ەلىمىزدە كەلەسى جىلدىڭ 10 قاڭتارىندا پارلامەنت ءماجىلىسى مەن ءماسليحات دەپۋتاتتارى سايلاۋى وتەدى. ەلىمىزدەگى ەڭ ءىرى قوعامدىق بىرلەستىك رەتىندە كاسىپوداقتار فەدەراتسياسى ماڭىزدى ىشكى ساياسي پروتسەستەردەن تىس قالا المايدى. ولاي دەيتىنىمىز ءبىزدىڭ قاتارىمىزدا 2 ميلليونعا جۋىق ادام بار. سوندىقتان كاسىپوداقتار فەدەراتسياسى كەزەكتى سايلاۋدا ەلدىڭ سايلاۋ زاڭناماسىنىڭ بارلىق نورمالارىنىڭ ساقتالۋىن باقىلاۋعا نيەتتى.
بيلىكتىڭ زاڭ شىعارۋشى تارماعىنا ەڭبەك ادامىنىڭ مۇددەسىن قورعاپ, مارتەبەسىن كوتەرۋگە اتسالىساتىن ادامدار كىرەتىن بولسا, ءبىزدىڭ جۇمىسشىلاردىڭ قۇقىعىن قورعاۋعا باعىتتالعان ورتاق كۇش-جىگەرىمىز جاڭا سەرپىن الار ەدى. سونىمەن بىرگە ءبىزدىڭ الەۋمەتتىك ارىپتەستەرىمىزبەن ىنتىماقتاستىققا نەگىزدەلگەن بىرلەسكەن جۇمىسىمىز قوعامنىڭ نەگىزگى دەموكراتيالىق قۇندىلىقتارىن ساقتاۋعا مۇمكىندىك بەرەدى. بىرلىك, ادىلەتتىك, دامۋ – بۇل قازاقستان رەسپۋبليكاسىنىڭ كاسىپوداقتار فەدەراتسياسى قىزمەتىنىڭ باستى قاعيداتتارى.
جالپى, فەدەراتسيا – سايلاۋدا بايقاۋشى قىزمەتىن اتقارۋدا وتە تاجىريبەلى ۇيىم. بىلتىرعى پرەزيدەنت سايلاۋىندا دا بەلسەندى بولدى. سايلاۋ ۋچاسكەلەرىنىڭ 50 پايىزعا جۋىعىندا داۋىس بەرۋ پروتسەسىنىڭ زاڭعا ساي ءوتۋىن قاداعالاعان ەدى. سول سەبەپتى دە كاسىپوداق مۇشەلەرىن بۇل قىزمەتتە تاجىريبەسى مول دەۋگە مۇمكىندىك بار. ورتالىق, وڭىرلىك دەڭگەيدە بولسىن وسى مىندەتتى جوعارى دەڭگەيدە اتقاراتىنىمىزعا سەنىم بىلدىرەمىن. بايقاۋ پروتسەسى وڭاي ەمەس ەكەنى بەلگىلى, ۇلكەن جاۋاپكەرشىلىك ارتادى. بايقاۋشىلاردى قولداۋدا الدىمىزعا بىرنەشە مىندەت قويىپ وتىرمىز. داۋىس بەرۋ, سايلاۋالدى ناۋقان كەزىندە جۇمىس بەرۋشىلەردىڭ تاراپىنان ەشقانداي قىسىمنىڭ, ءماجبۇرلى داۋىس بەرگىزۋدىڭ بولماۋىن قاداعالايمىز. بايقاۋشىلار سايلاۋ پروتسەسىنىڭ قانشالىقتى زاڭعا سايكەس ءوتىپ جاتقانىن, سايلاۋ كوميسسيالارىنىڭ, پارتيا بايقاۋشىلارىنىڭ قۇقىق بۇزۋشىلىق ارەكەتتەرىن بايقاعان جاعدايدا دەرەۋ تىركەپ, ەسەپ بەرۋى كەرەك. وسىنداي كۇردەلى پروتسەستى بايقاۋدى جۇيەلى تۇردە ۇيىمداستىرۋ دا اسا ماڭىزدى. جۇمىستى ۇيلەستىرۋشىلەر مەن بايقاۋشىلار مىندەتتى تۇردە وقىتامىز. قازىر مۇنداي شارالاردىڭ كوبى ونلاين ءوتىپ جاتىر. ودان بولەك اقپاراتتىق ۆيدەو روليكتەر دايىندالادى. بۇل جۇمىس الداعى ءبىر-ەكى اپتادا باستالادى.
تاۋەلسىز بايقاۋشىلار ينستيتۋتى كەز كەلگەن دەموكراتيالىق قوعامنىڭ ۇلكەن ماڭىزعا يە بولىگى. قۇرىلىم سايلاۋداعى زاڭسىز ارەكەتتەردى اشىق كورسەتۋى ارقىلى ۇلكەن جاۋاپكەرشىلىككە يە. ازاماتتىق قوعام, حالىقارالىق ۇيىمدار بولسىن بيىلعى سايلاۋعا دەگەن قىزىعۋشىلىعى جوعارى. كاسىپوداقتار فەدەراتسياسىنىڭ مۇشەلەرى بۇل پروتسەسكە ءوز ۇلەسىن قوسۋعا ساقاداي ساي.
نۇرلان وتەشوۆ,
كاسىپوداقتار فەدەراتسياسى توراعاسىنىڭ ورىنباسارى