اقتوبە قالاسىنداعى «دوستىق» ۇيىندە وبلىستىق مادەنيەت باسقارماسى مەن «ايتەكە بي» مەيىرىمدىلىك قورىنىڭ بىرلەسىپ ۇيىمداستىرۋىمەن «ايتەكە ءبيدىڭ اق جولى» دەرەكتى ءفيلمىنىڭ تۇساۋكەسەرى وتكىزىلدى.
ءفيلمنىڭ تۇساۋكەسەرىنە اقتوبەلىكتەر كوپ جينالدى. ونىڭ دا رەتى بار. ايتەكە بي قالىڭ قازاققا ورتاق تۇلعا دەگەنىمىزبەن, وبلىستا ونىڭ تىكەلەي ۇرپاقتارى كوپ تۇرادى, كەيىنگى جاستاردىڭ ۇلتىنىڭ ۇلى تۇلعالارىن تانىپ-بىلۋگە دەگەن ىقىلاسى دا زور. ءفيلمنىڭ اۆتورى, رەجيسسەرى – حالىقارالىق «تۇركى الەمى» تەلەستۋدياسىنىڭ ديرەكتورى, جازۋشى دوقتىرحان تۇرلىبەك.
اقتوبە قالاسىنداعى «دوستىق» ۇيىندە وبلىستىق مادەنيەت باسقارماسى مەن «ايتەكە بي» مەيىرىمدىلىك قورىنىڭ بىرلەسىپ ۇيىمداستىرۋىمەن «ايتەكە ءبيدىڭ اق جولى» دەرەكتى ءفيلمىنىڭ تۇساۋكەسەرى وتكىزىلدى.
ءفيلمنىڭ تۇساۋكەسەرىنە اقتوبەلىكتەر كوپ جينالدى. ونىڭ دا رەتى بار. ايتەكە بي قالىڭ قازاققا ورتاق تۇلعا دەگەنىمىزبەن, وبلىستا ونىڭ تىكەلەي ۇرپاقتارى كوپ تۇرادى, كەيىنگى جاستاردىڭ ۇلتىنىڭ ۇلى تۇلعالارىن تانىپ-بىلۋگە دەگەن ىقىلاسى دا زور. ءفيلمنىڭ اۆتورى, رەجيسسەرى – حالىقارالىق «تۇركى الەمى» تەلەستۋدياسىنىڭ ديرەكتورى, جازۋشى دوقتىرحان تۇرلىبەك. فيلمدە ەلىنىڭ ەگەمەندىگىنە, تاۋەلسىزدىگىنە ولشەۋسىز ەڭبەك سىڭىرگەن, حالقىنىڭ قامىن جەگەن قازاقتىڭ ءۇش ءبيىنىڭ ءبىرى ايتەكە بي بايبەك ۇلىنىڭ ءومىرى مەن قايراتكەرلىگى, شەشەندىگى تۋرالى دەرەكتەر كەلتىرىلەدى.
شىندىعىندا, قازاقتىڭ تۇتاستىعى, تاۋەلسىزدىگى جولىندا كوسەمدىگى مەن شەشەندىگى قاتار كورىنەتىن ءۇش ۇلى بابامىز تولە, قاز داۋىستى قازىبەك جانە ايتەكە بيلەر ەڭبەگى قالاي ۇلىقتاۋعا دا, قادىرلەۋگە دە تۇرارلىق. ولاردىڭ ۇلتىن ۇيىستىرۋداعى ۇلاعاتى كەيىنگى ۇرپاققا جەتۋى ءۇشىن قانشا فيلم تۇسىرسە دە ارتىق ەتپەس ەدى. فيلم قازاقستاندا, وزبەكستاندا تۇسىرىلگەن. بۇل – ايتەكە بي تۋرالى تۇسىرىلگەن ءبىرىنشى فيلم.
