اقتوتى رايىمقۇلوۆا Ulu Bozkirin mirasi (" ۇلى دالا مۇراسى") اتتى تۇرىك تىلىندەگى كىتاپتىڭ تۇساۋكەسەرىنە ارنالعان ونلاين كونفەرەنتسياعا قاتىستى, دەپ حابارلايدى Egemen.kz.
بۇگىن مادەنيەت جانە سپورت ءمينيسترى اقتوتى رايىمقۇلوۆا قر-نىڭ تۇڭعىش پرەزيدەنت – ەلباسى كەڭسەسىنىڭ قولداۋىمەن قازاقستاننىڭ تۇركياداعى ەلشىلىگى جəنە تۇركسوي ۇيىمى ۇيىمداستىرعان حالىقارالىق ونلاين كونفەرەنتسياعا قاتىستى.
ونلاين كونفەرەنتسيا ن.ءا.نازارباەۆتىڭ Ulu Bozkirin mirasi (" ۇلى دالا مۇراسى") اتتى تۇرىك تىلىندەگى كىتابىنىڭ جارىق كورۋىنە ارنالدى. سونىمەن قوسا بۇل ءىس-شارا تۇڭعىش پرەزيدەنتى كۇنىنە وراي ءوتىپ وتىر.
جيىنعا تۇركى الەمىن زەرتتەۋمەن اينالىسىپ جۇرگەن عالىمدار, قازاق جانە تۇرىك ساياسي, ىسكەرلىك, عىلىمي ەليتا وكىلدەرى قاتىسىپ, بايانداما جاسادى.
كىتاپقا كورنەكتى مەملەكەت جانە ساياسي قايراتكەر, قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ءار جىلدارى كوپشىلىك الدىندا سويلەگەن سوزدەرى مەن باياندامالارى ەنگەن.
سونىمەن قاتار جيناق تۇركى الەمى مەن دالا وركەنيەتىنىڭ تاريحى مەن دامۋىنىڭ نەگىزگى باعىتتارىن قامتيدى. كىتاپ دالا وركەنيەتىنىڭ تاريحي جانە رۋحاني مۇرالارىن جاڭعىرتۋدىڭ, تۇركى مەملەكەتتەرىنىڭ ينتەگراتسياسىن دامىتۋدىڭ زاماناۋي ۇدەرىستەرى اياسىندا ەرەكشە وزەكتى ءəرى ماڭىزدى بولىپ وتىر.
باسقوسۋدا ءسوز العان اقتوتى رايىمقۇلوۆا بۇگىندە قازاقستان بىرلىك پەن قوعام كەلىسىمىنىڭ التىن بەسىگىنە اينالعانىن اتاپ ءوتتى.
"ەلىمىزدەگى تاتۋلىق پەن ىنتىماقتىڭ بىرەگەي ۇلگىسىن جاھان جۇرتشىلىعى زەردەلەپ, "قازاقستاندىق جول" نەمەسە "نازارباەۆ مودەلى" دەپ باعا بەرەدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ سالعان سارا جولىنا الەمدىك ساياساتكەرلەر مەن عالىمدار تاراپىنان قىزىعۋشىلىق جوعارى. ونىڭ باستامالارى مەن يدەيالارى تەرەڭ زەرتتەۋلەرگە ارقاۋ بولىپ, وعان حالىقارالىق دەڭگەيدەگى جەتەكشى بۇقارالىق اقپارات قۇرالدارىنىڭ, الەمدەگى ءىرى ەلدەر ليدەرلەرىنىڭ دە نازارى كۇشەيىپ وتىر.
سونىمەن بىرگە ەلباسىنىڭ تۇركى ەلدەرىنىڭ باۋىرلاستىق قارىم-قاتىناسىن دامىتۋداعى ءرولى ەرەكشە. تۇركيا رەسپۋبليكاسىنىڭ بۇرىنعى پرەزيدەنتى ابدۋللاھ گۇل: "بۇكىل تۇركى الەمى نۇرسۇلتان نازارباەۆتى ءوزىنىڭ كوشباسشىسى رەتىندە تانيدى جانە ونىڭ باۋىرلاس تۇركى حالىقتارىن بىرىكتىرۋ, ورتاق تاريحتى زەرتتەۋ, مادەني بايلانىستاردى دامىتۋ بويىنشا باستامالارىن جوعارى باعالايدى", دەپ كورسەتكەن ەدى. وسى ورايدا ەلباسىنىڭ تۇركى الەمى جانە دالا وركەنيەتىنىڭ تاريحى مەن دامۋىنىڭ نەگىزگى باعىتتارى تۋرالى كوپشىلىك الدىندا سويلەگەن سوزدەرى مەن باياندامالارىن قامتىعان " ۇلى دالا مۇراسى" اتتى كىتاپتىڭ تۇرىك تىلىندە جارىق كورىپ وتىرعانى اسا قۋانىشتى جاعداي. بۇل تۋىندى قازاق ەلى مەن بۇكىل تۇركى حالىقتارى ءۇشىن شىنىمەن دە اسىل مۇرا بولىپ قالادى.
ەلباسىنىڭ تۇركى ەلدەرىنىڭ ىنتىماقتاستىعىن ىلگەرىلەتۋ باعىتىندا جاساعان باستامالارى جايىندا شىعارىلعان بۇل كىتاپتىڭ وزەكتىلىگى الەمدە بولىپ جاتقان جاھاندانۋ مەن ايماقتاندىرۋ ءۇردىسى اياسىندا ەرەكشە ايقىندالا تۇسەتىنى ءسوزسىز. سونىمەن قاتار ەجەلدەن قالىپتاسقان كوشپەندىلەر وركەنيەتى مۇراسىنىڭ بۇگىنگى تۇركى ينتەگراتسياسى اياسىنداعى ماڭىزى زور. سوندىقتان, ەلباسى نۇرسۇلتان ءابىش ۇلى نازارباەۆتىڭ وسى باعىتتاعى اتقارعان ەڭبەگىن تۇركى الەمىنە ناسيحاتتاۋ ءبىزدىڭ باۋىرلاستىق پارىزىمىز. ءبىز ءۇشىن جانە بولاشاق ۇرپاق پەن بۇگىنگى وقىرمان ءۇشىن ماڭىزدىسى – ەلباسىنىڭ مۇراسىن تۇركى ەلدەرىنە تانىتۋ. كىتاپتىڭ تۇرىك تىلىندە سويلەيتىن وقىرمانعا پاش ەتىلۋى – قازاقتىڭ ماقتانىشى", دەدى مينيستر.