"اشىق بيۋدجەت" جوباسى قارجى ۇنەمدەيدى

بۇل جونىندە قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگى باتىس قازاقستان وبلىستىق دەپارتامەنتى پرەۆەنتسيا جانە پاراساتتىلىق باسقارماسىنىڭ باسشىسى ءبىرجان حايرۋللين حابارلادى.

"حالىق ۇنىنە قۇلاق اساتىن مەملەكەت" تۇجىرىمداماسىن قالىپتاستىرۋ جانە دامىتۋ جولىندا مەملەكەتتىك ورگاندار مەن ازاماتتىق قوعامنىڭ كۇش-جىگەرىن بىرىكتىرۋ وتە ماڭىزدى", دەيدى باسقارما باسشىسى.

بيىل قىركۇيەك ايىندا قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى, نيدەرلاند كورولدىگىنىڭ قازاقستان رەسپۋبليكاسىنداعى ەلشىلىگى, "قازاقستانداعى پارلامەنتاريزمدى دامىتۋ قورى" قوعامدىق قورى جانە "تالاپ" قولدانبالى زەرتتەۋلەر ورتالىعى 2020-2021 جىلدارعا ارنالعان "اشىق بيۋدجەت" جوباسىنىڭ جارعىسى بەكىتىلگەن بولاتىن.

وسى ورايدا "اشىق بيۋدجەتتەردىڭ" ينتەراكتيۆتى كارتاسى www.publicbudget.kz ەلەكتروندىق جۇيەسى بيۋدجەت قاراجاتىنىڭ ءتيىمدى جۇمسالۋىنا قوعامدىق مونيتورينگ جۇرگىزۋ ءۇشىن قولايلى قۇرال بولعان.

ماسەلەن قازىر "اشىق بيۋدجەتتەردىڭ" ينتەراكتيۆتى كارتاسىندا باتىس قازاقستان وبلىسىنداعى 1030 مەملەكەتتىك مەكەمەنىڭ بيۋدجەتى جاريالانعان.

بۇل بيۋدجەت قۇجاتتارىن سىبايلاس جەمقورلىققا قارسى دەپارتامەنت قىزمەتكەرلەرى زەردەلەپ, قاراپ وتىرادى. مونيتورينگ بارىسىندا ساتىپ الىناتىن تاۋار باعالارى قاداعالانادى.

"شىڭعىرلاۋ اۋداندىق مادەنيەت, تىلدەردى دامىتۋ جانە دەنە شىنىقتىرۋ ءبولىمى قاراشا ايىندا كەڭسەلىك قاعاز ساتىپ الۋ ءۇشىن 164 300 تەڭگە قاراستىرعان ەكەن. اتاپ ايتقاندا اۋداندىق ءبولىم 106 بۋما كەڭسەلىك قاعازدىڭ ءاربۋماسىن 1550 تەڭگەگە ساتىپ الۋدى جوسپارلاعان. وڭىردەگى قاعازدىڭ كوتەرمە باعاسى زەردەلەنگەن سوڭ, بيۋدجەت جوسپارىنا وزگەرىس ەنگىزىلدى. قاعازدىڭ 1 بۋماسىنىڭ باعاسى 1 071 تەڭگە دەپ بەلگىلەندى. ساتىپ الىناتىن تاۋار سانى دا 106-دان 100-گە ازايتىلىپ, ناتيجەسىندە 57 200 تەڭگە بيۋدجەت قاراجاتى ۇنەمدەلدى", دەلىنگەن دەپارتامەنت تاراتقان ءباسپاسوز پاراعىندا.

بۇگىندە كەز كەلگەن ادام www.publicbudget.kz سايتىنان ءوزىن قىزىقتىرعان مەملەكەتتىك ورگان نەمەسە ۇيىمنىڭ بيۋدجەت قاراجاتىن ءبولۋى, ونى يگەرۋى تۋرالى مالىمەتپەن تانىسا الادى.

باتىس قازاقستان