مەنىڭ كىندىك كەسىپ, تۋعان جەرىم – ازەربايجان. التىن بەسىك اۋىلىم تاۋلى قاراباقتىڭ قاقتىعىس الاڭىندا ورنالاسقاندىقتان, بالالىق, بوزبالا شاعىمنىڭ الاڭداۋشىلىقپەن وتكەنىن جاسىرا المايمىن. قازىر وندا اتا-انام, باۋىرلارىم تۇرادى. ال, مەنىڭ قازاقستاندى مەكەن ەتىپ جاتقانىما وتىز جىلدان اسىپ بارادى. تاعدىرىمنىڭ ءدىلى دە, ءدىنى دە ءبىر, ءتىلى ۇقساس, جانى جايساڭ قازاق اعايىندارمەن توعىسقانىنا ەش وكىنبەيمىن. ءوزىم دە, وتباسىم دا قازاقستاننىڭ تولىققاندى ازاماتتارى رەتىندە بار ماقسات-مۇددەمىزدى, كۇش-جىگەرىمىزدى وتانىمىزدىڭ گۇلدەنۋىنە ارناپ كەلەمىز.
مەنىڭ كىندىك كەسىپ, تۋعان جەرىم – ازەربايجان. التىن بەسىك اۋىلىم تاۋلى قاراباقتىڭ قاقتىعىس الاڭىندا ورنالاسقاندىقتان, بالالىق, بوزبالا شاعىمنىڭ الاڭداۋشىلىقپەن وتكەنىن جاسىرا المايمىن. قازىر وندا اتا-انام, باۋىرلارىم تۇرادى. ال, مەنىڭ قازاقستاندى مەكەن ەتىپ جاتقانىما وتىز جىلدان اسىپ بارادى. تاعدىرىمنىڭ ءدىلى دە, ءدىنى دە ءبىر, ءتىلى ۇقساس, جانى جايساڭ قازاق اعايىندارمەن توعىسقانىنا ەش وكىنبەيمىن. ءوزىم دە, وتباسىم دا قازاقستاننىڭ تولىققاندى ازاماتتارى رەتىندە بار ماقسات-مۇددەمىزدى, كۇش-جىگەرىمىزدى وتانىمىزدىڭ گۇلدەنۋىنە ارناپ كەلەمىز.
مەن – قازاقستاندى جۇرەگىممەن قالاعان جانداردىڭ ءبىرىمىن. مەكتەپ قابىرعاسىندا جۇرگەندە بۇل ەل تۋرالى كوپ ەستىگەنمىن. 1984-1986 جىلدارى كۇتپەگەن جەردەن ازاماتتىق بورىشىمدى وتەۋگە قازاقستانعا اتتانعاندا كەۋدەمدى شاتتىق كەرنەپ سالا بەردى. ءسويتىپ, تىڭ يگەرۋ جىلدارى بوي كوتەرگەن تيميريازەۆ اۋدانى اقسۋات اۋىلىندا اسكەري بورىشىمدى وتەۋ باقىتى بۇيىردى. ۇشقان قۇستىڭ قاناتى, جۇگىرگەن اڭنىڭ تۇياعى تالاتىن قازاقتىڭ اقسەلەۋلى سايىن دالاسى مەن ادامداردىڭ مەيىرىم شۋاعى توگىلگەن جىلى جۇزدەرىنىڭ جاقىن تارتقانى سونشالىق, قالاي تۇراقتاپ قالعانىمدى دا بىلمەي قالدىم. سودان بەرگى عۇمىرىمنىڭ قىزىلجار وڭىرىندە جالعاسىپ كەلە جاتقانىن اللا تاعالانىڭ ماڭدايىما جازعان ۇلكەن سىيىنا بالايمىن.
قاراپايىم شاحتەر مەن باسپاحانا تەرۋشىسىنىڭ وتباسىندا ءتالىم-تاربيە العان ماعان قيىندىققا مويىماۋ, قوعامدىق پايدالى ەڭبەكتەن قاشپاۋ ۇيرەنشىكتى ادەت بولاتىن. ونىڭ ۇستىنە اسكەرگە دەيىن ەڭبەكتىڭ ءدامىن ءبىراز تاتقانىم بار. پايداسى مولىنان ءتيدى. جەرگىلىكتى تۇرعىندار اراسىنان نەبىر جاقسى ادامداردى كەزدەستىرىپ, شاراپاتتى شاپاعاتىن, قايىرىمدى قامقورلىعىن كوردىم. ءبىرىن اعا, ءبىرىن ءىنى تۇتتىم. سولتۇستىك قازاقستان وبلىسىنىڭ قۇرمەتتى ازاماتى, قوعام قايراتكەرى جاقسىلىق ىسقاقوۆ, قازاقستاننىڭ ەڭبەك ەرى, اتاقتى ديقان گەننادي زەنچەنكو سەكىلدى بەدەلدى باسشىلاردىڭ ءتالىم-تاربيەسى, بەرگەن اقىلى, كورسەتكەن ۇلاعاتى شەكسىز بولدى. وسىلايشا تاۋەلسىزدىكتىڭ ارايلى تاڭىن بىرگە قارسى الدىق.
