بۇگىن قازاقستان رەسپۋبليكاسىنىڭ مادەنيەت جانە سپورت ءمينيسترى, قازاقستانداعى يۋنەسكو مەن يسەسكو ىستەرى بويىنشا ۇلتتىق كوميسسيانىڭ توراعاسى اقتوتى رايىمقۇلوۆانىڭ جەتەكشىلىگىمەن كوميسسيانىڭ ونلاين فورماتتا وتىرىسى ءوتتى, دەپ حابارلايدى Egemen.kz.
جيىنعا قر سىرتقى ىستەر ءمينيسترىنىڭ ورىنباسارى, ۇلتتىق كوميسسيا توراعاسىنىڭ ورىنباسارى ەرجان اشىقباەۆ, يۋنەسكو-نىڭ الماتىداعى كلاستەر بيۋروسىنىڭ ديرەكتورى كريستا پيككات, "مادەنيەتتەردى جاقىنداستىرۋ ورتالىعى" مەملەكەتتىك مۇراجايىنىڭ ديرەكتورى ولجاس سۇلەيمەنوۆ, كوميسسيانىڭ باس حاتشىسى انار دۇتباەۆا جانە وزگە مۇشەلەرى قاتىستى.
مينيسترلىك باسشىسى جيىنعا قاتىسۋشىلاردى قۇتتىقتاپ, يۋنەسكو-نىڭ ورتاق زياتكەرلىك مۇرانى قورعاۋ جانە ىلگەرىلەتۋ جونىندەگى مۇشە مەملەكەتتەردىڭ حالىقارالىق ۇيلەستىرۋىندەگى ءرولىنىڭ جوعارى ەكەنىن اتاپ ءوتتى.
«قازاقستان ۇكىمەتى يۋنەسكو حاتشىلىعىنىڭ قازاقستاننىڭ باستاماسىمەن جاريالانعان 2013-2022 جىلدارداعى مادەنيەتتەردى جاقىنداستىرۋدىڭ حالىقارالىق ونجىلدىعى باعدارلاماسىن قولداۋداعى كۇش - جىگەرىن جوعارى باعالايدى», - دەدى اقتوتى رايىمقۇلوۆا.
جيىندا ءسوز العان قر سىرتقى ىستەر ءمينيسترىنىڭ ورىنباسارى, ۇلتتىق كوميسسيا توراعاسىنىڭ ورىنباسارى ەرجان اشىقباەۆ جوسپارلانعان ءىس شارالار بارىسى تۋرالى باياندادى.
"پاندەمياعا بايلانىستى بيىل كوپتەگەن ءىس-شارا كەيىنگە قالدى نەمەسە ونلاين فورماتقا اۋىستى. مəسەلەن, يۋنەسكو-نىڭ اتقارۋشى ديرەكتورى ودري ازۋلەنىڭ قازاقستانعا رەسمي ساپارى كەيىنگە شەگەرىلدى. ودري ازۋلە كەلگەندە قازاقستان مەن يۋنەسكو اراسىنداعى 2020-2023 جىلدارعا ارنالعان əرىپتەستىك اياسىندا قول قويىپ, بەكىتەمىز دەپ وتىرعان مەموراندۋم, باعدارلاما, جوبالاردى ءبəرىن قايتا قاراپ, قازىرگى جاعدايعا قاراي تالداۋ جاساپ تۇزەتۋلەر ەنگىزۋ كەرەك. وسى ورايدا ءبىلىم بەرۋ, عىلىم, مəدەنيەت, اقپارات پەن كوممۋنيكاتسيا سالاسىنداعى وزەكتى ماقساتتاردى ەسكەرە وتىرىپ, ۇلتتىق كوميسسيا حاتشىلىعى ستراتەگيالىق ماڭىزى بار قۇجاتتار بويىنشا قوسىمشا كەلىسسوزدەر جۇرگىزۋى كەرەك دەپ ەسەپتەيمىن.
بۇل قۇجاتتار ەلىمىزدىڭ تۇراقتى دامۋى ءۇشىن بارلىق باعىتتاعى قىزىعۋشىلىعىن ەسكەرۋى ءتيىس. يۋنەسكو قامتيتىن ءتورت سالا بويىنشا جوبالاردى ەلىمىزدە مۇقيات, تياناقتى ىسكە اسىرۋىمىز كەرەك",دەدى ە.اشىقباەۆ.
سونىمەن قاتار قاتىسۋشىلار يۋنەسكو مەن يسەسكو ىستەرى بويىنشا ۇلتتىق كوميسسيا قىزمەتىنىڭ وزەكتى سۇراقتارىن تالقىلادى. وسى ورايدا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا قازاقستان اۋماعىنداعى يۋنەسكو تىزىمىنە كىرەتىن ەسكەرتكىشتەردى قورعاۋدى قامتاماسىز ەتۋ, «ارحەولوگيالىق ساراپتاما» جشس-نىڭ ديرەكتورى دميتري ۆوياكين يۋنەسكو-نىڭ دۇنيەجۇزىلىك مۇرا قۇرامىنداعى نىساندارى جايلى ەسەپ, كوميسسيانىڭ باس حاتشىسى انار دۇتباەۆا يۋنەسكو-نىڭ 2023-2027 جىلدارعا ارنالعان دۇنيەجۇزىلىك مۇرا جونىندەگى مەملەكەتارالىق كوميتەتىنە قازاقستان كانديداتۋراسىن ۇسىنۋ, شىمكەنت قالاسى اكىمىنىڭ ورىنباسارى نۇرسادىق ەرگەشبەك شىمكەنت قالاسىنىڭ 2200 جىلدىعى جايلى بويىنشا ءسوز سويلەدى.
سونىمەن قاتار يۋنەسكو-نىڭ قازاقستان-گەرمانيا ۋنيۆەرسيتەتى جانىنداعى سۋ رەسۋرسى كافەدراسىنىڭ قىزمەتى جايلى اتالعان كافەدرا جەتەكشىسى باربارا يانۋش پاۆلەتتا, قازاقستاننىڭ ۇلتتىق يۋنەسكو كلۋبتارى فەدەراتسياسىنىڭ پرەزيدەنتى بولات اقشولاقوۆ فەدەراتسيا قىزمەتى, «ادام جانە بيوسفەرا» كوميتەتىنىڭ قىزمەتى جايلى كوميتەت توراعاسى رومان ياششەنكو تارقاتىپ ايتىپ بەردى.
وسىدان كەيىن قازاقستانداعى يۋنەسكو مەن يسەسكو ىستەرى بويىنشا ۇلتتىق كوميسسيانىڭ باس حاتشىسى انار دۇتباەۆا كەلەر جىلعا ارنالعان جۇمىس جوسپارىمەن تانىستىرىپ, قاتىسۋشىلار شەشىمىمەن بەكىتىلدى.
ءىس-شارا سوڭىندا يۋنەسكو جانە يسەسكو ىستەرى جونىندەگى قر ۇلتتىق كوميسسياسىنىڭ توراعاسى اقتوتى رايىمقۇلوۆا قاتىسۋشىلارعا العىس ايتىپ, جەمىستى جۇمىس تىلەدى.