وتكەن دەمالىس كۇندەرى "استانا بالەت" تەاترىندا حورەوگراف ريكاردو امارانتە مەن دەۆيد دجوناتاننىڭ ەكى جاڭا سپەكتاكلى كورسەتىلدى. پرەمەرانىڭ ەكى كۇنىنە دە بيلەتتەر الدىن-الا ساتىلىپ, ھاس ونەرگە سۋساپ قالعان استانالىق كورەرمەن ارتىستەرگە قوشەمەتى مەن زور ىقىلاسىن ءبىلدىردى.
كەش شىمىلدىعىن ريكاردو امارانتەنىڭ "Longing" ("قۇشتارلىق") ءبىر اكتىلى بالەتى اشتى. كورەرمەن نازارىنا ادامداردىڭ قارىم-قاتىناسى جايلى وي تولعايتىن بالەتتىڭ الەمدىك پرەمەراسى ۇسىنىلدى; بۇل الىمساقتان مازالاپ جاتقان سۇراقتاردىڭ جاۋابىن زاماناۋي حورەوگرافيا ءتىلىنىڭ كومەگىمەن ىزدەۋ تالپىنىسى: شىن مانىندە, ماحابباتتان نە قالايمىز, نەلىكتەن ادامدار جان ەمەس, تانگە اۋەس؟
ۇزاق ۇزىلىستەن كەيىن كورەرمەن قاۋىم فارحاد بوريەۆا, ايجان مۇقاتوۆا, سۇندەت سۇلتانوۆ, يليا ماناەنكوۆ جانە "استانا بالەت" تەاترىنىڭ وزگە دە سوليستتەرىن ءوز كوزىمەن كورە الدى.
"ريكاردونىڭ ءستيلىن ءبىز تولىق مەڭگەرىپ الدىق: ونىڭ بالەتتەرىن قالاي بيلەۋ كەرەگىن دەنە-ءبىتىمىمىز ۇمىتقان جوق, سول سەبەپتى, حورەوگرافيانىڭ ءوزى قيىنعا سوقپادى. رەپەتيتسيا جىل باسىندا ءوتىپ, كوكتەمدە پرەمەراسى ءوتۋى ءتيىس ەدى, بىراق, كارانتين جاريالانعاندىقتان, پرەمەرا كۇنى شەگەرىلدى. ساحناعا قايتا ورالىپ, كورەرمەندى كورۋ, ونىڭ ەنەرگەتيكاسىن سەزىنۋ ەرەكشە قۋانىش سىيلايدى. مەنىڭ ويىمشا, وسى پرەمەرالاردان كەيىن ارتىستەردىڭ ءبارى باقىتقا بولەنگەن شىعار", - دەگەن ويىمەن ءبولىستى فارحاد بوريەۆ.
ريكاردو امارانتەنىڭ ايتۋىنشا, وزگە تۋىندىلارىنداعىداي, وسى قويىلىمنىڭ دا كوركەمدىك بەزەندىرىلۋىندە مينيماليزم باسىم. جارىقتى ويناتا وتىرىپ, بالەتمەيستەر مەن جارىق ديزاينەرى روبەرت داۋتوۆ ساحناداعى ارەكەتتى تاماشالاپ وتىرعان كورەرمەندى ءتۇس كورگەندەي اسەردە قالدىردى.
كوستيۋم سۋرەتشىسىنىڭ ايتۋىنشا, بالەتتەگى ءار بەينە كومەك كورسەتىپ, جول سىلتەيتىن سەكىلدى. "اق ءتۇس – ساحناداعى ارەكەتتىڭ ءتۇس ەكەنىن مەڭزەيدى. مۇندا وعان پەرىشتە بەينەسىندەگى ءمىنسىز تۇلعا ەلەستەيدى; قارا ءتۇس شىنايى ءومىردى بىلدىرەدى, ال, ءۇشىنشى بولىمدە, ارتىستەر ادام ءتانى تۇستەس كيىم كيىپ شىعىپ, جالاڭاش تۇرعانداي اسەر قالدىرعاندا, بۇل - ماتەريالدىق الەمنەن ادا ادام جانىنىڭ اللەگورياسى. بۇل بولىمدە ادامدار جاندارمەن كەزدەسەدى", - دەيدى پاۋلا روزا سانتانا.
