ۇكىمەت باسشىسى ەلباسى تاپسىرمالارىن ورىنداۋعا بايلانىستى كەيبىر ورگاندار جۇمىسىن قاتاڭ سىنعا الدى
وتكەن سەنبىدە پرەمەر-مينيستر سەرىك احمەتوۆ مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ماسەلەسى جونىندە ارنايى كەڭەس وتكىزدى.
پرەزيدەنت تاپسىرماسى قالاي ورىندالۋدا؟
ۇكىمەت باسشىسى ەلباسى تاپسىرمالارىن ورىنداۋعا بايلانىستى كەيبىر ورگاندار جۇمىسىن قاتاڭ سىنعا الدى
وتكەن سەنبىدە پرەمەر-مينيستر سەرىك احمەتوۆ مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ماسەلەسى جونىندە ارنايى كەڭەس وتكىزدى.
كەڭەستە پرەزيدەنتتىڭ سىن-ەسكەرتپەلەرىن ورىنداۋعا قاتىستى قارجى-ەكونوميكالىق ءماسەلەلەردىڭ ۇلكەن بلوگى قاراستىرىلدى. ورتالىق اتقارۋ ورگاندارىنىڭ, ۇلتتىق كومپانيانىڭ جەتەكشىلەرىنىڭ ەسەپتەرى تىڭدالدى.
ماسەلەن, وڭىرلىك دامۋ مينيسترلىگى مەن ەكونوميكا جانە بيۋدجەتتىك جوسپارلاۋ مينيسترلىگىنىڭ اراسىنداعى ءوڭىرلىك دامۋ, مەملەكەتتىك ساتىپ الۋلاردى جەتىلدىرۋ, مەملەكەتتىك جانە سالالىق باعدارلامالاردى قارجىلاندىرۋ مەن وڭتايلاندىرۋعا قاتىستى وكىلەتتىكتەردى شەكتەۋ ماسەلەسى تالقىلاندى.
ەكونوميكا جانە بيۋدجەتتىك دامۋ ءمينيسترى ەربولات دوساەۆتىڭ حابارلاعانىنداي, مەملەكەتتىك جانە سالالىق باعدارلامالاردى كەشەندى باعالاۋ جۇمىستارى جۇرگىزىلىپ, ولاردى ازىرلەۋدىڭ ساپاسىنا تالداۋ جاسالىنعان. سونىڭ ناتيجەسىندە ولاردى وڭتايلاندىرۋ جانە جۇزەگە اسىرۋ تەتىكتەرىن ساپالى تۇرعىدان جەتىلدىرۋ جونىندە ۇسىنىستار ازىرلەندى.
پرەمەر-مينيستر ورتالىق اتقارۋ ورگاندارىنىڭ جەتەكشىلەرىنىڭ نازارىن نەعۇرلىم ءتيىمدى جۇمىس ىستەپ جاتقان باعدارلامالاردى ايقىنداۋ قاجەتتىگىنە اۋداردى.
«جۇمىس ىستەمەيتىن باعدارلامالارعا جابىسىپ وتىرا بەرمەڭىزدەر. ءبىز ولاردى قىسقارتىپ, بوساعان قارجىنى داعدارىس پەن كۇرەس شارالارى اياسىنداعى ەكونوميكانىڭ باسىم باعىتتارىنا, اتاپ ايتقاندا جاڭا جۇمىس ورىندارىن قۇرۋ مەن ەكونوميكانى دامىتۋعا نەگىزدەلگەن شارالارعا قاراي باعىتتاۋىمىز كەرەك», دەپ اتاپ كورسەتتى سەرىك احمەتوۆ.
سونداي-اق, جەكەشەلەندىرۋدىڭ ەكىنشى تولقىنى اياسىنداعى كاسىپورىندار مەن نىسانداردى ارتتىرۋ جونىندەگى ءماسەلەنى تالقىلاۋ بارىسىندا دا ۇكىمەت باسشىسى بىرقاتار تاپسىرمالار بەردى. پرەمەر-مينيستر, اسىرەسە, مەملەكەتتىك ءمۇلىك جونىندەگى جەرگىلىكتى ورگانداردىڭ ارەكەتسىزدىگىنە قاتىستى ءوز نارازىلىعىن جاسىرمادى.
