بريۋسسەلدە ەۋروپالىق وداق جانە ورتالىق ازيا ەلدەرىنىڭ جەتىنشى مينيسترلىك كەزدەسۋى بولىپ ءوتتى. قازاقستاننان كەزدەسۋگە سىرتقى ىستەر ءمينيسترى ەرلان ىدىرىسوۆ قاتىستى.
بريۋسسەلدە ەۋروپالىق وداق جانە ورتالىق ازيا ەلدەرىنىڭ جەتىنشى مينيسترلىك كەزدەسۋى بولىپ ءوتتى. قازاقستاننان كەزدەسۋگە سىرتقى ىستەر ءمينيسترى ەرلان ىدىرىسوۆ قاتىستى.
وتىرىس بارىسىندا سىرتقى ساياسات ۆەدومستۆولارىنىڭ باسشىلارى ورتالىق ازياداعى ەۋرووداق ستراتەگياسى شەڭبەرىندەگى وڭىرارالىق ىنتىماقتاستىق ماسەلەلەرىن تالقىلادى. بۇدان بولەك, تاراپتار سوت-قۇقىقتىق جۇيەنى رەفورمالاۋ, ءبىلىم بەرۋ ستاندارتتارى مەن ساپاسىن ارتتىرۋ, قورشاعان ورتانى قورعاۋ ءوزارا ساۋدا كولەمى مەن ينۆەستيتسيا ءتۇسىمىن ارتتىرۋعا باعىتتالعان ورتالىق ازيا وڭىرىندەگى ەۋرووداقتىڭ ماڭىزدى باستامالارىن قاراستىردى.
قازاقستاننىڭ ەو-نىڭ وڭىرلىك ستراتەگياسى شەڭبەرىندە ىسكە اسىرىلىپ جاتقان ءىس-شارالارىنا بەلسەندى قاتىسىپ كەلە جاتقاندىعى اتاپ ءوتىلدى. اتاپ ايتقاندا, زاڭ ۇستەمدىگى جونىندەگى ەۋروپالىق باستامانىڭ كەزەكتى كەزدەسۋى 2014 جىلى استانادا وتكىزىلۋى ۇسىنىلىپ, وعان بارلىق مۇددەلى تاراپتار قولداۋ ءبىلدىردى.
زاڭنىڭ ۇستەمدىگى جونىندەگى پىكىرتالاس بارىسىندا تەرروريزم, سىبايلاس جەمقورلىق پەن ۇيىمداسقان قىلمىسقا قارسى كۇرەس سالاسىنداعى قۇقىقتىق ىنتىماقتاستىق ماسەلەلەرى تالقىلاندى. وسى ورايدا ە.ىدىرىسوۆ قازاقستاننىڭ قىلمىستىق ءوندىرىس جانە سىبايلاس جەمقورلىقپەن كۇرەس سالاسىندا 6 ماڭىزدى ەۋروپالىق كونۆەنتسياعا قوسىلۋ ماسەلەسىندە قول جەتكىزىلگەن ۋاعدالاستىقتى اتاپ ءوتىپ, بىرىككەن ەۋروپانىڭ بارلىق قۇرىلىمدارىن ۇلتتىق زاڭنامانى شەتەلدىڭ وزىق تاجىريبەسىمەن سايكەستەندىرۋگە باعىتتالعان قازاقستاننىڭ بۇل باستاماسىن قولداۋعا شاقىردى.
ە.ىدىرىسوۆ ەۋرووداقپەن ارىپتەستىكتىڭ باسىم باعىتتارىنىڭ ءبىرى رەتىندە قازاقستانعا يننوۆاتسيا جانە تەحنولوگيالاردى تارتۋ سالاسىنداعى ىنتىماقتاستىق پەن ءبىلىم بەرۋ سالاسىنداعى ءوزارا ارەكەتتەستىكتى انىقتادى. قازاقستاندىق ديپلومات يننوۆاتسيالىق «جاسىل» تەحنولوگيالاردى ورتالىق ازيا وڭىرىنە ترانسفەرتتەۋدى قولداي وتىرىپ, ەو باسشىلىعىن «جاسىل كوپىر» سەرىكتەستىگى باعدارلاماسىنا قوسىلۋعا شاقىردى. بۇدان بولەك, كەزدەسۋدە ورتالىق ازياداعى پروبلەمالار, سونىڭ ىشىندە, اۋعانستاننان حالىقارالىق كونتينگەنتتىڭ شىعارىلۋىنا وراي تۋىنداۋى مۇمكىن ماسەلەلەر, جاڭا جاھاندىق قاۋىپ-قاتەرلەر مەن كەدەيشىلىك پروبلەمالارى, سونداي-اق, ورتالىق ازيا ەلدەرىن دامىتۋعا جاردەمدەسۋ ماسەلەلەرى تالقىلاندى.
مينيسترلەر كەزدەسۋى اياقتالعان سوڭ ە.ىدىرىسوۆ ليتۆا سىرتقى ىستەر ءمينيسترى لينۋس لينكياۆيچيۋسپەن (2013 جىلدىڭ 31 جەلتوقسانىنا دەيىن ليتۆا ەو كەڭەسىنىڭ توراعاسى) جانە ەۋرووداقتى دامىتۋ جونىندەگى كوميسسار اندريس پيبالگسپەن ەكىجاقتى كەلىسسوزدەر وتكىزدى. اتالعان كەزدەسۋلەر بارىسىندا ورتالىق ازياعا جاردەمدەسۋ جونىندەگى ەو باعدارلامالارى, ساياسي جانە ەكونوميكالىق ىنتىماقتاستىقتىڭ ءتۇرلى اسپەكتىلەرى, قازاقستاندىق اۋە كومپانيالارىنىڭ ەۋروپالىق اۋە كەڭىستىگىندە ۇشۋ مۇمكىندىگىن كەڭەيتۋ, سونداي-اق, قازاقستان ازاماتتارى ءۇشىن ۆيزالىق ءتارتىپتى جەڭىلدەتۋ ماسەلەلەرى تالقىلاندى.
«ەگەمەن-اقپارات».