قر پرەمەر-ءمينيسترى اسقار مامين ەۋرازيالىق ۇكىمەتارالىق كەڭەستىڭ (ەۇاك) وتىرىسىنا بەينەكونفەرەنتسيا بايلانىسى رەجيمىندە قاتىستى.
ۇكىمەت باسشىسى ەۋرازيالىق ەكونوميكالىق وداقتا جانە ودان تىس جەرلەردە ساۋدانىڭ كولەمى مەن تۇراقتىلىعىن ارتتىرۋ قاجەتتىگىن اتاپ ءوتتى, بۇل ەاەو-نىڭ ەركىن ساۋدا ايماعى تۋرالى كەلىسىمدەرى بار ەلدەردىڭ ءتىزىمىن كەڭەيتۋدى تالاپ ەتەدى. پرەمەر-مينيستر ەاەو اياسىنداعى ينۆەستيتسيالىق قىزمەتتىڭ ىشكى الەۋەتىن ارتتىرۋ جونىندەگى جۇمىستى كۇشەيتۋدىڭ ماڭىزدىلىعىن اتاپ ءوتتى.
«بۇل پروتسەستە نەگىزگى ماقساتى ەاەو-عا مۇشە مەملەكەتتەردىڭ ەكونوميكالىق وسۋىنە ىقپالداسۋ جانە ينۆەستيتسيالىق قىزمەتتى جۇزەگە اسىرۋ ارقىلى ساۋدا-ەكونوميكالىق بايلانىستاردى كەڭەيتۋ بولعان ەۋرازيالىق دامۋ بانكى ءبىرىنشى كەزەكتەگى ءرولدى اتقارۋى ءتيىس», — دەدى ا. مامين.
ۇكىمەت باسشىسى ەاەو-دا قابىلداناتىن بارلىق شەشىمدەردىڭ بيزنەستى دامىتۋعا, ەاەو ەلدەرى بيۋدجەتتەرىنىڭ شىعىستارىنا جانە جالپى العاندا ەكونوميكالىق كورسەتكىشتەردى جاقسارتۋعا اسەرىن مىندەتتى ساندىق جانە ساپالىق باعالاۋدى ەنگىزۋدى ۇسىندى. وتىرىسقا قاتىسۋشىلار ەۋرازيالىق ەكونوميكالىق ينتەگراتسيانى دامىتۋدىڭ 2025 جىلعا دەيىنگى ستراتەگيالىق باعىتتارىن, مەملەكەتتىك (مۋنيتسيپالدىق) ساتىپ الۋ ماقساتتارى ءۇشىن تاۋارلاردىڭ جەكەلەگەن تۇرلەرىنىڭ شىعارىلعان ەلىن ايقىنداۋ قاعيدالارىن, ەاەو ىشكى نارىعىندا 2021-2022 جىلدارى جويىلۋى ءتيىس الىپ تاستاۋ جانە شەكتەۋلەر تىزبەسىن, بىرىڭعاي كەدەندىك-تاريفتىك رەتتەۋ ماسەلەسىن, سونداي-اق ەاەو اياسىندا قۇرىلىس سالاسىندا كورسەتىلەتىن قىزمەتتەردىڭ بىرىڭعاي نارىعىنىڭ جۇمىس ىستەۋىن قامتاماسىز ەتۋ جونىندەگى ءىس-شارالار جوسپارىن قارادى.