ءبىلىم الۋعا ۇمتىلعان وقۋشىلاردى قولداۋشىلار كوپ. سولاردىڭ قاتارىندا حالىقارالىق «MINIBOSS» بيزنەس-مەكتەبى دە بار. جاقىندا اتىراۋداعى نازارباەۆ زياتكەرلىك مەكتەبىنىڭ بەس وقۋشىسى اتالعان مەكتەپتىڭ ءبىلىم گرانتىنا يە بولدى.
كاسىپكەرلىكتىڭ الىپپەسىن تەرەڭىرەك تانىتۋدى ماقسات ەتكەن وقۋ ورنىندا نازارباەۆ زياتكەرلىك مەكتەبىنىڭ وقۋشىلارى ءبىر جىل تەگىن ءبىلىم الادى. دارىندى بالالاردىڭ بيزنەس-جوباسىن دايىنداۋعا قازاقستان مەن ۇلىبريتانيانىڭ وسى سالاداعى جەتەكشى ماماندارى قولداۋ كورسەتۋدى كوزدەپ وتىر.
– سوڭعى ءۇش جىل بويى «MINIBOSS» قازاقستانداعى جاستاردىڭ كاسىپكەرلىك الەۋەتىن ارتتىرۋدى قولعا الدى. ال اتىراۋدا بيىل جۇمىسىن باستاعان مەكتەپ وڭىردەگى جاس ونەرتاپقىشتاردىڭ باستاماسىن قولداۋعا نيەت ءبىلدىردى. حالىقارالىق بيزنەس-مەكتەپتىڭ قولداۋىنا العاشقىلاردىڭ قاتارىندا يە بولعان نازارباەۆ زياتكەرلىك مەكتەبىنىڭ بەس وقۋشىسى – ءبىلىم ۇياسىنداعى كونكۋرستاردا كوزگە تۇسكەن, الەۋمەتتىك قولداۋدى قاجەت ەتەتىن وتباسىنىڭ بالالارى, – دەيدى بيزنەس-مەكتەپتىڭ ديرەكتورى ليليانا حەگاي.
ونىڭ ايتۋىنشا, اتالعان وقۋ ورنىن ەۋروپالىق بيزنەستى دامىتۋ قاۋىمداستىعى قارجىلاندىرادى. قازىر زياتكەرلىك مەكتەپتىڭ بەس وقۋشىسىنا 7500 ەۋرو كولەمىندەگى ءبىلىم گرانتى ءبولىندى. وقۋشىلار تەوريالىق ءبىلىمدى ءتۇرلى ويىندار, تاجىريبەلەر نەگىزىندە مەڭگەرەدى. كەيىن وزدەرىنىڭ جوباسىن ينۆەستورلار الدىندا قورعايدى. وقۋشىلار ۇسىنعان يدەيا ءساتتى بولسا, كەيىن ۇلتتىق چەمپيوناتتا باق سىنايدى. سونداي-اق جوبانى ءارى قاراي قارجىلاندىرۋ جولى قاراستىرىلاتىنى بەلگىلى بولدى.
– ماقساتىمىز – الەمنىڭ 15 ەلىنەن بيزنەستەگى جاستاردىڭ باس قوساتىن اقتىق سايىسىنا جولداما الۋ. وعان قاتىسۋ ءۇشىن تىنىمسىز ەڭبەكتەنۋ كەرەك. قازىر وقۋشىلار ءوز جوباسىن دايىنداۋدى باستادى, – دەيدى حالىقارالىق «MINIBOSS» بيزنەس-مەكتەبىنىڭ ديرەكتورى ليليانا حەگاي.
اتىراۋ وبلىسى