ءتورت وبلىستا جولاۋشى پويىزدارىنىڭ ءجۇرۋ كەستەسى وزگەردى

كومپانيا كوروناۆيرۋس ينفەكتسياسىنىڭ تارالۋىنا جول بەرمەۋ ماقساتىندا قولدانىلىپ جاتقان شارالاردى اتاپ ءوتتى. قازاقستاندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كومميسسيا شەشىمىنە جانە قر يندۋستريا جانە ينفراقۇرىلىمدىق دامۋ مينيسترلىگىنىڭ حاتىنا سايكەس كەلەسى سقو, اقمولا, قوستاناي جانە پاۆلودار وبلىستارىن قاتىنايتىن جولاۋشى پويىزدارىنىڭ جول ءجۇرۋ جيىلىگى قىسقارادى:

1) 9 قاراشادان باستاپ №705/706 «الماتى-پەتروپاۆل» جولاۋشىلار پويىزى كۇنارا قاتىنايتىن بولسا, №31/32 «پاۆلودار – الماتى» جولاۋشىلار پويىزى بەلگىلەنگەن كۇندەر بويىنشا قاتىنايتىن بولادى.

2) كەلەسى وبلىستاردا بارلىق ستانسالارعا بيلەت ساتۋعا جانە جولاۋشى وتىرعىزۋعا/تۇسىرۋگە ۋاقىتشا تىيىم سالىنادى:

a) اقمولا وبلىسىندا اتباسار, ەرەيمەنتاۋ, ارشالى ستانسالارىنان, 1, 2 جانە 3-سىنىپتى ۆوكزالدار ورنالاسقان بۋراباي, ەسىل, ماكينكا, اقكول, جالتىر جانە كوكشەتاۋ كۋرورتىن قوسپاعاندا;

b) پاۆلودار وبلىسىندا پاۆلودار, ەكىباستۇز, اقسۋ-2 جانە بوزشاكول ستانسالارىن قوسپاعاندا;

c) قوستاناي وبلىسىندا قوستاناي, توبىل, قۇسمۇرىن, ەسىل, ارقالىق جانە جەلەزورۋدنايا ستانسالارىن قوسپاعاندا;

d) سولتۇستىك قازاقستان وبلىسىندا بارلىق ستانسالار ارقىلى جولاۋشىلاردى وتىرعىزۋعا/تۇسىرۋگە ترانزيتتىك جولاۋشى پويىزدارىنىڭ قوزعالىسىنا تىيىم سالىنادى.

سونىمەن قاتار, № 68/67 «نۇر-سۇلتان نۇرلى جول - وسكەمەن-1» جولاۋشى پويىزىنىڭ اپتاسىنا ءبىر رەت جول ءجۇرۋ مەرزىمدىلىگى جانە № 351/352 «الماتى-2 - وسكەمەن-1» جولاۋشىلار پويىزىنىڭ اعىمداعى جىلدىڭ سوڭىنا دەيىن ۋاقىتشا كۇنارا قاتىناۋى ۇزارتىلدى. پەتروپاۆل ستانساسىنان جولاۋشى تاسىمالىنىڭ پويىزىمەن شىعۋ 3 تاۋلىككە جارامدى تەرىس ناتيجەلى COVID-19 پتر تەستىلەۋدەن وتكەنى تۋرالى انىقتاما مىندەتتى تۇردە بولۋى قاجەت. پتر انىقتاماسى جوق جولاۋشى ۆاگونعا جىبەرىلمەيدى, سونداي-اق تەمىرجول ۆوكزالى عيماراتىندا كۇتىپ الۋشى مەن شىعارىپ سالۋشىعا كىرۋگە تىيىم سالىنادى. پەتروپاۆلدان جولاۋشى پويىزدارىندا قوعامدىق تاماقتانۋ وبەكتىلەرىنىڭ قىزمەتىن ۇيىمداستىرۋ كولىكتەگى باس مەملەكەتتىك سانيتارلىق دارىگەردىڭ قاۋلىسىنىڭ تالاپتارىنا سايكەس قامتاماسىز ەتىلەدى.

توقتاتىلعان پويىز بەن تىيىم سالىنعان ستانسالارعا جول ءجۇرۋ قۇجاتىن (بيلەت) رەسىمدەگەندە, سونداي-اق بيلەتى بار جولاۋشىنىڭ پتر انىقتاماسى بولماعاندا بيلەتىن قايتارىپ بەرەدى, ونىڭ اقشاسىن تولىق كولەمدە قايتارىپ الادى. بيلەتى قايتارۋ جولاۋشى تاسىمالداۋ ەرەجەسىندە كوزدەلگەن مەرزىمدە بيلەتتە كورسەتىلگەن ستانسادان پويىز جونەلتىلگەن ساتتەن باستاپ 1 ساعاتتان كەشىكتىرىلمەي جۇرگىزىلەدى. تولەمدى قايتارۋ بيلەتتى قايتارۋ ءتارتىبى مەن ساتىپ الۋ تاسىلىنە قاراي قولما-قول جانە قولما-قول اقشاسىز ەسەپ ايىرىسۋ ارقىلى جۇرگىزىلەدى. جولاۋشىلار پويىزدارىنىڭ قوزعالىس كەستەسى بويىنشا بارلىق اقپاراتتى «105» ءنومىرى ارقىلى بىلۋگە بولادى.