كەشە استانا قالاسىندا KAZENERGY قاۋىمداستىعىنىڭ ۇيلەستىرۋ كەڭەسىنىڭ ۇيىمداستىرۋىمەن ادام كاپيتالىن دامىتۋعا ارنالعان ءماجىلىس ءوتتى. وعان مۇناي جانە گاز مينيسترلىگى مەن قاۋىمداستىق قىزمەتكەرلەرى, سونداي-اق, ءبىلىم جانە عىلىم مينيسترلىگى مەن بىرقاتار قوعامدىق ۇيىمدار قاتىستى.
كەشە استانا قالاسىندا KAZENERGY قاۋىمداستىعىنىڭ ۇيلەستىرۋ كەڭەسىنىڭ ۇيىمداستىرۋىمەن ادام كاپيتالىن دامىتۋعا ارنالعان ءماجىلىس ءوتتى. وعان مۇناي جانە گاز مينيسترلىگى مەن قاۋىمداستىق قىزمەتكەرلەرى, سونداي-اق, ءبىلىم جانە عىلىم مينيسترلىگى مەن بىرقاتار قوعامدىق ۇيىمدار قاتىستى.
وتىرىستى باستاعان KAZENERGY قاۋىمداستىعىنىڭ باس ديرەكتورى اسەت ماعاۋوۆ جيىنعا قاتىسۋشىلاردى الدىمەن كادرلىق وزگەرىستەرمەن تانىستىردى. ونىڭ ايتۋىنا قاراعاندا, ۇيلەستىرۋ كەڭەسىنە تاعى ەكى تەڭ توراعا تاعايىندالىپتى. ونىڭ ءبىرىنشىسى – بۇرىنعى ەڭبەك جانە حالىقتى الەۋمەتتىك قورعاۋ ءمينيسترى بولعان, بۇگىندە «قازمۇنايگاز» اق-تىڭ ادام رەسۋرستارى باسقارماسىنىڭ باسقارۋشى ديرەكتورى سەرىك ابدەنوۆ ەكەن. ەكىنشىسى – ەلىمىزدەگى مۇناي-گاز سالاسىندا بىرنەشە جىلداردان بەرى باسشىلىق قىزمەتتەردە بولعان مۇقاش مۇرات. بۇل ەكى تەڭ توراعا قاۋىمداستىقتىڭ الەۋمەتتىك ارىپتەستىك سالاسىندا قىزمەت ەتپەك.
KAZENERGY قاۋىمداستىعىنىڭ ۇيىمداستىرۋىمەن وتكەن جيىندا مۇناي جانە گاز سالاسىنا قاجەتتى مامانداردىڭ سانىن بەلگىلەۋ جونىندەگى ماسەلەلەر, 2014 جىلعا ارنالعان جۇمىس جوسپارى مەن سەرتيفيكاتتاۋ ورتالىعىن قۇرۋ ۇلگىلەرى تالقىلاندى. سونىمەن قاتار, وتىرىس بارىسىندا مۇناي جانە گاز مينيسترلىگى, KAZENERGY قاۋىمداستىعى جانە مۇناي جانە گاز سەكتورى جۇمىسشىلارىنىڭ كاسىپتىك وداعى اراسىندا 2014-2016 جىلدارعا ارنالعان سالالىق ءۇش جاقتى كەلىسىمگە ءۇش مەكەمەنىڭ باسشىلارى قول قويدى.
«اتالعان كەلىسىم بويىنشا, مۇناي جانە گاز سالاسىنداعى جۇمىسشىلاردىڭ قىزمەتىنىڭ اۋىر ەكەندىگى ەسكەرىلە وتىرىپ, جۇمىس ۋاقىتى اپتاسىنا 40 ساعاتتان, ياعني تاۋلىگىنە 8 ساعاتتان اسپاۋى ءتيىس. ەگەر دە جۇمىس ۋاقىتى بەكىتىلگەن ۋاقىتتان اسىپ جاتسا, وندا جۇمىسشىعا قوسىمشا اقى تولەنەدى», دەدى قازاقستان كاسىپوداقتار فەدەراتسياسىنىڭ توراعاسى ابىلعازى قۇسايىنوۆ.
«وسى كەلىسىمشارتتى جاساۋداعى باستى ماقسات – سالانىڭ بىرىزدىلىكپەن دامۋىن قالىپتاستىرۋ. ءسويتىپ, كومپانيالارداعى الەۋمەتتىك تۇراقتىلىقتى قامتاماسىز ەتۋ تەتىگىن رەتتەۋ بولىپ تابىلادى. وعان قوسا, ەڭبەكاقى مەن وتەماقى تولەۋ ىسىندە سالالىق كەپىلدەمەلەردىڭ تومەنگى مولشەرىن بەلگىلەيدى. ەڭبەك قاۋىپسىزدىگى مەن ونىڭ شارتىن جەتىلدىرىپ, ەلدەگى زاڭ مەن حالىقارالىق ەڭبەك قۇقىنىڭ نورمالارىن سايكەستەندىرەتىن تەتىكتەردى جاسايدى», دەدى باس ديرەكتور.
نۇرباي ەلمۇراتوۆ,
«ەگەمەن قازاقستان».