پرەمەر-ءمينيستردىڭ ورىنباسارى ەرالى توعجانوۆ الماتىعا ساپارى اياسىندا مەديتسينا, شىعارماشىلىق قاۋىم وكىلدەرىمەن كەزدەسىپ, تۋريستىك ماقساتتاعى بىرقاتار نىساندى ارالادى. مەملەكەت باسشىسىنىڭ ىشكى ەكولوگيالىق تۋريزم مادەنيەتىن بەلسەندى دامىتۋ جونىندەگى تاپسىرمالارىنىڭ ۇدەسىمەن تانىستى.
ۆيتسە-پرەمەر باستاعان دەلەگاتسيا «مەدەۋ» بازالىق ستانساسى مەن «شىمبۇلاق» تشك ەڭ جوعارى نۇكتەسىندەگى ۆيزيت-ورتالىقتاردى, Tenir Eco Hotel گلەمپينگتىك قۇرىلىس الاڭىنداعى جۇمىستاردى كوردى.
الماتى قالالىق تۋريزم باسقارماسىنىڭ باسشىسى سابينا امانكەلدى بيىل ينۆەستورلاردىڭ قاراجاتىنا جوعارىدا اتالعان 2 ۆيزيت-ورتالىق سالىنىپ, Tenir Eco Hotel گلەمپينگتىك ايماعىنىڭ قۇرىلىسى اياقتالعانىن مالىمدەدى. ءۇش جوباعا تارتىلاتىن جەكە ينۆەستيتسيالاردىڭ جالپى سوماسى شامامەن 1 ملرد تەڭگەنى قۇرايدى. بۇگىندە «شىمبۇلاق» تاۋ شاڭعىسى كۋرورتىنىڭ ەڭ بيىك 3200 مەترلىك نۇكتەسىندە ىسكە قوسىلعان ۆيزيت-ورتالىقتا كۋرورت تۋرالى اقپاراتتار, كادەسىيلار مەن «شىمبۇلاق» لەيبلى بار فيرمالىق كيىمدەردى, جابدىقتاردى جالعا الۋعا, تاۋ شاڭعىسى مەن سنوۋبوردتا سىرعاناۋدى وقىتاتىن نۇسقاۋشىنىڭ قىزمەتىن جانە تاۋعا جاياۋ جورىق, قاردا ءجۇرۋ, پاراپلانمەن ۇشۋ قىزمەتتەرىن ساتىپ الۋعا بولادى.
جەلتوقسان ايىندا «مەدەۋ» بازالىق ستانساسىندا «دەنساۋلىق سوقپاعىنا» شاقىراتىن جانە تۋريستەرگە ەكوتۋريزم بويىنشا اقىسىز ءبىلىم بەرەتىن ۆيزيت-ورتالىق ىسكە قوسىلدى. بيىل جىل سوڭىندا پايدالانۋعا بەرىلەتىن Tenir Eco Hotel گلەمپينگتىك ايماعىنان ىلە الاتاۋى شىڭدارىنىڭ عاجايىپ كورىنىسى اشىلادى. جوبا ينۆەستورى ۆلاديمير سارىبەكوۆ ەكو-ۇيلەر تولىعىمەن قازاقستاندىق زاۋىتتاردا جينالعانىن, رەتسيركۋلياتسيالىق تازارتۋ جۇيەسىمەن جابدىقتالعانىن, بۇل ەكولوگيانى ساقتاۋ ءۇشىن ماڭىزدى ەكەنىن اتاپ ءوتتى. كەشەننىڭ ءوزى حالىقارالىق ستاندارتتارعا سايكەس جانە 30 توسەكتىك ورىندىق 10 ەكو ۇيدەن تۇرادى.
قازىرگى تاڭدا كۋرورتتا قازاقستانداعى ەڭ ءىرى تاۋ شاڭعىسى مەكتەبى – «شىمبۇلاق» تاۋ شاڭعىسى جانە سنوۋبورد مەكتەبى جۇمىس ىستەيدى. جىل سايىن مەكتەپتە تاۋ شاڭعىسى مەن سنوۋبوردتان 10 مىڭنان استام ساباق وتەدى, ال وقۋشىلار سانى 15 مىڭ ادامنان اسادى.
تۋريستىك نىسانداردى ارالاپ شىققان پرەمەر-ءمينيستردىڭ ورىنباسارى قوناقۇيلەر, تاۋ شاڭعىسى كەشەنى, مەيرامحانا, ءدامحانا, حوستەلدەر جانە ءارتۇرلى باعىتتاعى دەمالىس ورتالىقتارى بار كۋرورتتىڭ بارلىق ماۋسىمدا دا قىزمەت ەتەتىنىن ەسكەرە وتىرىپ, ەمدىك-ساۋىقتىرۋ ءتۋريزمىن دامىتۋعا دا ەرەكشە نازار اۋدارىلۋى قاجەتتىگىن جەتكىزدى. اسىرەسە پاندەميا جاعدايىندا قالا تۇرعىندارى مەن قوناقتارى دەنساۋلىقتارىن نىعايتۋى ءۇشىن تاۋعا بارۋعا بارلىق جاعداي جاسالۋى قاجەت.
