كەشە قازاقستان پارلامەنتى سەناتىنىڭ توراعاسى, ەقىۇ پارلامەنتتىك اسسامبلەياسىنىڭ ۆيتسە-پرەزيدەنتى قاسىم-جومارت توقاەۆ قازاقستان-فرانتسيا ينۆەستيتسيالىق جانە ساۋدا-ەكونوميكالىق ىنتىماقتاستىعىن ودان ءارى كەڭەيتۋ مۇمكىندىكتەرىن زەردەلەۋ ماقساتىندا استاناعا كەلگەن فرانتسيا سەناتى جانىنداعى قارجى كوميتەتىنىڭ باسشىسى جان ارتيۋس باستاعان فرانتسيا سەناتى دەلەگاتسياسىن قابىلدادى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋ بارىسىندا ق.توقاەۆ ەلىمىزدىڭ ەۋروپاداعى جەتەكشى ارىپتەسى رەتىندە قاراستىرىلاتىن فرانتسيامەن قاتىناسىنىڭ قارقىندى دامۋىن اتاپ ءوتىپ, جوعارى دەڭگەيدەگى قازاقستان-فرانتسيا بايلانىستارىنىڭ قورىتىندىلارىن جوعارى باعالادى. ول, سونىمەن قاتار, فرانتسيا تاراپىنا قازاقستاننىڭ ەقىۇ توراعالىق ەتۋ جولى مەن ۇستىمىزدەگى جىلى ۇيىمنىڭ ءسامميتىن وتكىزۋگە قاتىستى قازاقستاندىق باستامانى قولداۋلارى ءۇشىن العىس ءبىلدىردى.
فرانتسيا پارلامەنتتىك دەلەگاتسياسىنىڭ باسشىسى جان ارتيۋس ءوز كەزەگىندە ەلىمىزدىڭ الەۋمەتتىك-ەكونوميكالىق جەتىستىكتەرى مەن حالىقارالىق ارەناداعى قازاقستان جانە ونىڭ ليدەرىنىڭ جەتەكشى ءرولىن جوعارى باعالاپ, قازاقستاننىڭ ەقىۇ-عا توراعالىعى جەمىستى بولاتىندىعىنا نىق سەنىم ءبىلدىردى.
بىرقاتار حالىقارالىق ماسەلەلەر توڭىرەگىندە مۇددەلى پىكىر الماسۋلار بولدى. قازاقستان سەناتىنىڭ باسشىسى قىرعىزستاندا قالىپتاسقان كۇردەلى جاعدايعا الاڭداۋشىلىق ءبىلدىرىپ, الەمدەگى جەتەكشى ەلدەر كوشباسشىلارى مەن حالىقارالىق ۇيىمداردىڭ باسشىلارى وسى ەلدە قالىپتاسقان جاعدايدى رەتتەۋ ءۇمىتىن تاجىريبەلى ءارى بەدەلدى ساياساتكەر رەتىندە قازاقستان پرەزيدەنتى ن.نازارباەۆتىڭ اتىمەن بايلانىستىرىپ وتىرعاندارىن جەتكىزدى.
ول سونداي-اق ەقىۇ تاراپىنان جۇزەگە اسىرىلىپ جاتقان شارالار تۋرالى ايتا كەلىپ, ۇيىمنىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ قىرعىزستانعا ءوز وكىلىن, پارلامەنت ءماجىلىسى ءتوراعاسىنىڭ ورىنباسارى جانىبەك كارىبجانوۆتى جىبەرگەندىگىن جانە ول ميسسيانىڭ جەمىستى بولاتىندىعىنا سەنىمىن ءبىلدىردى.
يران ماسەلەسىنە توقتالا كەلىپ, ق.توقاەۆ احۋالدىڭ ءالى دە تولىق شەشىم تاپپاي وتىرعاندىعىن ءمالىمدەدى جانە قازاقستان باسشىسى ن.نازارباەۆتىڭ ۆاشينگتونداعى جاھاندىق سامميتتە “اتوم ەنەرگياسىن بەيبىت ماقساتتا پايدالانۋ جانە ونى دامىتۋعا قاتىستى ماگاتە-ءنىڭ تالاپتارىن تولىقتاي ورىنداۋ نەگىزىندە بارلىق مەملەكەتتەردىڭ زاڭدى ءارى اجىراماس قۇقىقتارى بار”, دەگەن پىكىرىن جەتكىزدى. ول سونداي-اق اتالعان ماسەلەنى كۇش قولدانۋ ارقىلى شەشۋگە بولمايتىندىعىن اتاپ كورسەتتى.
كەزدەسۋ سوڭىندا ق.توقاەۆ فرانتسيا پارلامەنتشىلەرىنە تاياۋدا الماتىدا وتەتىن پارلامەنتشىلەردىڭ ترانسازيالىق جيىنىنا بەلسەندى قاتىسۋ نيەتى ءۇشىن ريزاشىلىعىن ءبىلدىردى.