نۇر-سۇلتاندا بالا سانى تىم كوپ مەكتەپتەر سانى 2 ەسە ازايدى. مەكتەپتەر جۇكتەمەسىن ودان ءارى ازايتۋ ءۇشىن ەلوردادا جىل سايىن كەم دەگەندە 10 ءبىلىم بەرۋ مەكەمەسىن سالۋ قاجەت. بۇل تۋرالى وكق-دە وتكەن بريفينگتە ەلوردا اكىمى التاي كولگىنوۆ مالىمدەدى.
«قالادا حالىق سانىنىڭ ءوسۋىن ەسكەرە وتىرىپ, الەۋمەتتىك نىساندارعا, ونىڭ ىشىندە ءبىلىم بەرۋ مەكەمەلەرىنە جۇكتەمە ارتىپ كەلەدى. ەگەر 2019 جىلى 6 مەكتەپ سالىنىپ, پايدالانۋعا بەرىلگەن بولسا, بيىل ەكى ەسە كوپ, ياعني, 12 مەكتەپ. ولاردىڭ كەيبىرەۋلەرى پايدالانۋعا بەرىلگەن. مەكتەپتەر سالعان كەزدە ءبىز شاعىن ولشەمدەردەن ۇلكەن ولشەمدەرگە اۋىسامىز. سونداي-اق ءبىز قازىردىڭ وزىندە الداعى جىلدارى پايدالانۋعا بەرىلەتىن مەكتەپتەر سالىنۋدا. 2021 جىلى ءبىز كەم دەگەندە 12 مەكتەپتىڭ قۇرىلىسىن اياقتاپ, پايدالانۋعا بەرۋدى جوسپارلاپ وتىرمىز.
ەگەر قالانىڭ وزىندە ءبىلىم بەرۋ مەكەمەلەرىنىڭ جۇكتەمەسىندە پروبلەما تۋىنداسا - بيىل ءبىز ءۇش اۋىسىمدا وقيتىن مەكتەپتەردىڭ سانىن 8-دەن 4-كە, ال شەكتەن تىس جۇكتەمەسى بار مەكتەپتەردى 22-دەن 14-كە دەيىن ازايتتىق. مىسالى, ميچۋرينو ەلدى مەكەنىندە مەكتەپ وقۋشىلارى مەن مۇعالىمدەرى مەكەمەنىڭ شاعىن كولەمىن ەسكەرە وتىرىپ, مەكتەپكە بەيىمدەلگەن نىساندا جۇمىس ىستەدى - ساباقتار ءۇش اۋىسىمدا وتەتىن. 1 جەلتوقساندا ءبىز جاڭا مەكتەپ اشتىق - وقۋشىلار كەڭ, جايلى ءۇش قاباتتى عيماراتتا ءبىلىم الۋدا. ءبىز مۇعالىمدەرگە تۇرمىستىق جاعداي جاساۋ ءۇشىن بۇرىنعى ءۇي-جايلاردى جاتاقحاناعا قايتا جابدىقتاۋدى, بالالارعا ارنالعان ۇيىرمەلەر اشۋدى جوسپارلاپ وتىرمىز», - دەدى ەلوردا اكىمى التاي كولگىنوۆ.
5 جىلدىق كەزەڭگە ارنالعان كەشەندى جوسپار اياسىندا 50-گە جۋىق مەملەكەتتىك مەكتەپ سالۋ جوسپارلانعان. سونداي-اق نۇر-سۇلتان اكىمى ءبىلىم بەرۋ مەكەمەلەرىنىڭ قۇرىلىسىنا جەكە ينۆەستيتسيالار تارتىلاتىندىعىن, «تەك بيۋدجەتكە سەنۋدىڭ قاجەتى جوق, ازاماتتار مەن قالاعا قاجەتتى جوبالاردى سالۋدا جەكە قاراجاتتى بەلسەندى تۇردە تارتامىز» دەپ باسا ايتتى.