استانانىڭ تەحنيكالىق قىزمەت كورسەتۋ ستانسالارىنىڭ بىرىندە وسىنداي وسپادار وقيعا ورىن الدى. ءوزىنىڭ كەزەك كۇتىپ تۇرا المايتىنىن بىلدىرگەن جاس جىگىت قالتاسىنان قارۋىن شىعارىپ, ونىمەن ستانسا قىزمەتكەرلەرىن نىساناعا الدى. شاماسى, وزدەرىندەگى ءومىر شىندىعىنا ءتىپتى دە سايكەس كەلە بەرمەيتىن جەلىلەرگە تولى شەتەلدىك اتىس-شابىس فيلمدەرىن كوبىرەك كورىپ قويىپ, سودان قاۋاشاعى كادىمگىدەي ۋلانىپ قالسا كەرەك.
استانانىڭ تەحنيكالىق قىزمەت كورسەتۋ ستانسالارىنىڭ بىرىندە وسىنداي وسپادار وقيعا ورىن الدى. ءوزىنىڭ كەزەك كۇتىپ تۇرا المايتىنىن بىلدىرگەن جاس جىگىت قالتاسىنان قارۋىن شىعارىپ, ونىمەن ستانسا قىزمەتكەرلەرىن نىساناعا الدى. شاماسى, وزدەرىندەگى ءومىر شىندىعىنا ءتىپتى دە سايكەس كەلە بەرمەيتىن جەلىلەرگە تولى شەتەلدىك اتىس-شابىس فيلمدەرىن كوبىرەك كورىپ قويىپ, سودان قاۋاشاعى كادىمگىدەي ۋلانىپ قالسا كەرەك.
وسى وقيعاعا بايلانىستى جەدەل جەتكەن جول-پاترۋلدىك پوليتسياسى قىزمەتكەرلەرى 23 جاسار سودىردى تەز قۇرىقتادى. ءتارتىپ ساقشىلارى الدىندا ونىڭ ماناعى جاۋىنگەرلىك-ساربازدىق تۇرقىنان تۇتام دا قالعان جوق.
استانا قالالىق ىشكى ىستەر دەپارتامەنتى ءباسپاسوز قىزمەتىنىڭ مالىمەتىنشە, تەحنيكالىق قىزمەت كورسەتۋ ستانساسىنا كولىگىنىڭ دوڭعالاقتارىن اۋىستىرۋعا كەلگەن جاس جىگىت ءوز كەزەگىن كۇتكىسى كەلمەي, ءبىراز بۇلعالاقتايدى. اقىرىندا سول ءۇشىن ستانسا قىزمەتشىلەرىمەن سوزگە كەلىپ قالادى. وسى جانجالدىڭ ۇستىندە «شەتەلدىك كينولارعا جاستايىنان ەلىگىپ, اۋەيى بولىپ قالعان» اۋلەكى جىگىت قاھارماندىعىن تانىتپاق بولىپ, ءوزى قالتاسىنا كۇندىز-ءتۇنى سالىپ جۇرەتىن تراۆماتيكالىق تاپانشاسىن شىعارىپ, ستانسا قىزمەتكەرلەرىنە قاراي وق اتقان.
وسى اتىستىڭ سالدارىنان 33 جاستاعى ەر ادامنىڭ كەۋدە تۇسىنا وق تيەدى. كەلەسى وق ەكىنشى جۇمىسشىنىڭ جامباسىنا بارىپ قادالادى. اياقاستىنان جاراقات الىپ قالعان ولار شۇعىل جەتكەن «جەدەل جاردەم» ءدارىگەرلەرىنىڭ كومەگىمەن اۋرۋحاناعا جونەلتىلەدى.
قازىر اتالمىش وقيعا بويىنشا قىلمىستىق كودەكستىڭ 257-بابى 3-تارماعى بويىنشا قىلمىستىق ءىس قوزعالعان. ال تراۆماتيكالىق تاپانشا بىردەن ءتاركىلەنىپ الىندى. جەدەل قولعا الىنعان تەرگەۋ شارالارىنىڭ بارىسىندا كۇدىكتىنىڭ وسىعان دەيىن ءدال وسىنداي قىلىعى ءۇشىن قىلمىستىق جاۋاپكەرشىلىككە تارتىلعانى بەلگىلى بولدى.
ۇستالعان ادام استانا قالاسىنىڭ ۋاقىتشا ۇستاۋ وقشاۋلاعىشىنا قامالدى. كەشەدەن باستاپ تەرگەۋ امالدارى ءجۇرىپ جاتىر.
مۇرات ايتقوجا.