حالقىمىزدىڭ ءبىرتۋار تۇلعاسى تۋرالى تۇسىرىلگەن دەرەكتى فيلمنىڭ تۇساۋكەسەرىن وبلىستىق ىشكى ساياسات باسقارماسىنىڭ باسشىسى زاپەن جۇماباەۆا كىرىسپە ءسوز سويلەپ اشتى. ول ەلباسى نۇرسۇلتان نازارباەۆتىڭ تاريحىمىزدى تۇگەندەۋگە, رۋحاني قۇندىلىقتارىمىزدى قاستەرلەۋگە اسا ماڭىز بەرىپ وتىرعانىن جەتكىزە كەلىپ, قازاقتىڭ ءۇش ءبيىنىڭ ءبىرى, حان كەڭەسىنە 19 جىل ءمۇشە بولعان ايتەكە ءبيدىڭ ەسىمىن ەستە قالدىرۋعا بايلانىستى اتقارىلعان جۇمىستاردى ءتىلگە تيەك ەتتى. وزبەكستانداعى ناۋاي وبلىسىنداعى نۇراتادا ايتەكە بي مەن سەيىتقۇل اۋليەگە كەلىستى كەسەنە تۇرعىزىلعانىن, وعان اقتوبەلىكتەردىڭ دە ۇلەس قوسقانىن اتاپ ءوتتى. وبلىستا ايتەكە بي اتىنداعى اۋدان, ستانسا, سونداي-اق, ءار ەلدى مەكەندە كوشە بار ەكەنىن ەسكە سالدى. اقتوبە قالاسىندا بابامىزدىڭ بيىكتىگى 6 مەترلىك ەسكەرتكىشى ورناتىلعانىن دا قازاقتىڭ قامىن جەگەن ۇلى تۇلعاعا دەگەن قۇرمەتى ەكەنىن ايتىپ ءوتتى.
– ايتەكە بي تۋرالى ادەبي جانە عىلىمي-زەرتتەۋ كىتاپتار جازىلدى, تاريحي-تانىمدىق شارالار تۇراقتى وتكىزىلىپ كەلەدى. الايدا, فيلم تۇسىرىلمەگەن بولاتىن. بۇگىن تۇساۋكەسەرى ۇيىمداستىرىلىپ وتىرعان «ايتەكە ءبيدىڭ اق جولى» دەرەكتى ءفيلمى وسىنداي ولقىلىعىمىزدىڭ ورنىن تولتىرۋعا باعىتتالعان باستاما, – دەي كەلىپ, زاپەن جۇماباەۆا دەرەكتى ءفيلمنىڭ اۆتورى, رەجيسسەرى دوقتىرحان تۇرلىبەككە وبلىس اكىمدىگى اتىنان العىس سەزىمىن ءبىلدىردى. سودان كەيىن ءسوز العان قازاقستان جۋرناليستەر وداعى سىيلىعىنىڭ لاۋرەاتى, حالىقارالىق «تۇركى الەمى» تەلەستۋدياسىنىڭ ديرەكتورى دوقتىرحان تۇرلىبەك ايتەكە بي جاتقان قورىمدى تابۋ, ونىڭ باس سۇيەگىن زەرتحانالىق زەرتتەۋ ارقىلى ءمايىتىن انىقتاپ, باسىنا كەسەنە ورناتۋ جولىندا جانكەشتى جۇمىستار جاسالعانىن اڭگىمەلەدى. ونىڭ باسىنا ساۋلەت ونەرىنىڭ وزىق ۇلگىلەرى قولدانىلعان كەلىستى كەسەنە سالۋدا ونىڭ ۇرپاقتارىمەن بىرگە, قازاقتىڭ اتىمتاي جومارت جىگىتتەرى قولداۋ كورسەتكەنىن, سول كەزدەگى قازاقستاننىڭ وزبەكستانداعى توتەنشە جانە وكىلەتتى ەلشىسى زاۋىتبەك تۇرىسبەكوۆتىڭ ەڭبەگى زور ەكەنىن اتاپ ءوتتى. بابامىز تۋرالى دەرەكتى فيلم التى جىل ءتۇسىرىلىپتى. وعان اۆتور ءوز قارجىسىمەن بىرگە كاسىپكەر قازاقتاردىڭ دەمەۋشىلىك جاساعانىن تىلگە تيەك ەتتى.
تۇساۋكەسەرگە جينالعاندار «ايتەكە ءبيدىڭ اق جولى» دەرەكتى ءفيلمىن تاماشالادى. «شامشىراق-اقتوبە» جشس ديرەكتورى, اقىن مەيىرحان اقداۋلەت ۇلى ايتەكە بي تۋرالى ويىن تارقاتا كەلىپ, دەرەكتى ءفيلمدى ۇلى بابامىزدىڭ تاۋەلسىز مەملەكەتىمىز ءۇشىن سىڭىرگەن ەڭبەگىن, ونىڭ كورەگەن ساياساتكەرلىگىن جانە كوسەمدىگىن, شەشەندىگىن تانۋ جانە كەيىنگى ۇرپاققا ناسيحاتتاۋ جولىنداعى العاشقى قادام رەتىندە باعالادى. بۇل باستامانى الدا دا تولىقتىرىپ, دامىتا ءتۇسۋ قاجەتتىگىنە توقتالدى. تۇساۋكەسەردى وبلىستىق فيلارمونيانىڭ, دوستىق ءۇيىنىڭ ارتىستەرى ءايتەكە بيگە ارنالعان اندەرمەن جانە كۇيلەرمەن اجارلاندىرا ءتۇستى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
سۋرەتتى سالعان
اعىمسالى دۇزەلحانوۆ.