جوبا ەگەمەندىكتىڭ العاشقى جىلدارىندا قازاقستان ەڭسەرگەن جەتى نەگىزگى سىن-تەگەۋرىندەرگە نەگىزدەلگەن. سولاردىڭ بىرقاتارى – نارىقتىق ەكونوميكانىڭ قالىپتاسۋى, مەملەكەتتىك شەكارانى بەلگىلەۋ جانە حالىقارالىق ينتەگراتسيالىق پروتسەستەر, ۇلتارالىق كەلىسىم, يادرولىق سىناقتارعا قارسى باستامالار, جاڭا استانانىڭ قۇرىلىسى, ترانزيتتىك الەۋەتتى ىسكە اسىرۋ جانە ارال تەڭىزىندەگى ەكولوگيالىق ماسەلەلەر مەن دەموگرافيالىق پروبلەمالار.
جاس مەملەكەتىمىز بۇل كۇردەلى ماسەلەلەردى تۇڭعىش پرەزيدەنت باستاماسىمەن جۇرگىزىلگەن رەفورمالار ارقىلى ەڭسەرىپ, باستى جەتىستىكتەرىنە اينالدىردى جانە ەلىمىزدىڭ دامۋ جولىنىڭ بىرەگەيلىگىن ايقىندادى. ماسەلەن, يادرولىق قارۋدان باس تارتۋ قازاقستانعا الەمدىك ارەناداعى ورنىن نىعايتۋعا, شەتەلدىك ينۆەستيتسيالاردى تارتۋدا ورتالىق ازيا كوشباسشىسىنا اينالۋعا مۇمكىندىك بەردى. ەلىمىزدەگى ىشكى ساياسي تۇراقتىلىق جانە ەتنوسارالىق بىرلىك پەن كەلىسىمنىڭ بىرەگەي مودەلى كوپتەگەن ەلدەرگە ۇلگى بولىپ قالىپتاستى.
فيلمدەردىڭ مازمۇنى مەملەكەت, قوعام قايراتكەرلەرىنىڭ, تاريحشىلاردىڭ, ساياساتتانۋشىلاردىڭ, ەكونوميستەردىڭ ەستەلىكتەرى مەن پىكىرلەرىنە نەگىزدەلگەن.
وسى فيلمدەر ءبىلىم بەرۋ ۇيىمدارىنداعى سىنىپ ساعاتتارىندا, اشىق ساباقتاردا, پىكىرتالاستار مەن كۋراتورلىق ساباقتاردا كورسەتىلىپ جاتىر. شاراعا 2,8 ملن استام مەكتەپ وقۋشىلارىن جانە جوعارى وقۋ ورىندارى مەن كوللەدجدەردىڭ 700 مىڭنان استام ستۋدەنتىن قامتۋ جوسپارلانۋدا. سونداي-اق ءىس-شارالار ونلاين فورماتتا وتكىزىلەدى.
جەتى فيلمنەن تۇراتىن جوبانى «استانا» تەلەارناسى ءتۇسىرىپ, بۇعان دەيىن ەلوردا كۇنىنە وراي ەفيردە كورسەتكەن بولاتىن.