قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىمەن كوروناۆيرۋستىق ىندەتىنە قارسى بىرلەسكەن كۇرەس اياسىندا قىرعىز رەسپۋبليكاسىنا گۋمانيتارلىق كومەك تابىستالدى.
بىشكەكتە ي. احۋنباەۆ اتىنداعى قىرعىز مەملەكەتتىك مەديتسينا اكادەمياسىنىڭ عيماراتىندا وتكەن سالتاناتقا قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قايرات نۇرپەيىسوۆ, قىرعىز رەسپۋبليكاسىنىڭ ۆيتسە-پرەمەر-ءمينيسترى ەلۆيرا سۋرابالديەۆا جانە قىرعىز رەسپۋبليكاسىنىڭ دەنساۋلىق ساقتاۋ ءمينيسترى الىمكادىر بەيشەناليەۆ قاتىستى.
ە. سۋرابالديەۆا باۋىرلاس ەلدەردىڭ اراسىنداعى قاتىناستار ستراتەگيالىق ارىپتەستىك جانە تاتۋ كورشىلىك رۋحىندا دامىپ جاتقانىن اتاپ ءوتتى. «ەڭ الدىمەن ءبىز جاقىن كورشىمىز جانە ءوزارا مۇددەلەردى ەسكەرە وتىرىپ, ىنتىماقتاستىقتى ودان ءارى وربىتۋگە نيەتتىمىز. ءبىز قازاقستاننىڭ COVID-19 ىندەتىنە قارسى كۇرەستە كورسەتكەن قولداۋىنا زور ريزاشىلىعىمىزدى بىلدىرەمىز», - دەدى ول.
ءوز كەزەگىندە ق. نۇرپەيىسوۆ قيىن كەزدە باۋىرلاس حالىقتار ءبىر-بىرىنە ارقاشان كومەك قولدارىن سوزاتىنىن باسا ايتتى.
2020 جىلعى 25 قاراشادا قازاقستان تارابى بەرگەن 400 دانا جاساندى جەلدەتۋ اپپاراتى مەن 2 ملن. مەديتسينالىق بەتپەردە تۇرىندەگى گۋمانيتارلىق جۇك قىرعىزستانعا جەتكىزىلدى. اتالعان بۇيىمدار قازاقستاندا, اتاپ ايتقاندا «تىنىس» اق, «Dolcepharm» جشس پەن «Megapharm» جشس كاسىپورىندارىندا شىعارىلعان. جالپى سالماعى 16 توننا بولاتىن گۋمانيتارلىق ونىمدەر بارلىق سانيتارلىق-ەپيدەميولوگيالىق نورمالاردى ساقتاي وتىرىپ, جۇك كولىگىمەن جەتكىزىلدى. قىرعىز تاراپىنان جۇكتى قابىلداپ الۋشى قىرعىز رەسپۋبليكاسىنىڭ دەنساۋلىق ساقتاۋ مينيسترلىگى بولىپ بەكىتىلدى.