الماتى وبلىسىنىڭ پوليتسەيلەرى بىرقاتار ۇرلىق دەرەكتەرىنە قاتىسى بار قىلمىستىق توپ وكىلدەرىن قۇرىقتادى, – دەپ حابارلايدى Polisia.kz.
اعىمداعى جىلدىڭ قازان جانە قاراشا ايلارىندا جەكە ۇيلەردەن وزگەنىڭ مۇلكىن قولدى قىلۋدىڭ 12 دەرەگى تىركەلگەن بولاتىن. ونىڭ التى دەرەگى تالدىقورعان قالاسىندا, بەسەۋى سارقان جانە بىرەۋى كوكسۋ اۋداندارىندا جاسالدى. اتالعان دەرەكتەر بويىنشا قر قىلمىستىق كودەكسىنىڭ 188-بابى 2, 3-بولىكتەرى بويىنشا سوتقا دەيىنگى تەرگەۋ امالدارى جۇرگىزىلدى.
– سەريالى ۇرلىق تىزبەسىنە قاتىسى بار كۇدىكتىلەردى انىقتاۋ ءۇشىن بىلىكتى پوليتسەيلەر قاتارىنان ىزدەۋ توبى قۇرىلدى. كاسىبي ءىز كەسۋشىلەر ۇرلىقتاردى جاساۋعا قاتىسى بار قىلمىستىق توپتىڭ جىمىسقى ارەكەتىن اشكەرەلەدى. توپ تالدىقورعان قالاسىنىڭ 22-29 جاستاعى تۇرعىندارى, بەس ادامنان قۇرالعانى انىقتالدى. بۇلتارتپاس ايعاقتاردان كەيىن كۇدىكتىلەر ءوز قىلمىستارىن مويىندادى. ولاردىڭ وسىعان ۇقساس اشىلماعان وزگە دە قىلمىستارعا قاتىسى بارى تەكسەرىلۋدە. قىلمىستىق ءىس بويىنشا باسقا دەرەكتەر قر قپك-ءنىڭ 201-بابىنا سايكەس جاريا ەتۋگە جاتپايدى, – دەدى تالدىقورعان قپب باستىعى اسقار نۇرساپا.
پوليتسيا تاراتقان اقپاراتقا سايكەس, تەرگەۋ بارىسىندا قىلمىستىق توپ وكىلدەرىنەن ولار قولدى قىلعان تۇرمىستىق تەحنيكا, قىمبات كيىمدەر, باعالى زاتتار مەن وزگە دە ۇرلانعان م ۇلىكتەر تاركىلەنگەن. ۇرلانعان زاتتاردىڭ ءبىر بولىگى تەرگەۋ ارەكەتتەرى كەزىندە ساتىپ الۋشىلاردان الىندى.
تەرگەۋ بارىسىندا ۇستالعانداردىڭ ۇشەۋىنىڭ بۇعان دەيىن دە بىرەۋدىڭ مۇلكىن ۇرلاعانى جانە الاياقتىق جاساعانى ءۇشىن قىلمىستىق جاۋاپكەرشىلىككە تارتىلعانى بەلگىلى بولدى. قازىرگى ۋاقىتتا ءتورت كۇدىكتى ۋاقىتشا ۇستاۋ يزولياتورىنا قاماققا الىندى, بىرەۋى مەكەنجايىن وزگەرتپەۋ تۋرالى مىندەتتەمەمەن بوساتىلدى.