كوپشىلىكتى الاڭداتىپ وتىرعان كوروناۆيرۋس ىندەتىمەن كۇرەس ءالى تولاستاعان جوق. جامبىل وبلىسىندا دا قايتا اينالىپ سوعۋى مۇمكىن قاۋىپتى ىندەتتىڭ ەكىنشى تولقىنىنا دايىندىق جۇمىسى جالعاسۋدا. ماسەلەن, وڭىردە اۋرۋحانالارداعى توسەكتىك ورىندار, مەديتسينالىق قىزمەتكەرلەر, ءدارى-دارمەكتەر, جابدىقتار جانە جەكە قورعانىس قۇرالدارى سياقتى قاجەتتىلىكتەردىڭ ءبارى دە دايىن ەكەن.
وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, ايماقتا 2 530 توسەكتىك ورىن جاساقتالعان بولسا, ونىڭ ىشىندە 253 توسەكتىك ورىن جان ساقتاۋ بولىمىنە تيەسىلى بولىپ وتىر. بۇگىنگى تاڭدا وڭىردەگى مەديتسينالىق مەكەمەلەردە 253 وكپەنى جاساندى جەلدەتۋ قۇرالى, 706 وتتەگى باللونى, 542 وتتەگى كونتسەنتراتورى, 1 009 يمپۋلستىك وكسيمەتر, 19 تسيفرلى رەنتگەن اپپاراتى, 10 كومپيۋتەرلىك جانە 7 ماگنيتتىك-رەزونانستىق توموگرافتار بار. جۋىردا تاعى دا وبلىسقا 74 وكپەنى جاساندى جەلدەتۋ اپپاراتى, 7 كومپيۋتەرلىك توموگراف, 4 تسيفرلى رەنتگەن اپپاراتى, 4 وتتەگى ستانساسى, سونداي-اق 74 جەدەل جاردەم كولىگى, 8 جىلجىمالى مەديتسينالىق كەشەن جانە 100 كوپفۋنكتسيوندى توسەك جەتكىزىلەدى. سونىمەن قاتار وبلىستىڭ باس دارىگەرى امبۋلاتورلىق دەڭگەيدە دە, ستاتسيونارلىق دەڭگەيدە دە ءدارى-دارمەكتىڭ جەتكىلىكتى قورى بار ەكەنىن جەتكىزدى.
جالپى, جامبىل وبلىسىندا اتالعان جۇمىستارعا 4 410 مەديتسينا قىزمەتكەرىن تارتۋ جوسپارلانىپ وتىر. ونىڭ ىشىندە 882 دارىگەر, 1 764 ورتا بۋىن مەديتسينا قىزمەتكەرلەرى جانە 1 764 كىشى بۋىن مەديتسينا قىزمەتكەرى بار. سونىمەن قاتار وبلىس اكىمدىگى مەن س.اسفەندياروۆ اتىنداعى ۇلتتىق مەديتسينالىق ۋنيۆەرسيتەتىنىڭ اراسىندا جاسالعان ىنتىماقتاستىق تۋرالى مەموراندۋم اياسىندا قوسىمشا 150 مامان تارتىلادى. بۇگىنگى تاڭدا وڭىردە 7 پتر-زەرتحاناسى بار بولسا, جەرگىلىكتى اكىمدىك ودان ءارى زەرتحانالىق زەرتتەۋلەردىڭ تيىمدىلىگىن جانە اتالعان زەرتحانالاردىڭ سانى مەن سىيىمدىلىعىن ارتتىرۋدى جوسپارلاپ وتىر. الايدا وبلىستا كوروناۆيرۋس ىندەتىمەن كۇرەستە دەنساۋلىق ساقتاۋ سالاسى 100 پايىزعا دايىن بولعانىمەن, ءالى دە ءموبيلدى توپتاردىڭ جۇمىسى كوڭىل كونشىتپەي تۇر. وبلىس اكىمى بەردىبەك ساپارباەۆ تا مۇنى سىنعا العان بولاتىن.
