۇمىس ىستەۋ جانە پارلامەنتارالىق بايلانىستاردى كەڭەيتۋ ءۇشىن مەملەكەتتىك ورگاندار وكىلدەرىنىڭ دەپۋتاتتىق كورپۋسپەن ءوزارا ءىس-قيمىلىنىڭ ماڭىزدىلىعىن اتاپ ءوتتى.