اتىراۋدا ونكولوگيالىق اۋرۋعا شالدىققاندار كوبەيىپ بارادى. ءتىپتى قاتەرلى ىسىك دياگنوزى قويىلعان ناۋقاستاردىڭ اراسىندا جاستار دا بار. مۇنىڭ سەبەبى نەدە؟ وبلىس اكىمى ماحامبەت دوسمۇحامبەتوۆتىڭ مالىمەتىنە سۇيەنسەك, بۇعان قورشاعان ورتانىڭ بۇزىلۋى اسەرى ەتۋى مۇمكىن.
– سوڭعى ەكى-ءۇش جىلدا اتىراۋدا 100 مىڭ ادامعا شاققاندا ونكولوگيالىق اۋرۋلار كورسەتكىشى جاسارىپ بارا جاتقانىن ءبىلىپ وتىرمىز. قازىر ونكولوگيالىق اۋرۋعا شالدىققان 4 100-دەن اسا ادام بار. ونىڭ 3 مىڭنان استامى ەمدەۋ كۋرسىنان ءوتتى. وسىنداي ناۋقاستاردى ەمدەۋ ءۇشىن رەنتگەن, تسيفرلى مامموگرافيا, كومپيۋتەرلىك توموگرافيا, مرت اپپاراتتارى ءبىر جۇيەگە قوسىلدى. بۇل جۇيە ونكولوگيالىق اۋرۋدى ەرتە ساتىدا انىقتاپ, ناۋقاستى دەر ۋاقىتىندا ەمدەۋگە مۇمكىندىك بەرەدى, – دەيدى ءوڭىر باسشىسى.
قازىر وكپە وبىرىن, ءسۇت بەزى قاتەرلى ىسىگىن, ءتىپتى COVID-19 سالدارىنان پايدا بولعان وكپە قابىنۋىن باستاپقى ساتىدا انىقتاۋعا قولدانىلاتىن جاساندى ينتەللەكت بار راديولوگيالىق زەرتتەۋلەردى ورتالىقتاندىراتىن جاڭا جوبا ۇسىنىلىپ وتىر. بۇل جوبا وبلىستىق دەنساۋلىق ساقتاۋ باسقارماسى مەن «WDSOFT» جشس كومپانياسى اراسىنداعى مەملەكەت-جەكەمەنشىك سەرىكتەستىك اياسىندا جۇزەگە اسىرىلدى. «PACS» بىرىڭعاي مەديتسينالىق اقپارات جۇيەسى ارقىلى 20 مەديتسينالىق مەكەمەنى ءبىر ارناعا ەنگىزىلدى.
«PACS» جۇيەسىنە كومپيۋتەرلىك باعدارلامالار, سەرۆەرلەر, باعدارلامالىق قامتاماسىز ەتۋ كىرەدى. تسيفرلى راديولوگيالىق تۇسىرىلىمدەردى ارحيۆتە ساقتاۋعا مۇمكىندىك بار. سونىڭ ناتيجەسىندە, بۇل جۇيەگە قوسىلعان اۋرۋحانالار مەديتسينالىق تسيفرلىق كورسەتىلىمگە قول جەتكىزەدى. ماسەلەن, ناۋقاستى ءبىر مەديتسينالىق مەكەمەدەن ەكىنشىسىنە, ءتىپتى اۋداننان وبلىس ورتالىعىنا جىبەرگەندە پلەنكالى نەمەسە قاعاز تۇرىندەگى تۇسىرىلىمدەردىڭ قاجەتى بولماي قالادى. اۋرۋدىڭ ءورشۋ قارقىنىن باقىلاۋعا مۇمكىندىك تۋادى. WDSOFT كومپانياسىنىڭ وكىلى رەنات سارسەمباەۆتىڭ ايتۋىنشا, جاساندى ينتەللەكت دارىگەرلەردىڭ جۇكتەمەسىن ازايتىپ, دياگنوزدى ناقتىلاي تۇسەدى.
– بۇل – وتە ءتيىمدى جوبا. ويتكەنى كومپيۋتەرلىك توموگرافيا, مرت, رەنتگەن, مامموگرافيا سىندى كوپتەگەن راديولوگيالىق زەرتتەۋلەردى ورتالىقتاندىرۋعا بولادى. بىردەن بىرنەشە ماسەلەنى شەشۋگە سەپتىگىن تيگىزەدى. سونىڭ ىشىندە قاتەرلى ىسىك اۋرۋلارىن ەرتە انىقتاۋدى, راديولوگ-دارىگەرلەردىڭ جەتىسپەۋشىلىگىن, تسيفرلى دەنساۋلىق ساقتاۋ جۇيەسىن دامىتۋدى وڭتايلاندىرادى. سونىمەن قاتار جاساندى ينتەللەكتىنى قولدانۋ ارقىلى جەدەلدىك ارتادى. ماسەلەن, اۋداندا جاسالعان ءتۇسىرىلىم سول كۇنى وبلىستاعى ماماندارعا جەتكىزىلىپ, ولار دەر كەزىندە ءتيىستى قورىتىندىنى جەدەل شىعارا الادى. «اكگيۋن» حالىقارالىق ۇيىمىنىڭ قولداۋى ارقىلى كوروناۆيرۋس ينفەكتسياسى تۋىنداتقان وكپە قابىنۋىن انىقتاۋعا ارنالعان جاساندى ينتەللەكتىگە قول جەتكىزدىك. قاۋىپتى ىندەتتىڭ شارىقتاۋ كەزىندە كوپتەگەن ادام كەۋدەگە كومپيۋتەرلىك توموگرافيا ءتۇسىرىلىمىن ورىنسىز جاساتا بەرگەن. جاساندى ينتەللەكت ادامنىڭ وكپەسى قابىنعانىن, نە قابىنباعانىن لەزدە انىقتاپ بەرەدى. ەگەر اۋرۋ بەلگىسى تابىلسا, ونى كومپتەرلىك توموگرافيا ساراپتاماسىنا جولداپ, وكپەنىڭ قابىنۋ دەڭگەيىن انىقتايدى, – دەيدى ر.سارسەمباەۆ.
اتىراۋ وبلىسى