«بىزدە جەكەشەلەندىرۋ, مەملەكەتتىك م ۇلىكتى باسقارۋ جونىندە قانشاما كوميتەتتەر قۇرىلعان. بىراق ولاردىڭ نەمەن اينالىسىپ وتىرعانى تۇسىنىكسىز. جەرگىلىكتى جەردە مەملەكەت مۇلكىنىڭ ماسەلەلەرىنە قاتىستى ەكى مەملەكەتتىك ورگان جۇمىس ىستەپ وتىرسا دا اتقارىلعان شارۋانى كورىپ وتىرعانىمىز جوق. مۇنىمەن ناقتى شۇعىلدانۋىمىز كەرەك», دەپ تاپسىردى س.احمەتوۆ. سونىمەن قاتار, كەڭەسكە قاتىسۋشىلارعا مەملەكەت باسشىسىنىڭ تاپسىرمالارىنىڭ ورىندالۋ بارىسى قاتاڭ قاداعالانۋىنىڭ قاجەتتىگىن ەسكەرتتى.
«تاپسىرمالاردى جۇزەگە اسىرۋ مينيسترلەردىڭ ەرەكشە باقىلاۋىندا بولۋى ءتيىس. ولاردى ناقتى جانە ساپالى ەتىپ ورىنداۋ ءوز ءناتيجەلەرىن بەرەتىندىگى انىق. سوندىقتان پرەزيدەنت تاپسىرمالارىنىڭ ورىندالۋ بارىسىن قاتاڭ قاداعالاۋعا الۋدى تاپسىرامىن», دەپ اتاپ كورسەتتى ۇكىمەت باسشىسى.
سونىمەن قاتار, پرەمەر-مينيستر پرەزيدەنتتىڭ جۋىقتاعى جامبىل وبلىسىنا جاساعان جۇمىس ساپارىنىڭ بارىسىندا بەرگەن تاپسىرمالارىنا دا توقتالىپ ءوتتى.
«مەملەكەت باسشىسى بۇل وبلىستاعى ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسىنىڭ ورىندالۋ بارىسىنا قاتىستى بىرقاتار سىندار ايتتى. بۇل وڭىردە اتالعان باعدارلاما بويىنشا 38 كاسىپورىن اشىلعانىمەن, ولاردىڭ 29-ى عانا جۇمىس ىستەپ تۇر. وسى ۋاقىتقا دەيىن حالىقتىڭ اۋزىندا بولىپ كەلگەن ءىرى تسەمەنت زاۋىتى اشىلا سالىسىمەن جابىلعان. وسىنىڭ ءمان-جايىن انىقتاڭىزدار» دەپ تاپسىردى ۇكىمەت باسشىسى ءتيىستى وكىلەتتى ورگاندارعا.
كەڭەس بارىسىندا اۆتوكولىك جولدارى قاۋىپسىزدىگىن قامتاماسىز ەتۋ, ولاردى ءتيىستى تەحنولوگيالىق قاجەتتىلىكتەرمەن جابدىقتاۋ ماسەلەسى دە قوزعالدى.
«تەك ۇستىمىزدەگى جىلدىڭ وزىندە جامبىل وبلىسىنىڭ جولدارىندا, سونىڭ ىشىندە «باتىس ەۋروپا – باتىس قىتاي» جول تەلىمىنىڭ بويىندا 1 مىڭنان استام جول اپاتى تىركەلىپ, 300-دەن استام ادام قازا تاپقان. جولدار ءبولۋ بەلگىلەرىمەن جابدىقتالماعان», دەدى پرەمەر-مينيستر. وسىعان وراي ءبىرىنشى ساناتتى جولداردى سالعان كەزدە ءتيىستى قۇرال-جابدىقتاردى; جىلدامدىق ولشەگىشتەردى, باقىلاۋ قۇرالدارىن ورناتۋدى ەستەن شىعارماۋ قاجەتتىگىن ەسكەرتتى. «ءتورت جولاقتى جولدى سالعان كەزدە جول ءبولۋ بەلگىلەرىن ورناتپاي كەتۋ سالاقتىعىن قالاي تۇسىنۋگە بولادى. استانا – بۋراباي جولىنا قاراڭىزدارشى. مۇنداعى جاڭا جول سالىنعانعا دەيىن جول بويىندا جىلىنا 80 ادام قايتىس بولاتىن. ال 2012 جىلى 1 عانا ادام قازا تاۋىپتى. مىنە, وسىنداي جايدان قورىتىندى شىعارىپ, ءوز جۇمىستارىڭىزعا جاۋاپكەرشىلىكپەن قاراۋلارىڭىز قاجەت», دەگەن ۇكىمەت باسشىسى وسى پروبلەمامەن اينالىسىپ, ورىن الىپ وتىرعان كەمشىلىكتەر مەن ورەسكەلدىكتەردى جويۋ جونىندە ناقتى تاپسىرما بەردى.
سۇڭعات ءالىپباي,
«ەگەمەن قازاقستان».