ەلدەگى كارانتين جاعدايىنا بايلانىستى "شىمكەنت مادەني استانا" جىلىندا ۇيىمداستىرىلعان ءىس-شارانىڭ بارلىعى ونلاين فورماتتا ۇيىمداستىرىلدى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
جىل باسىنان بەرى قالادا 1500-دەن استام مادەني شارا ونلاين ۇيىمداستىرىلىپ, ميلليوننان استان كورەرمەن تاماشالاعان.
بۇل جونىندە قالا اكىمى مۇرات ايتەنوۆ "وڭتۇستىك" تەلەارناسىندا وتكەن "اكىم ساعاتى" باعدارلاماسىندا باياندادى.
"مادەني استانا جىلىنىڭ جابىلۋ سالتاناتى 22 قاراشا كۇنى ساعات 15.00-دە ونلاين وتەدى. قالاداعى ساياباقتاردا 7 جىلجىمالى تەاتر, 5 مۋزىكالىق پەرفومانستارى, اقىندار, جازۋشىلار جانە ادەبي قايراتكەرلەر بەينەسىندەگى بويلى قۋىرشاقتار شەرۋى وتەدى. قالامىزدىڭ جاس سۋرەتشىلەرىنىڭ كورمەسى مەن عيماراتتاردىڭ قاسبەتتەرىندە 7 مۋرالدىڭ تۇساۋكەسەرى وتەدى. كەلەسى جىلدىڭ مادەني استاناسى ەستافەتاسىن تاجىكستاننىڭ دۋشانبە قالاسىنا بەرەمىز", دەدى قالا اكىمى.
بارلىق ءىس-شارالار قالالىق مادەنيەت باسقارماسىنىڭ ۇيىمداستىرۋىمەن باسقارماعا قاراستى مادەنيەت مەكەمەلەرىنىڭ قاتىسۋىمەن وتكىزىلەدى.
ايتا كەتەيىك, مادەني استانا جىلىنىڭ جابىلۋىنا وراي قالادا 14 قاراشادان باستاپ «شىمكەنتكە 2200 جىل» اتتى كەرۋەن ءوز جۇمىسىن باستاعان بولاتىن. كەرۋەن قالا كوشەلەرىمەن ءجۇرىپ, قالا تۇرعىندارىنىڭ دۋشانبە قالاسىنا دەگەن ىزگى تىلەكتەرىن جينايدى.