حالىقتىق ديپلوماتياعا اينالعان جوبا

كونگرەستىڭ العاشقى ەكى كۇ­نىن­دە بلوكچەين تەحنولوگياسى, ۇلكەن ەۋرازيا, دۇنيەجۇزىلىك داعدارىس, ەكونوميكا, ساۋدا, ينۆەستيتسيانىڭ وزەكتى ماسەلەلەرى كوتەرىلىپ, جىبەك جولى بويىنداعى ەلدەردىڭ قالا مەرلەرىنىڭ فورۋمى ءوتتى. ال شارانىڭ سوڭعى كۇنى ۋنيۆەرسيتەتتەردىڭ جاھان­دىق كونگرەسىنە جينالعان وتاندىق جانە شەتەلدىك جوعارى وقۋ ورىن­­دارىنىڭ باسشىلارى, عىلىم اكادەميالارىنىڭ, يۋنەسكو جانە ءبىلىم بەرۋ قورلارىنىڭ وكىلدەرى ءبىلىم جانە عىلىم سالاسىنىڭ بۇگىنگى احۋالىن, سالاداعى مۇمكىندىكتەر مەن بۇۇ-نىڭ 2030 جىلعا ارنالعان تۇراقتى دامۋ ماقساتتارىنىڭ جۇزەگە اسۋىنا جاستاردىڭ قوساتىن ۇلەسىن تالقىلادى. شاراعا الەمنىڭ تۇكپىر-تۇكپىرىنەن 500-دەن استام جوعارى وقۋ ورنىنىڭ وكىلدەرى قاتىستى.

شارا بارىسىندا G-Global حالىقارالىق حاتشىلىعىنىڭ باسشىسى سەرىك نوگەربەكوۆ G-Global تۇراقتى ۇيىمداستىرۋ كوميتەتىن قۇرۋدى ۇسىندى. «ەكى كۇننىڭ قورىتىندىسى بويىنشا سىزدەرگە وسى شارانى وتكىزۋ ماقساتىندا تۇراقتى جۇمىس ىستەيتىن ۇيىم­داستىرۋ كوم­ي­تەتىن قۇرۋدى ۇسىن­عىم كەلەدى. جىلىنا ءبىر رەت وسى ۋاقىتتا جىل سايىن G-Global الاڭى مەن ارىپتەستەرىمىزدىڭ پلاتفور­ماسىن پايدالانا وتىرىپ, ءىس-شارامىزدى بىرلەسىپ وتكىزۋگە نيەتتىمىز. وسى كونگرەسس وتكەن e-forum.net يننوۆاتسيالىق پلات­فورماسى تيىمدىلىگىن كور­سەتتى. ەڭ باستىسى, ەكى كۇندىك تالقى­لاۋ­لاردان كەيىن حالىقتىق ديپلو­ماتيانىڭ وسىنداي ينستيتۋتتارىن قۇرۋ قاجەت دەگەن سەنىم پايدا بولدى. بۇگىنگى تاڭدا الەمدە مەملەكەتتىك ديپلوماتيا مەن مەملەكەتارالىق ديپلوماتيا – بىرىككەن ۇلتتار ۇيىمى, ازيا دامۋ بانكى, دۇنيەجۇزىلىك دەنساۋلىق ساقتاۋ ۇيىمى جۇمىس ىستەيدى. ەندى بىزگە ءۇشىنشى تىرەك – قوعامدىق ديپلوماتيا كەرەك. بۇل پروتسەسس قازىر بەلەڭ الىپ جاتىر», دەدى س.نوگەربەكوۆ.

حاتشىلىق باسشىسى كەزىندە ەلباسى نۇرسۇلتان نازارباەۆتىڭ G-Global قۇرۋ جونىندەگى باستاماسىن بۇۇ باس اسسامبلەياسى ەكى رەت – 2012 جانە 2013 جىلدارى قولداعانىن ەسكە سالدى. G-Global جوباسىن 103 مەملەكەت قول­دايدى. يسلام ىنتىماق­تاستىعى ۇيىمىنىڭ سىرتقى ىستەر مي­نيسترلەرىنىڭ كەڭەسى G-Global-عا الەمدىك قارجى ساياساتى ما­سەلەلەرىن شەشۋدىڭ ەڭ بەدەلدى پلاتفورماسى رەتىندە سەنىم بىلدىرەدى. سونداي-اق باسقا حالىق­ارالىق ۇيىمدار بۇل جوبانى ازيا مەن ەۋروپا اراسىنداعى كوم­مۋ­نيكاتسيالىق پلاتفورما رەتىندە جوعارى باعالايدى.

«G-Global. XXI عاسىرداعى الەم» پلەنارلىق وتىرىسىندا ءسوز العان ارمەنيا پرەزيدەنتى ار­مەن ساركيسيان كونگرەسس قاتى­سۋ­شىلارىن شىن جۇرەك­تەن قۇت­تىق­تاپ, قازاقستاننىڭ تۇڭ­عىش پرەزيدەنتى نۇرسۇلتان نازار­­باەۆ­تىڭ باستاماسى جاڭا جوبا قۇرۋعا اسەر ەتكەنىن مالىمدەدى.

