كۇنى كەشە ۇلتتىق كينونى قولداۋ مەملەكەتتىك ورتالىعى جىلدى قورىتىندىلاپ, ەكىنشى پيتچينگ ناتيجەسى بويىنشا كينووندىرىسكە جول تارتقان جوبالار جايلى حابارلادى.
قازىرگى كەزدە كينو ورتالىعى مەملەكەت تاراپىنان قارجىلاندىرۋعا يە بولعان جاڭا كارتينالاردىڭ رەجيسسەرلەرىمەن, پروديۋسەرلەرىمەن بەلسەندى جۇمىس ىستەپ جاتىر.
ورتالىق وكىلدەرىنىڭ ايتۋىنشا, بيىل وزدەرىنىڭ تاراپىنان تولىقمەترلى دەبيۋتتىك كارتينالاردىڭ شىعارىلۋىنا ەرەكشە نازار اۋدارىلعان. مىسالى, 2019 جىلى وتكەن ءبىرىنشى پيتچينگتە وسى ساناتتاعى جالعىز جوبا ايجان قاسىمبەكوۆانىڭ «وت» ءفيلمى بولاتىن. بيىل جارىس قورىتىندىسىنا سايكەس بەس بىردەي دەبيۋتتىك فيلم قارجىلاندىرىلماق. سولايشا كينو ءتىلىن ەندى مەڭگەرە باستاعان رەجيسسەرلەر ۇلكەن كينو جاساۋداعى شەبەرلىكتەرىن كورسەتۋگە مۇمكىندىك الدى. تومەندە سول فيلمدەر جايىندا ءبىرشاما مالىمەت كەلتىرمەكپىز.
كينو ورتالىعى ءۇشىن ماڭىزدى تاقىرىپتاردىڭ ءبىرى – الەۋمەتتىك ماڭىزى بار فيلمدەر. بۇل جولى پيتچينگتە وسى سالا بويىنشا الديار بايراكيموۆتىڭ باعى جاندى. ول 2018 جىلى وڭتۇستىك كورەيانىڭ پحەنچحان قالاسىندا وتكەن قىسقى پاراليمپيادا ويىندارىنىڭ جەڭىمپازى الەكساندر كولياديننىڭ عۇمىرىنا نەگىزدەلگەن «پاراليمپياداشى» ءفيلمىنىڭ ءتۇسىرىلىمىن باستاپ كەتپەك. كولىك اپاتىنىڭ سالدارىنان وڭ اياعىنان ايىرىلعان الەكساندر پحەنچحاندا وتكەن جارىستا شاڭعىمەن سەكىرىپ (1,5 كم كلاسسيكالىق سپرينت ءادىسى), التىن مەدال جەڭىپ العان ەرىك-جىگەرى مىقتى قازاقستاندىق ازامات.
ءبىراز جىلدان بەرى ارال توڭىرەگىندە ىزدەنىپ, جوبا جاساپ جۇرگەن دوكۋمەنتاليست ۆيكتور ۆيلكوۆيسكي «تەڭىزدىڭ ورالۋى» دەرەكتى ءفيلمىن تۇسىرۋگە كىرىسىپ كەتىپتى. ونىڭ ەكولوگيالىق اپاتتىڭ سەبەپتەرى تۋرالى تولىق تۇسىنىك بەرەتىن كۇردەلى عىلىمي-كوپشىلىك ءفيلمىنىڭ اۋقىمدى بولىگى نەگىزىنەن «بارساكەلمەس» قورىعىندا تۇسىرىلمەك.
اۆتورلىق فيلمدەرگە قاتىستى ايتاتىن بولساق, جۋىردا عانا «الاياقتار» سەريالىن ءتۇسىرىپ بىتكەن دارحان تولەگەنوۆ كەلەسى جىلدىڭ باسىندا «اعايىندىلار» دراماسىن ءتۇسىرۋدى جوسپارلاپ وتىر. سيۋجەتتىڭ باستى كەيىپكەرى – بالالار ۇيىنەن اكەسىن ىزدەۋ ءۇشىن كەتىپ قالعان اقجول ەسىمدى ءجاسوسپىرىم. كورشىسى ديماشپەن تانىسقاننان كەيىن جاس جىگىت قاراقشىلىقپەن اينالىسادى. كىسى توناپ اقشا تابادى. سوڭىرا تۋىسىمەن كەزدەسكەن سوڭ, ول ءوزىنىڭ تۋعان اعاسىنىڭ بار ەكەنىن بىلەدى. اعاسىن تاۋىپ العان سوڭ, ەكەۋى بىرگە اكەسىن ىزدەۋدى باستايدى…
«تيۋلپان» كارتيناسىنىڭ جارىق جۇلدىزى اسحات كۋچينچيرەكوۆ «باۋىرىنا سالۋ» فيلمىندە قازاق داستۇرلەرىنە نازار اۋدارماق. كارتينانىڭ باستى كەيىپكەرى – ارمان ەسىمدى بالا. ول اجەسى قايتىس بولعاننان كەيىن اتا-اناسىنا ورالادى. اكە-شەشەسىنەن ون جىل بويى بولەك تۇرعان بالانىڭ ولارمەن قارىم-قاتىناسى كۇردەلى ەكەنى تۇسىنىكتى. اجەسى تۋرالى ءتۇپسىز تەرەڭ ەستەلىكتەر بالاعا اتا-اناسىمەن جىلى قارىم-قاتىناس ورناتۋعا مۇمكىندىك بەرمەيدى. «باۋىرىنا سالۋ» فيلمىندە اكەلەر مەن بالالار ماسەلەسى بالانىڭ كوزىمەن سيپاتتالادى.
ءمادي بالجانوۆ كەڭ اۋديتوريانى بىردەن باۋراپ الۋعا شەشىم قابىلداعان جالعىز دەبيۋتانت سياقتى. جان-جاك اننونىڭ «امەلي» كارتيناسىنان شابىت العان رەجيسسەر ء«سۇتتى قىز» رومانتيكالىق كومەدياسىن شىعارۋدى جوسپارلاۋدا. وقيعا باسقالاردىڭ ءومىرىن ءتاتتى ەتۋگە تىرىسىپ جۇرگەن جاس كونديتەر ءدجاميليدىڭ اينالاسىندا ءوربيدى.
ۇلتتىق كينونى قولداۋ مەملەكەتتىك ورتالىعى وسى فيلمدەردىڭ تەزىرەك جارىققا شىعۋىنا تىلەكتەس ءارى دارىندى جاس رەجيسسەرلەر ءۇشىن تانىمالدىلىققا جول اشاتىن فيلمدەر بولسا دەپ ۇمىتتەنەدى.