تولەنگەن قوسىمشا قۇن سالىعى سومالارىن قايتارۋ تۋرالى اقپارات جالعان. قارجى مينيسترلىگى مەملەكەتتىك كىرىستەر كوميتەتى مۇنداي تولەمدەر تۋرالى اقپاراتتى رەسمي تۇردە جوققا شىعارادى.
الەۋمەتتىك جەلىلەر مەن ۆيدەو حوستينگتەردە «18 جاستان اسقان ءاربىر ازامات تولەمدى الۋعا قۇقىلى» دەگەن بەينەفيلم تارالىپ جاتىر.
اتاپ ايتقاندا, وندا بىرنەشە جىل ىشىندە تولەنگەن ققس سومالارىن قالاي قالپىنا كەلتىرۋ تۋرالى ايتىلادى. الاياقتار ازاماتتاردى اقشانى قايتارۋ ءۇشىن جالعان ۆەب-سايتقا باعىتتايدى. ياعني كەز كەلگەن ادام تولەنبەگەن قاراجاتتى قايتارۋ بويىنشا بىرىڭعاي وتەماقى ورتالىعى ۆەب-سايتىنا كىرۋى كەرەك. جالعان نۇسقاۋلىقتى ءتۇسىندىرۋ كەزىندە اۆتور كورەرمەننەن ءوزىنىڭ دەرەكتەرىن, ونىڭ ىشىندە بانك كارتاسىنىڭ ءنومىرىن, شوتتاعى قاراجاتى يەلەنۋگە مۇمكىندىك بەرەتىن CVV/CVC كودىن كورسەتۋىن سۇرايدى.
بەينە جازبادا نەمەسە جالعان سايتتا وڭ پىكىرلەر بولۋى مۇمكىن. الايدا بۇل جازبالار دا شىندىققا جاناسپايتىنىن ەسكەرتەدى ماماندار.
وسى جىلدىڭ باسىندا قازاقستاندا الاياقتار قۇرىپ, YouTube-تە تاراعان فيشينگتىك ينتەرنەت-رەسۋرس انىقتالعان ەدى.
وسىدان كەيىن KZ-CERT سەرۆيسىنىڭ تالداۋى ناتيجەسىندە «ينتەرنەت سەگمەنتىندەگى فيشينگ/الاياقتىق» دەپ جىكتەلگەن اقپاراتتىق قاۋىپسىزدىك وقيعاسى انىقتالىپ, مۇندا پايدالانۋشىلاردىڭ جەكە دەرەكتەرى مەن بانكتىك كارتالارى تۋرالى مالىمەتتەر جينالدى.
ۆيدەو اۆتورى جاڭا زاڭ جوباسىنا سايكەس, ققس قايتارۋ ءۇردىسى بارلىق ساتىپ الۋلار بويىنشا تارالاتىنىن حابارلادى. بۇل ماقساتتا «تولەنبەگەن قاراجاتتى قايتارۋ ءۇشىن» بىرىڭعاي وتەماقى ورتالىعى قۇرىلدى», دەلىنگەن الاياقتار تاراتقان حابارلامادا.
بۇل ورايدا مەملەكەتتىك كىرىستەر كوميتەتى قازاقستاندىقتاردى ساق بولۋعا جانە كۇماندى اقپاراتقا سەنبەۋگە شاقىرادى.