«نۇرسۇلتان ءابىش ۇلىنىڭ ەۋرا­زيا­لىق سەرىكتەستىك قۇرۋ تۋرالى باستاماسىن جاريا ەتكەن كۇندەر جاقسى ەسىمدە. ەۋرازيالىق ەكونوميكالىق وداق ايماقتىق ساياسات, ساۋدا مەن مادەنيەتتىڭ دامۋىنا ۇلەس قوسىپ كەلەدى. G-Global جوباسىنىڭ بۇگىنگى جاعدايعا تولىق جاۋاپ بەرەتىن الاڭ ەكەنىن اتاپ وتكىم كەلەدى. ويتكەنى دۇنيەجۇزى بەتپە-بەت كەلگەن بەلگىسىز قاۋىپ­تەر سانى ازايار ەمەس. ونىڭ قاتار­ىنا الەمدى جاۋلاعان ىندەت پەن ەكو­نوميكالىق داعدارىستى, ءبىرپو­ليارلى الەمنىڭ كوپپوليارلى باعىت­قا اۋىسۋىن جاتقىزۋعا بولادى. ايماق­تاعى مەملەكەتتەر الدىنداعى مىندەت­تەر ورتاق شەشىمدى قاجەت ەتەدى. سول سە­بەپتى ەجەلگى ۇلى جىبەك جولى يدەيا­سىن وتە وزەكتى دەپ ەسەپتەيمىن. G-Global الاڭى الەمنىڭ نەمەسە ەۋرا­زيا ايماعىنىڭ ساۋدا جانە ەكونومي­كالىق دامۋىنا عانا ەمەس, رۋحاني بايۋىنا سەپتىگىن تيگىزەدى دەگەن ويدامىن», دەدى ارمەنيا پرەزيدەنتى.

كونگرەستە ءسوز العان مارتەبەلى شەتەلدىك قوناقتاردىڭ ءبىرى يسلام دامۋ بانكى توبىنىڭ پرەزيدەنتى باندار حادجار الەمدەگى احۋال مەن داعدارىستىڭ سالدارىنا توقتالدى.

«قازىر الەمدە كوروناۆيرۋس ىن­دە­تىنىڭ ەكىنشى تولقىنىمەن بايلا­نىستى الاڭداۋشىلىق كوپ. الداعى جىلدارعا ارنالعان بولجامدار دا كوڭىل كونشىتپەيدى. الدا ءبىزدى ۇزاق ءارى كۇردەلى قايتا قالىپقا كەلۋ پرو­تسەسى كۇتىپ تۇر. داعدارىستىڭ سالدارى الەمدىك ەكونوميكاعا ۇزاق مەرزىمدە اسەر ەتەتىنىنە كوزىمىز جەتتى. پان­دەميادان كەيىن كوپتەگەن ماسەلەگە جانە ولاردىڭ شەشىمىنە جاڭا تاسىلمەن كەلۋىمىز كەرەك. سىن-تەگەۋ­رىندەردى باسقاشا شەشۋىمىز كەرەك. كۇن تارتىبىندە ەكونوميكادان بولەك, الەۋمەتتىك جانە ۇلتتىق قاۋىپسىزدىككە قاتىستى وزگە دە پروبلەمالار تۇر», دەپ اتاپ ءوتتى باندار حادجار. G-Global اياسىندا الداعى ۋاقىتتا ۇلى جىبەك جولى جاھاندىق سىيلىعى بەرىلەدى. بۇل تۋرالى ەۋرازيالىق ەكونوميكالىق كلۋبتىڭ پرەزيدەنتى, «G-Global. XXI عاسىرداعى الەم» حالىقارالىق كونگرەسىنىڭ حالىق­ارالىق حاتشىلىعىنىڭ ءبىرىنشى ورىن­باسارى مۇرات قارىمساقوۆ مالىم­دەدى. «بۇل باستاما 2019 جىلى 40 مەم­لەكەتتىڭ كوشباسشىلارى قاتىسقان حالىقارالىق فورۋمدا قولداۋ تاپتى. سول سەبەپتى قالا مەرلەرى­نىڭ فورۋمىندا ۇلى جىبەك جولى جاھاندىق سىيلىعىن بەكىتۋ جونىن­دەگى ۇيىمداستىرۋ كوميتەتىن قۇرۋ باستاماسىن كوتەردىك. قالا مەرلە­رىنىڭ كەلەسى حالىقارالىق فورۋ­مىنا دەيىن جاھاندىق سىيلىقتى تابىس­تاۋ شاراسىن ۇيىمداستىرۋ جولىندا بەلسەندى جۇمىس جۇرگىزۋگە شاقىرامىز. ول فورۋم 2021 جىلى بەي­جىڭدە وتەدى», دەدى مۇرات قارىم­ساقوۆ.

ءتورت تىلدە وتكەن ونلاين كونگرەسكە بارلىعى 5 مىڭعا جۋىق ادام قاتىسقان.