كەيبىرەۋلەر تۇرمىستىڭ جەڭىل جاعىن ىزدەپ, وزگە جاققا كوشىپ جاتتى. مەن ونداي ويدان بويىمدى اۋلاق سالدىم. ەڭبەك ەتە ءجۇرىپ, قىسىلعاندا قولۇشىن بەرەتىن دوستار تاپتىم. قانداي قيىندىقتى باستان وتكەرسەك تە, دوستىعىمىزعا, بىرلىگىمىزگە ەش سىزات تۇسىرە المادى. كەرىسىنشە, قۇرىشتاي بىرلىگىمىز قالىپتاستى. ءارلى-بەرلى وتكەندە قىزىلجار اۋدانىنا قاراستى ياكور اۋىلىنا سوقپاي كەتپەيمىن. قۇرىلىس بريگاداسى قۇرامىنداعى ءار ۇلت وكىلدەرىنەن قۇرالعان ءوندىردەي جاستار وسىنداعى كلۋبتى بەزەندىرۋگە بار ونەرىمىزدى سالىپ ەدىك. ءالى كۇنگە دەيىن سول قالپىندا تۇر. بەينە ءبىر ەل تاۋەلسىزدىگىنىڭ العاشقى جىلدارىنان قالعان تۇراقتىلىقتىڭ ءبىر بەلگىسىندەي جانىما ەرەكشە ىستىق كورىنەدى.
قاپ تاۋىنا ءبىر بارعانىمدا تۋعان-تۋىستارىم تۋعان جەرگە ورالۋىما اسا ىقىلاستى بولىپ, قالۋعا ۇگىتتەگەنى بار. بۇل كەزدە قازاقستانعا ابدەن باۋىر باسىپ قالعان ەدىم. ۇگىتتەرىنە كونبەسىمدى بىلسە كەرەك, اكە-شەشەم اق باتالارىن بەرىپ, شىعارىپ سالدى. كەلە سالا پەتروپاۆل قالاسىندا العاشقى كووپەراتيۆتى ۇيىمداستىرۋشىلاردىڭ ءبىرى رەتىندە ءوز ۇلەسىمدى قوسۋعا ۇمتىلدىم. يەسىز قالعان جىلىجاي كومبيناتى مەن 200 ميلليون تەڭگەگە جۋىق شىعىنعا باتقان «ۆەسنا» اق-تى العانىمدا «باسىڭا ماسىل تىلەپ الدىڭ عوي» دەگەن مۇسىركەۋ سوزدەردى كوپ ەستىدىم. سول كەزدەرى قازاقستاننىڭ بولاشاعىنا سەنگەننەن كەيىن وسىنداي نارتاۋەكەل ىسكە بەل بۋدىم دەسەم, بىرەۋ سەنەر, بىرەۋ سەنبەس ەدى. ەڭ باستىسى, وتاندىق بيزنەس دامۋىنىڭ باستاپقى كەزەڭىندە جاۋىننان كەيىنگى بايشەشەكتەي جاپپاي بۇرشىك جارىپ, وركەن جايا باستاعان تىڭ باستامالار ەلباسى تاراپىنان قولداۋ تاۋىپ وتىرسا, جاۋاپكەرشىلىكپەن جۇمىس ىستەمەۋگە ەش قاقىمىز جوق ەدى.
بۇگىندە كاسىپكەرلىكتىڭ وركەندەۋىنە ناقتى قامقورلىق جاسالىپ كەلەدى. كوپتەگەن اكىمشىلىك كەدەرگىلەر جويىلدى. مۇنىڭ ءوزى پرەزيدەنتتىڭ كاسىپكەرلەردى ۇلتتىق ەكونوميكانىڭ تۇراقتى ءوسىمىن قامتاماسىز ەتۋگە شاقىرۋىنا قوسىلعان ناقتى قادامعا اينالدى. بۇگىندە ءوزىم جەتەكشىلىك ەتەتىن «ناۋرىز-2030» جشس جىلىنا 3 مىڭ تونناداي كوكونىس وسىرۋمەن اينالىسادى. جىلىجاي شارۋاشىلىعى مەن «تۇركىستان» ويىن-ساۋىق كەشەنىندە 250-دەي ادام تۇراقتى جۇمىس ىستەيدى. ماۋسىمدىق ناۋقان كەزدەرىندە ولاردىڭ سانى 300-دەن اسادى. كوكونىستىڭ وننان استام ءتۇرىن قولجەتىمدى باعامەن ساتۋ ەرتە كوكتەمنەن قوڭىر كۇزگە دەيىن جالعاسادى.