"Longing", شاقىرىلعان حورەوگراف ريكاردو امارانتەنىڭ "استانا بالەت" تەاترىنا ارناپ قويعان ونىنشى بالەتى. وسى تۋىندىسىمەن بالەتمەيستەر ەلوردالىق تەاترداعى جۇمىسىن ءتامامدايدى.
ەكىنشى بولىمدە كورەرمەن نازارىنا «Instinct» («ينستينكت») ءبىر اكتىلى بالەتى ۇسىنىلدى. استانالىق كورەرمەن "استانا بالەت" تەاترىنىڭ جەتەكشى ءسوليستى دەۆيد دجوناتاننىڭ قويۋشى-حورەوگراف رەتىندەگى ەڭبەگىمەن العاش تانىستى. "ماعان وسىنشالىقتى سەنىم ارتقانى مەن ءۇشىن زور مارتەبە. بۇل تەاتردىڭ ارتىستەرى عالامات. ولار مەنىڭ ءستيلىمدى, قيمىلدارىمدى جىلدام ۇيرەندى. بۇعان العىسىم شەكسىز, سەبەبى, دايىندالۋعا ۋاقىتىمىز وتە از ەدى", - دەپ اتاپ ءوتتى حورەوگراف.
وسى ابستراكتسيالى بالەتتە حورەوگراف جاقىن ادامىڭنان جىراقتا قالۋ تاقىرىبىن قوزعايدى. قازىرگى پاندەميا مەن شەكارانىڭ جابىلعان تۇسىندا بۇل وتە وزەكتى تاقىرىپقا اينالدى. مۇندا مۋزىكا مەن پلاستيكا تۇتاسا وتىرىپ, كەزدەسۋگە اسىق جانداردىڭ ىشكى كۇيىنىشىن سۋرەتتەيدى.
"بالەتتە مەن بىرنەشە كومپوزيتوردىڭ مۋزىكاسىن قولداندىم. سولاردىڭ ءبىرى جاك لۋسە – باح پەن دجاز اۋەندەرىنەن ميكس جاساعان. ونىڭ مۋزىكاسىن العاش ەستىگەندە-اق, وسى سازعا بالەت قويامىن دەپ شەشتىم. مۇندا زاماناۋي اۋەز باسىم. كەيدە بارابان ويناپ, كەيىن, سەزىمتال دجاز اۋەنى اۋەلەيدى", - دەدى حورەوگراف دەۆيد دجوناتان.
كورەرمەن قاۋىم ورىنداۋشىلاردىڭ ءمىنسىز تەحنيكاسىن, بالەتتەردىڭ مۋزىكالىق شەشىمىن, تەرەڭ ويلاستىرىلعان دەتالدارعا, كوستيۋمدەر جانە جارىقپەن بەزەندىرۋگە ەرەكشە نازار اۋداردى. "ەكى قويىلىم دا ەرەكشە كۇيگە بولەپ, ۇمىتىلماس اسەر قالدىردى. مەن مۋزىكاعا ءتانتى بولدىم, جارىقتى ويناتقاندارى عاجاپ. ساحناداعى كورىنىس ەرەكشە بولدى. حورەوگرافيا وتە عالامات, مۇندا الاي-دۇلەي سەزىم, قۇشتارلىق پەن ەموتسيانىڭ شيرىعۋىن تۇيسىندىك", - دەگەن ويىمەن ءبولىستى ايشا تولەبەرگەنوۆا ەسىمدى كورەرمەن.
ايتا كەتەيىك, 6 جانە 7 قاراشادا "استانا بالەت" تەاترىنىڭ ساحناسىندا تاعى ءبىر پرەمەرا وتەدى. حورەوگراف انۆارا سادىقوۆا قويعان "جەلتوراڭعى تۋرالى اڭىز" ءبىر اكتىلى بالەتىندە ادامداردىڭ تابيعاتقا قول سۇعۋى جايلى تاقىرىپ كوتەرىلەدى. وسى كۇنى مۇنىڭ سالدارىنىڭ كەسەلدى زاردابىن سەزىنىپ كەلەمىز.