الماتىدا تۋريستىك ينفراقۇرىلىمدى دامىتۋ شەڭبەرىندە 3 جىلدا 1 مىڭ شاقىرىمعا جۋىق تاۋداعى جاياۋ مارشرۋتتار تسيفرلانىپ, جالپى ۇزىندىعى 325 شاقىرىم بولاتىن 25 تاۋ مارشرۋتى اباتتاندىرىلعان. بيىل كىشى جانە ۇلكەن الماتى شاتقالدارىندا جالپى ۇزىندىعى 171 شاقىرىمدىق 11 تاۋ مارشرۋتى جونگە كەلتىرىلدى. بۇل باعىتتاردا اقپاراتتىق تاقتالار, ستەندتەر, باعىتتامالار, ساكىلەر, وتىرۋ ورىندارى ورنالاستىرىلعان. وسىلايشا, قالا تۇرعىندارى مەن قوناقتارى تاۋلى جەرلەردە سەرۋەندەگەندە جولدان اداسپاي دەمالىسىن ۇيىمداستىرا الادى. سونىمەن قاتار قالادا تۋريستەرگە اقپارات بەرەتىن 8 ورىن جۇمىس ىستەيدى
«حالىقارالىق تاجىريبەگە سايكەس ۆيزيت ورتالىقتارى – تۋريستەردى بەلگىلى ءبىر جەردى تانىستىراتىن ءبىرىنشى نۇكتە. مۇندا كەلۋشىلەر العاشقى ساتتەن باستاپ وزدەرىنە عانا ەمەس, قورشاعان ورتاعا دا قامقورلىق جاساۋ كەرەگىن تۇسىنەدى. ءدال وسى تۇجىرىمدامانى باسشىلىققا الا وتىرىپ, ءبىز شىمبۇلاق تاۋلى كۋرورتىندا دا وسىعان ۇقساس ءتاسىل قولدانۋدى ۇسىندىق», دەدى Kazakh Tourism ۇك باسقارما توراعاسىنىڭ ورىنباسارى ق.سادۋاقاسوۆ.
«قازىرگى زاماناۋي وزگەرىستەر تۋريستەردى ەكولوگيالىق باعدارلانعان دەمالىس فورماتىنا كوبىرەك تارتىپ جاتىر. ەگەر مۇنداي ويىن-ساۋىقتى ادەتتەگى جايلى تۇرۋ ادىسىمەن ۇيلەستىرۋ مۇمكىن بولسا, وندا ساياحاتشىلاردىڭ كوپشىلىگىنە ساپار شەگەتىن باعىتتاردى تاڭداۋعا گلاممينگتەر شەشۋشى ءرول اتقارادى. ەكولوگيالىق تەحنولوگيالاردى قولدانۋدى ەسكەرە وتىرىپ, مۇنداي جوبالار بارلىعىنىڭ كوڭىلىنەن شىعۋى كەرەك», دەيدى ينۆەستور ۆ.سارىبەكوۆ.
جۇمىس توبى سونىمەن قاتار 2021-2022 جىلدارى الماتى وبلىسىنىڭ تۋريستىك قىزىعۋشىلىعى بار جەرلەردە جۇزەگە اسىرىلاتىن S.N.E.G قوناقۇي جەلىسىنىڭ جوباسىمەن تانىستى. ينۆەستور قۇرىلىستىڭ ءبىرىنشى كەزەڭى ءۇش ءتۇرلى جەردە باستالاتىنىن حابارلادى.
سونىمەن قاتار ە.توعجانوۆ شاڭعى جانە سنوۋبورد مەكتەبىنىڭ بالالارىمەن جانە نۇسقاۋشىلارىمەن اڭگىمەلەستى. بىلتىر تاۋ كۋرورتى كەشەنىندە قالالىق اكىمدىكتىڭ قولداۋىمەن 1200-دەن استام بالا اقىسىز جاتتىققان. وسى ارادا ۇزاق وتباسىلىق دەمالىستارعا قىزىعۋشىلىق ارتىپ كەلە جاتقانىن اتاپ وتكەن ءجون. الەمدىك نارىقتاعى باسقا دا تاۋ شاڭعىسى كۋرورتتارىمەن, قوناقۇيلەرمەن جانە تۋروپەراتورلارمەن جۇيەلى جۇمىس جۇرگىزىلۋدە.
«قازىر وزگە ەلدەرمەن شەكارالار جابىق بولعاندىقتان, ىشكى ءتۋريزمدى دامىتاتىن كەز كەلدى. تۋريزم نارىعىنداعى ازاماتتار بىرىگۋگە كىرىستى, بۇل تۋريستىك ءونىم قولجەتىمدى بولا باستادى دەگەندى بىلدىرەدى», دەدى «شىمبۇلاق» دەمالىس ورنىنىڭ باس ديرەكتورى رينات ءابدىراحمانوۆ.
الماتى