شىندىعىندا, كوروناۆيرۋس ينفەكتسياسى قاۋپى ءالى تولىعىمەن جويىلعان جوق. وكىنىشكە قاراي, كوپشىلىك ءالى دە جيىن-توي وتكىزۋدى توقتاتپاي وتىر. ونىڭ بىرقاتارى اشكەرەلەنىپ تە جاتىر. ماسەلەن, قازان ايىندا تاراز قالاسىندا ءموبيلدى توپتار 3 033 نىساندى تەكسەرىپ, كارانتيندىك رەجىمدى بۇزعانى ءۇشىن 18 حاتتاما عانا تولتىرىپتى. سول سياقتى, وڭىردەگى سارىسۋ, مويىنقۇم, مەركى, جۋالى, قورداي اۋداندارىنداعى ءموبيلدى توپتاردىڭ دا جۇمىسى ويداعىداي ەمەس.
قازىرگى تاڭدا مەملەكەت تاراپىنان كارانتين تالاپتارىن قاتاڭ ساقتاۋ تۋرالى كوپشىلىككە ءجيى ەسكەرتىلۋدە. بۇگىندە ينفەكتسيالىق ستاتسيوناردان 4 090 ازامات ساۋىعىپ شىققان. بيىل 4 قاراشاعا دەيىن جامبىل وبلىسىنىڭ اۋماعىندا جالپى كوروناۆيرۋس ىندەتىن جۇقتىرۋدىڭ 4 199 جاعدايى تىركەلىپ, 100 مىڭ تۇرعىنعا شاققاندا اۋرۋشاڭدىق كورسەتكىشى 363,1-ءدى قۇراعان. اتالعان ۋاقىت ارالىعىندا پنەۆمونيانىڭ 137 جاعدايى انىقتالىپتى. وبلىستىق دەنساۋلىق ساقتاۋ باسقارماسىنىڭ مالىمەتىنشە, ولاردىڭ ىشىندە 1 833 ناۋقاس سيمپتومدى, ال 2366 ناۋقاس سيمپتومسىز بولىپ شىققان. قازىرگى تاڭدا ينفەكتسيالىق ستاتسيوناردا 32 ناۋقاس ەم قابىلداۋدا. ونىڭ 21-ءنىڭ جاعدايى ورتاشا بولسا, وكىنىشكە قاراي, 11 ناۋقاستىڭ جاعدايى اۋىر دارەجەدە بولىپ وتىر. بۇگىندە قاۋىپتى ىندەت جۇقتىرعانداردىڭ دەنساۋلىعى ءجىتى نازارعا الىنعان.
ءبىر قۋانارلىعى, جامبىل وبلىسىنىڭ باس مەملەكەتتىك سانيتارلىق دارىگەرى سالتانات اليباەۆانىڭ 5 قاراشاداعى №40 «جامبىل وبلىسى باس مەملەكەتتىك سانيتارلىق دارىگەرىنىڭ قاۋلىسىنا وزگەرىستەر مەن تولىقتىرۋلار ەنگىزۋ تۋرالى» قاۋلىسىنا سايكەس, وبلىس اۋماعىندا كەيبىر كارانتين تالاپتارى جەڭىلدەتىلدى. سونداي-اق كۇشەيتىلگەن سانيتارلىق-دەزينفەكتسيالىق, ماسكالىق جانە الەۋمەتتىك قاشىقتىق تالاپتارىن ساقتاي وتىرىپ, وڭىردەگى تەاترلار مەن مەشىتتەردىڭ جۇمىس ىستەۋىنە رۇقسات ەتىلدى. سونىمەن قاتار الداعى ەكىنشى توقساننان باستاپ, قالالىق جانە اۋىلدىق ايماقتاعى كونتينگەنتى 300 وقۋشىعا دەيىنگى مەكتەپتەر ءداستۇرلى وقۋ فورماتىنا كوشىرىلەتىن بولدى. الايدا ءاربىر سىنىپتارداعى بالالاردىڭ سانى 15-تەن اسپاۋى كەرەك. جالپى ءبىلىم بەرەتىن مەكتەپتەردە 1-5 سىنىپتار, ال حالىقارالىق مەكتەپتەردە 7-سىنىپقا دەيىن كەزەكشى كلاستاردا وقىتۋعا رۇقسات ەتىلگەن.
جامبىل وبلىسى