«نۇر وتان» پارتياسىنىڭ ورتالىق اپپاراتىندا پارتيالىق كۋراتور ساراپتاما توبىنىڭ «جاستاردى قولداۋ» باعىتى بويىنشا وتىرىسى بولىپ ءوتتى. وعان ساراپتاما توبىنىڭ مۇشەلەرى, استانا مەن الماتى قالالىق جانە وبلىستىق ءماسليحاتتار دەپۋتاتتارى, مەملەكەتتىك ورگانداردىڭ, مەملەكەتتىك ەمەس جاستار ۇيىمدارىنىڭ وكىلدەرى قاتىستى.
«نۇر وتان» پارتياسىنىڭ ورتالىق اپپاراتىندا پارتيالىق كۋراتور ساراپتاما توبىنىڭ «جاستاردى قولداۋ» باعىتى بويىنشا وتىرىسى بولىپ ءوتتى. وعان ساراپتاما توبىنىڭ مۇشەلەرى, استانا مەن الماتى قالالىق جانە وبلىستىق ءماسليحاتتار دەپۋتاتتارى, مەملەكەتتىك ورگانداردىڭ, مەملەكەتتىك ەمەس جاستار ۇيىمدارىنىڭ وكىلدەرى قاتىستى.
وتىرىسقا ءماجىلىس دەپۋتاتى مەيرام بەگەنتاەۆ جەتەكشىلىك جاساسا, ساراپشى توپتىڭ مۇشەلەرى قۇرامىندا پالاتا دەپۋتاتتارى الدان سمايىل, شالاتاي مىرزاحمەتوۆ, اناتولي پەپەنين جانە سەرىك وسپانوۆ بولدى. بۇل رەتتە ەلباسى, پارتيا توراعاسى نۇرسۇلتان نازارباەۆتىڭ تاپسىرماسىمەن 2012 جىلى «قازاقستان. 2017 ماقساتتارى. ۇلتتىق ءىس-قيمىل جوسپارى» سايلاۋالدى تۇعىرناماسىن ساپالى جۇزەگە اسىرۋ ماقساتىندا «نۇر وتان» پارتياسىنىڭ فراكتسياسى مۇشەلەرىنىڭ ساپىنان ماجىلىستە سايلاۋالدى تۇعىرناما باعىتتارى بويىنشا پارتيالىق كۋراتورلار انىقتالعان-دى. ساراپشى توپ مۇشەلەرى الدىندا ءسوز العان ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلى قازىرگى تاڭدا جۇمىسسىز جۇرگەندەردىڭ 30 پايىزىن جاستار قۇرايتىندىعىنا, ولاردىڭ ماماندىعى نە بىلىكتىلىگى نەمەسە ەڭبەك داعدىسى جوقتىعىنا نازار اۋدارتپاققا تىرىستى. الايدا, توپ مۇشەلەرى مۇنداي ۋاجبەن كەلىسە قويعان جوق. ولار بۇل رەتتە ەڭبەك نارىعىنداعى ماماندىققا سۇرانىستار مەن ءبىلىم بەرۋ سالاسىنىڭ اراسىندا بايلانىستىڭ ءالى كۇنگە ورناماي وتىرعانىنا قىنجىلىستارىن جاسىرمادى. جاستاردى قورعاي سويلەگەن شالاتاي مىرزاحمەتوۆ قازىرگى جاستاردىڭ ءبىلىمى دە, ومىرگە بەيىمدىلىگى دە بۇرىنعى كەزەڭمەن سالىستىرعاندا الدەقايدا جوعارى ەكەندىگىنە توقتالدى. ءبىر عانا مىسال رەتىندە, مەملەكەتتىك قىزمەتكە ورنالاسۋدا ءبىر جىلدىق ەڭبەك ءوتىلى بولۋىن تالاپ ەتەتىندىگىن العا تارتقان ول, الدىمەن جاس ماماندى ءبىر جىلدىق ەڭبەك تاجىريبەسىنەن وتكىزۋ تەتىگىن قاراستىرۋ قاجەتتىگىن ەرەكشە اتادى.
