قازاقستان مەن ۋكراينا كينوگەرلەرى سەرىكتەستىك ورناتۋ مۇمكىندىكتەرىن تالقىلايدى

شارانى قازاقستانننىڭ ۇلتتىق كينونى قولداۋ مەملەكەتتىك ورتالىعى, ودەسسا حالىقارالىق كينوفەستيۆالى جانە DzygaMDB ونلاين پلاتفورماسى ۇيىمداستىرعان.

دوڭگەلەك ۇستەل جۇمىسىنا قازاقستان مەن ۋكراينانىڭ جەتەكشى پروديۋسەرلەرى مەن كينو قايراتكەرلەرى قاتىسادى. ودەسسا حالىقارالىق كينوفەستيۆالىنىڭ باس پروديۋسەرى, ۋكراينا كينواكادەمياسىنىڭ باقىلاۋ كەڭەسىنىڭ مۇشەسى يۋليا سينكەۆيچ پەن باسقارما توراعاسىنىڭ كەڭەسشىسى, قازاقستاننىڭ ۇلتتىق كينونى قولداۋ مەملەكەتتىك ورتالىعىنىڭ حالىقارالىق ستراتەگيا بويىنشا كۋراتورى اننا كاچكو بولاشاقتاعى حالىقارالىق سەرىكتەستىككە جول اشاتىن كينويندۋستريا سالاسىنداعى ءار ەلدىڭ مۇمكىندىكتەرىن تانىستىراتىن بولادى. 

سونداي-اق, دوڭگەلەك ۇستەل شەڭبەرىندە, التى جوبانىڭ اۆتورلارى (ۇشەۋى ۋكراينادان جانە ۇشەۋى قازاقستاننان) ەكى ەل بىرلەسىپ شىعارۋى ءۇشىن ءوز يدەيالارىن ۇسىنا الادى. قاتىسۋعا ءوتىنىم 16 قاراشاعا دەيىن قابىلدانادى. ءوتىنىم بەرۋ ۇشىن سىلتەمەدەگى فورمانى تولتىرۋ قاجەت.  

جوبالار ۇيىمداستىرۋ كوميتەتىمەن ىرىكتەلىپ, قورىتىندىسى 20 قاراشادا ايتىلادى. دوڭگەلەك ۇستەلدەن كەيىن جوبالار كاتالوگقا جيناقتالىپ, بارلىق قاتىسۋشىلارعا جىبەرىلەدى, سونىمەن قاتار,  DzygaMDB پلاتفورماسىندا جانە ۇكقمو سايتىندا جاريالاناتىن بولادى.

"ۋكراينانىڭ كينو سالاسى بۇگىندە قارقىندى دامۋدا, سوڭعى جىلدارى يندۋستريانى ىلگەرىلەتۋگە كومەكتەسەتىن جانە باسقا ەلدەرمەن بىرلەسكەن ءوندىرىستى ىنتالاندىراتىن بىرقاتار ۇيىمدار مەن مەحانيزمدەر پايدا بولدى. قازاقستاندا 2019 جىلى "كينەماتوگرافيا تۋرالى" زاڭنىڭ قابىلدانۋىنا, ريبەيت جۇيەسىنىڭ جانە حالىقارالىق بىرلەسكەن ونىمدەرگە ارنالعان قوسىمشا مۇمكىندىكتەردىڭ ەنگىزىلۋىنە بايلانىستى,  سەرىكتەستىك ورناتۋعا دەگەن ۇلكەن قىزىعۋشىلىق بار. مەنىڭ ويىمشا, قازاقستاندىق جانە ۋكراينالىق كينو قايراتكەرلەرىنىڭ اراسىندا قارىم-قاتىناس ورناتۋعا جانە جۇمىس الاڭىن قۇرۋعا قازىر جاقسى كەزەڭ. ءبىزدىڭ ەلدەردى كوپ نارسە بىرىكتىرەدى جانە جاقىن ارادا بىرلەسكەن كينوجوبالار دا پايدا بولادى دەپ ۇمىتتەنەمىن", دەيدى ۇكقمو باسقارما توراعاسىنىڭ كەڭەسشىسى  اننا كاچكو.