باتىر قىز باۋىرلارىن ورتتەن قۇتقاردى

ءورت ءتۇن ورتاسىندا باستالعان. ونى ءجاسوسپىرىم قىز بالا ءبىرىنشى بايقاعان. تۇرا سالا ءوزى جاتقان بولمەنىڭ تەرەزەسىن سىندىرىپ, 5, 6 جانە 9 جاستاعى باۋىرلارىن بىرىنەن سوڭ ءبىرىن سىرتقا الىپ شىققان. باسقا بولمەدە جاتقان شەشەسىن قويۋ ءتۇتىن اراسىنان تابا الماپتى. كەيىن ءورت سوندىرۋشىلەر 37 جاستاعى كەلىنشەكتى قولىنا تەلەفون تۇتقاسىن ۇستاعان كۇيىندە سىرتقى ەسىكتىڭ الدىنان تاۋىپتى.

– شارافۋتدينوۆ كوشەسىندەگى №5/2 ءۇيدىڭ جانىپ جاتقانى جونىندە حابار جانىبەك اۋداندىق ءورت ءسوندىرۋ قىزمەتى كەزەكشى-ديسپەتچەرلىك ءبولىمىنىڭ پۋلتىنە 27 قازان كۇنى ساعات 02.12-دە ءتۇس­تى. ءورت سوندىرۋشىلەر ەكى پا­تەرلى ءۇيدىڭ ەكىنشى بولىگىن قى­زىل جالىننان ساقتاپ قالدى. ال­دىن الا بولجام بويىنشا ءورت ەلەكتر جابدىعىن پايدالانۋ كەزىندە قاۋىپسىزدىك ەرەجەسىن ساقتاماۋدان شىققان بولۋى مۇم­كىن, – دەيدى باتىس قازاقستان وب­لىستىق توتەنشە جاعدايلار دەپارتامەنتىنىڭ باستىعى گەنەرال-مايور جاسۇلان جۇماشەۆ.

ءتورت ساعات ىشىندە ءورت تولىق ءسوندىرىلدى. ءورت سوندىرۋگە 7 قىز­مەتكەر, 2 ارنايى كولىك قاتىسقان.

وكىنىشتىسى, بالالاردىڭ اناسى, 1983 جىلى تۋعان ايدا تو­لەۋوۆا تۇتىنگە قاتتى ۋلانىپ قال­عان ەكەن. اۋرۋحاناعا جەدەل جەتكىزىلگەنىمەن, ەسىن جيماستان قايتىس بولعان. وتاعاسى جول قۇرىلىسىندا «كاماز» جۇك كو­لىگىن جۇرگىزەدى, وقيعا كەزىندە جۇ­مىستا بولعان.

باتىس قازاقستان وبلىستىق توتەنشە جاعدايلار دەپارتامەنتى ءجاسوسپىرىم قىزدىڭ جانقيارلىق ەرلىگىن مەملەكەتتىك ناگراداعا ۇسىنامىز دەپ وتىر.

باتىس قازاقستان وبلىسى