جاستاردىڭ باسىنداعى قيىنشىلىقتاردى ءسوز ەتكەن ءماجىلىس دەپۋتاتى, ساراپتاما توبىنىڭ مۇشەسى الدان سمايىل ولاردى شەشۋ ءۇشىن رەسپۋبليكالىق دەربەس جاستار اگەنتتىگى قۇرىلۋى قاجەتتىگىن جەتكىزدى. «مينيسترلىكتىڭ جانىندا وتىرعان كوميتەت ءوز بەتىمەن بىرنارسە شەشە الادى دەپ ويلامايمىن. ول ۆيتسە-مينيسترگە دە, جاۋاپتى حاتشىعا دا, مينيسترگە دە باعىنىشتى. قالاي بولعاندا دا, سولاردىڭ ىقپالىندا كەتەدى», دەدى ا.سمايىل.
دەپۋتاتتىڭ پايىمىنشا, مەملەكەتتىك گرانت بەرىلگەن جاستاردى جۇمىسقا ورنالاستىرۋعا مەملەكەت جاۋاپتى بولۋى كەرەك. «مەملەكەت اقشا بەرىپ, 5 جىل وقىتتى. سودان كەيىن «جۇگەنىن سىپىرىپ» قويا بەرۋى كەرەك پە؟ بىزگە مەملەكەتتىك گرانتپەن وقىعان جاستار مىندەتتى تۇردە جۇمىسقا ورنالاسسىن دەگەن زاڭ قاجەت. «حالىقتى جۇمىسپەن قامتۋ تۋرالى» زاڭ ازىرلەنىپ جاتىر ەكەن. سول زاڭعا وسىنداي نورما ەنگىزۋ كەرەك», دەدى توپ مۇشەسى. سونىمەن قاتار, دەپۋتات ماماندار دايارلاپ جاتقان جەكەمەنشىك وقۋ ورىندارىنىڭ جاۋاپكەرشىلىگىن كۇشەيتۋ قاجەتتىگىن دە باسا ايتتى.
جالپى, وتىرىس بارىسىندا جاستاردى ەڭبەككە ورنالاستىرۋدىڭ قىر-سىرى جان-جاقتى تالقىلانۋمەن قاتار, جاستار ساياساتى سالاسىنداعى 2014 جىلعا ارنالعان وبلىستىق بيۋدجەتتى قۇرۋ جانە جاستار ۇيىمدارى جۇمىسىنىڭ جەلىلىك كەستەسىن قالىپتاستىرۋ ماسەلەلەرى قارالدى. سونداي-اق, ون-لاين رەجىمىندە جاستار اراسىندا وتىرعان الەۋمەتتىك-ەكونوميكالىق ماسەلەلەردى ۋاقىتىندا ايقىنداپ, تالداۋ جانە مەملەكەتتىك جاستار ساياساتىن ءتيىمدى جۇزەگە اسىرۋعا ناقتى ۇسىنىستار جاسايتىن وڭىرلىك جاستار ساياساتى ماسەلەلەرى باسقارمالارىنىڭ جەتەكشىلەرى بايلانىسقا شىعىپ, ءوز ويلارىن ورتاعا سالىپ وتىردى.
حالىقارالىق تاجىريبەلەرمەن قوسا, ساراپشى توپ وتاندىق ساراپشىلاردى دا وسى ماسەلەگە جۇمىلدىرۋ قاجەتتىگىنە, ءتىپتى, قاجەت بولسا, جۇمىسسىز جاستاردىڭ ءوزىن سەبەبىن بىلمەك ءۇشىن اڭگىمەگە تارتۋعا شاقىردى. وتىرىس بارىسىندا بىرقاتار ۇسىنىمدار قابىلدانىپ, ەندى ولار ءتيىستى جەرلەرگە جولداناتىن بولادى.
اسقار تۇراپباي ۇلى,
«ەگەمەن قازاقستان».