قازاقستاننىڭ تۇڭعىش پرەزيدەنتى نۇرسۇلتان نازارباەۆ Nur Otan پارتياسى Jas Otan جاستار قاناتىنىڭ V سەزىنە قاتىستى, دەپ حابارلادى ەلباسىنىڭ ءباسپاسوز قىزمەتى.
ەلباسى جاستار قاناتىنىڭ مۇشەلەرىن Jas Otan-نىڭ 20 جىلدىق مەرەيتويىمەن جانە كەلە جاتقان تاۋەلسىزدىك كۇنى مەرەكەسىمەن قۇتتىقتادى.
نۇرسۇلتان نازارباەۆ تاۋەلسىزدىك جىلدارى قول جەتكىزگەن نەگىزگى جەتىستىكتەرگە توقتالىپ, وسى جولدا ۇلكەن جۇمىس اتقارىلعانىن اتاپ ءوتتى.
– مەن بۇگىنگى تاڭدا كۇللى قازاقستاندىقتار ماقتان تۇتاتىن تابىستارىمىزعا جەتۋ قانشالىقتى قيىن بولعانىن جاقسى بىلەمىن. وسكەلەڭ ۇرپاق قولدا باردى قادىرلەۋگە, وتانىمىزدىڭ ءارى قاراي وركەندەۋىن ويلاستىرۋعا, ءوز ەلىن ماقتانىش ەتۋگە ءتيىس. جاستار مۇددەسى ءاردايىم مەنىڭ باستى نازارىمدا, – دەدى Nur Otan پارتياسىنىڭ توراعاسى.
قازاقستاننىڭ تۇڭعىش پرەزيدەنتى ەگەمەندىك جىلدارى ەلىمىزدە ناقتى ءارى ءتيىمدى الەۋمەتتىك ليفتتەر قۇرىلعانىن ايتتى.
– مەنىڭ باستاماممەن ەل ءۇشىن ەڭ كۇردەلى كەزەڭدە ىسكە قوسىلعان «بولاشاق» باعدارلاماسىمەن 15 مىڭعا جۋىق جاس قازاقستاندىق ءبىلىم الدى. بەس جىل بۇرىن نازارباەۆ ۋنيۆەرسيتەت ستۋدەنتتەرىنىڭ العاشقى لەگى تۇلەپ ۇشتى. وسى جىلداردىڭ ىشىندە وقۋ ورنىندا بەس مىڭعا جۋىق مامان دايارلاندى. مەملەكەت ىسكە قوسقان الەۋمەتتىك ليفتتەردىڭ ارقاسىندا مىڭداعان جاس قازاقستاندىق تابىسقا جەتتى, – دەدى نۇرسۇلتان نازارباەۆ.
Nur Otan پارتياسىنىڭ توراعاسى جاستار قاناتىنىڭ مۇشەلەرىنە پاندەميا كەزىندەگى قايىرىمدىلىق شارالارىنا جانە ۆولونتەرلىك قىزمەتكە بەلسەنە اتسالىسقانى ءۇشىن زور ريزاشىلىعىن ءبىلدىردى.
قازاقستاننىڭ تۇڭعىش پرەزيدەنتى جاستار بەلسەندىلىگى ءاردايىم ساياسي پروگرەستىڭ قوزعاۋشى كۇشتەرىنىڭ ءبىرى بولعانىنا نازار اۋداردى.
– قازىرگى كەزدە جىگەرلى ءارى باستاماشىل بولۋدىڭ ماڭىزى ەرەكشە. ويتكەنى ءبىز تەز وزگەرىپ جاتقان الەمدە ءومىر ءسۇرىپ وتىرمىز. كوپشىلىككە تانىس ءومىر سالتى ارتتا قالعانى ءسوزسىز. تەحنولوگيالار مۇمكىندىكتەرىمىزدىڭ الەۋەتىن ايتارلىقتاي ارتتىرۋدا, – دەدى نۇرسۇلتان نازارباەۆ.
ەلباسى ەلدى دامىتۋ جانە قازاقستاننىڭ تاۋەلسىزدىگىن نىعايتۋ ىسىنە جاستاردىڭ بەلسەنە اتسالىسۋىنىڭ ماڭىزىن اتاپ ءوتتى.
– ەل ەرتەڭى مەن ۇلت تاعدىرى جاستارعا تىكەلەي بايلانىستى. قازىرگى ۇرپاق زامان تالابىنا ساي دامىپ وتىرۋى كەرەك. بۇگىن ايتىلعانداردىڭ ءبارىن مەنىڭ وسيەتىم دەپ تۇسىنىڭدەر, – دەدى قازاقستاننىڭ تۇڭعىش پرەزيدەنتى.