ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ ءبىلىم الۋشىلارى «The London Post»گازەتىنىڭ باس رەداكتورى, BBC تەلەارناسىنىڭ اعا ساراپشىسى دوكتور شاھيد كۋرەشيمەن ونلاين كەزدەستى, - دەپ حابارلايدى Egemen.kz
دوكتور شاھيد كۋرەشي فەيك اقپاراتتىڭ تارالۋ جولدارىنان باستاپ, ونىڭ الەمدىك ساياسي وقيعالارعا, ەكونوميكالىق احۋالعا تيگىزەتىن سالدارىنا توقتالدى. ونلاين كەزدەسۋدى ۇيىمداستىرۋشى «بولاشاق» باعدارلاماسىنىڭ تۇلەگى, ءباسپاسوز جانە باسپا ءىسى كافەدراسىنىڭ اعا وقىتۋشىسى عالىمجان قارامان ۇلى فەيك جاڭالىقتى انىقتاۋ ادىستەرى, جۋرناليست جاۋاپكەرشىلىگىنە بايلانىستى ساۋالدار قويىپ, تۇشىمدى جاۋاپ الدى. ماگيسترانتتار مەن دوكتورانتتار الەمدىك ساياسي وقيعالار مەن ايماقتىق قاقتىعىستارعا قاتىستى جۋرناليست-ساراپشىنىڭ پىكىرىن تىڭدادى.
ساراپشىنىڭ ايتۋىنشا قازىرگى تاڭدا ۇيالى تەلەفون ارقىلى تارايتىن اقپاراتتى باقىلاۋ مۇمكىن ەمەس. سوعان قاراماستان ءاربىر ازامات اقپاراتتى سۇزگىدەن وتكىزىپ بارىپ سىڭىرۋگە داعدىلانعانى جاقسى. ول ءۇشىن كۇندەلىكتى اقپارات وقۋعا ۇيرەنۋى كەرەك. ۋاقىت وتە كەلە فەيك اقپاراتتى انىقتاي الاتىن بولادى.
جۋرناليستيكا ماگيسترانتتارى تاراپىنان قويىلعان ساۋالداردىڭ ماڭىزىنا توقتالعان شاھيد كۋرەشي اقپاراتتىق قىزمەتتەگى كاسىبي جاۋاپكەرشىلىككە ەرەكشە توقتالدى. اتاپ ايتار بولساق, سۇراق قويا ءبىلۋ ونەرىن مەڭگەرۋ, ساياسي وقيعاعا قاتىستى پىكىردى ناقتىلاپ بارىپ جاريا ەتۋ, فەيك اقپاراتتى انىقتاۋ يممۋنيتەتىن قالىپتاستىرۋ, دىنگە قاتىستى كوزقاراسقا وتە ساق بولۋ, سەنىمسىز اقپاراتتى تاراتپاۋ نەمەسە تاراتىپ قويعان جاعدايدا قاتەڭدى مويىنداۋ سەكىلدى ماسەلەلەرگە بايلانىستى جاستارعا كەڭەس بەردى.
كەزدەسۋ بارىسىندا بي-بي-سي مeدياكورپوراتسياسىنىڭ اقپاراتتىق قىزمەتى جايلى كوپتەگەن قىزىقتى مالىمەتتەر ايتىلدى. ايتا كەتەيىك, ونلاين كەزدەسۋ اعىلشىن تىلىندە ءوتتى. ماگيسترانتتار مەن دوكتورانتتار اقپارات ساراپشىسى, باس رەداكتور شاھيد كۋرەشيمەن ەركىن پىكىر الماستى. قازىرگى تاڭدا حالىقارالىق جۋرناليستيكا ءبىلىم بەرۋ باعدارلاماسى بويىنشا ماگيسترانتتار اعىلشىن تىلىندە ءبىلىم الۋدا. بۇل – بولاشاق مامان دايارلاۋداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ بۇگىنگى قول جەتكىزگەن جوعارى ناتيجەسى.