وسىندايدا مەملەكەت باسشىسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلامالىق ماقالاسىنداعى «جاڭعىرتۋدىڭ تابىستىلىعى ءۇشىن ءاربىر ازاماتتىڭ ءوز وتانىنا پايدالى بولۋى وتە ماڭىزدى» دەگەن سوزدەرى ويعا ورالادى.
ومىردە ءوز ورنىڭدى تاپقاننان, ءوزىڭدى ەلگە, جەرگە, قوعامعا پايدالى تۇلعا رەتىندە سەزىنۋدەن اسقان باقىت جوق-اۋ, ءسىرا! انام قوناققا كەلىپ, جەر شوقتىعى – كوكشەتاۋ ايماعىنا اپارىپ, ارمانسىز قىدىرتتىم. قاشان كەتكەنشە قازاقستاندىقتاردىڭ ءبىر-بىرىنە دەگەن سىيلاسىمدىلىعىن, تاتۋ-ءتاتتى بىرلىگى مەن تىرلىگىن اۋزىنان تاستامادى. «سىرت كوز – سىنشى» دەگەن. تاۋەلسىزدىكتىڭ قادىر-قاسيەتىن, دوستىقتىڭ ۇلى كۇشىن, ەل حالقىنىڭ ىنتىماق-بىرلىگىن وسىندايدا ۇعىنادى ەكەنسىڭ.
ەلباسىمىزدىڭ سىندارلى ۇلت ساياساتىنىڭ ۇلى جەمىسىن قازاقستاندى مەكەن ەتكەن ۇلتتار مەن ۇلىستاردىڭ, كونفەسسيالاردىڭ قاي-قايسىسى بولسىن ماقتان ەتەدى. قازاقستان حالقى اسسامبلەياسى مەن ونىڭ وبلىستارداعى فيليالدارىنىڭ باستى ماقساتى قوعامدىق كەلىسىمدى باياندى ەتۋگە جۇمىلدىرىلعان. تەك ءبىزدىڭ وڭىردە جۇزدەن استام ەتنومادەني ءبىرلەستىك جۇمىس ىستەيدى. ونىڭ ءبىرى ءوزىم كوپ جىل جەتەكشىلىك ەتكەن ازەربايجان ەتنومادەني بىرلەستىگى قازاق حالقىنىڭ ءتىلىن, سالت-ءداستۇرىن, ادەت-عۇرپىن ناسيحاتتاۋدا كوپ ەڭبەك ءسىڭىردى. پەتروپاۆل قالاسىنداعى №17 ۇلتتىق وركەندەۋ مەكتەبىندەگى 11 بولىمدە ءتۇرلى ۇلت وكىلدەرى وزدەرىنىڭ جانە تۇرعىلىقتى حالىقتىڭ تاريحىمەن, مادەنيەتىمەن, ونەرىمەن جان-جاقتى تانىسادى.
مەنىڭ ۇل-قىزدارىمنىڭ ءبارى قازاقستاندا تۋىپ-ءوستى, وسىندا ەرجەتىپ, ءبىلىم الدى. شەتىنەن قازاق تىلىنە جەتىك. ۇلىم بابەك قۇرمانعازى اتىنداعى ۇلتتىق كونسەرۆاتوريانىڭ قوبىز سىنىبىندا ءبىلىم الادى. ول دا, ەكىنشى ۇلىم تابريز دا حالىقارالىق بايقاۋلاردىڭ جەڭىمپازى. ولاردىڭ قازاقستاننىڭ ماقتان تۇتار ازاماتتارى بولىپ ءوسىپ كەلە جاتقانى قۋانتادى. ءوزىم وبلىستىق ءماسليحاتتىڭ دەپۋتاتتىعىنا ءۇش رەت سايلانىپ, سايلاۋشىلاردىڭ سەنىمىن اقتاۋعا بار كۇش-جىگەرىمدى ارناپ كەلەمىن.
تاعدىردىڭ تالكەگىمەن ەمەس, ءوزىمنىڭ جۇرەك قالاۋىممەن وسىندا قالىپ, تاڭداۋدان اداسپاعانىما ريزامىن. مەنىڭ, وتباسىمنىڭ قورعانى – ەلباسىمىز جانە تۋعان ۇيىمىزگە اينالعان قازاقستانىم!
گيۋلاگا يلدىرىموۆ,
وبلىستىق ءماسليحاتتىڭ دەپۋتاتى, ازەربايجان ەتنومادەني بىرلەستىگىنىڭ مۇشەسى, «قۇرمەت» وردەنىنىڭ يەگەرى.
سولتۇستىك قازاقستان وبلىسى.