يگى ءىستىڭ جولىنداعى ەرىكتىلەردىڭ اراسىندا ءجۇرىپ-تۇرۋى قيىن, سويتە تۇرا بايراقتى باسەكەلەردە ەلىمىزدىڭ نامىسىن قورعاپ جۇرگەن مۇگەدەك جانداردىڭ كومەكشىلەرىنە اينالعانى از ەمەس. اتاۋلى جىلدا ءدايىم جاقسىلىققا ۇمتىلاتىن وڭىردەگى ۆولونتەرلىك توپتاردىڭ سانى دا ەداۋىر ارتقانى كوپ نارسەنى اڭعارتسا كەرەك.
كومەك تەك قارجىلاي بولمايدى...
قازاقستاننىڭ ەڭبەك ەرى قۇرالاي بايمەنوۆانىڭ باستاماسىمەن اشىلعان «د.ا.ر.» ۆولونتەرلەر كلۋبىن بىلمەيتىن اقتوبەلىكتەر كەمدە-كەم. 2007 جىلدان بەرى دوستىق, ادالدىق, راقىمشىلىقتى تۋ ەتىپ كەلە جاتقان بەلسەندىلەردى ءسوز ەتكەندە سوڭعى ۋاقىتتا «سپورتيكي» توبى دا ەرىكسىز ويعا كەلەدى. ويتكەنى سوڭعىسى – «د.ا.ر.» ەرىكتىلەر كلۋبىنىڭ جانىنان قۇرىلعان. ءبىر عانا باعىتتى قامتيتىن ۇيىم سپورتپەن كاسىبي تۇردە اينالىساتىن مۇگەدەك جانداردىڭ ءجۇرىپ-تۇرۋىنا, جاتتىعۋ جاساۋىنا, وزگە دە قاجەتتى امال-ارەكەتىنە كومەككە كەلەدى. ياعني مۇنداعى ۆولونتەرلەر نەگىزىنەن ءىرىلى-ۇساقتى جارىستارعا جۇمىلدىرىلادى.
– پاراليمپيادالىق ويىندارعا, وزگە دە ارناۋلى سايىستارعا قاتىسۋ ءۇشىن بىزگە كومەكشىلەر قاجەت-اق. سول ماقساتتا وتكەن جىلدىڭ كۇز مەزگىلىندە ءبىر توپ جاستى ارنايى وقىتىپ, مۇنىڭ بارلىق جاي-جاپسارىن ۇيرەتتىك. قازىرگى تاڭدا كلۋبىمىزدا 35 ەرىكتى بار. ولار مۇمكىندىگى شەكتەۋلى جاندار اراسىندا وتەتىن جارىستارعا قولعابىس تانىتىپ تا ۇلگەردى, – دەيدى «سپورتيكي» ەرىكتىلەر كلۋبىنىڭ ۇيلەستىرۋشىسى گۇلميرام سراجوۆا.
وڭىردە اتالعان توپتاعى ادامدار اراسىندا سپورتپەن كاسىبي تۇردە شۇعىلداناتىنداردىڭ سانى 60-تان اسادى. سولارعا جانە اقتوبەدە ۇيىمداستىرىلعان جارىستارعا قاتىسۋعا كەلگەن وزگە ازاماتتارعا قولعانات بولاتىنداردىڭ ءبىرى, جوعارىدا اتالعان كلۋبتىڭ مۇشەسى – جىگەر كەنجەعاليەۆ. 25 جاستاعى جىگىت 5 جىلدان بەرى ۆولونتەر ەكەن.
– «د.ا.ر.», «جەڭىس» ەرىكتىلەر توبىندا بولدىم. بىلتىردان بەرى «سپورتيكي» كلۋبىنىڭ مۇشەسىمىن. ماماندىعىم – ديزاينەر. جۇمىستان تىس ۋاقىتتا وسىنداي ساۋاپتى ىسپەن اينالىسقاندى ءجون كورەمىن. وتكەن جىلى وبلىستا «ۇزدىك ۆولونتەر» اتاندىم. جاقسىلىق جاساۋ ءار ادامنىڭ پارىزى دەپ بىلەمىن. قولدان كەلسە, نەگە كومەكتەسپەسكە؟! جاناسىل حاميدۋللا, دامير بيجانوۆ, داۋرەن سادۋاقاس, مەرەي سمادياروۆ سىندى جىگىتتەرمەن الەۋمەتتىك جوبالارعا دا قاتىستىق. قازىرگى تاڭدا مۇمكىندىگى شەكتەۋلى ادامداردىڭ حالىقارالىق, رەسپۋبليكالىق, وبلىستىق دەڭگەيدەگى جارىستارعا دايىندالۋىنا كومەكتەسەمىز. ۆولونتەرلىكتىڭ بۇل ءتۇرى شەتەلدە وتە جاقسى دامىعان. بىزدە دە بىرتىندەپ قارقىن الىپ كەلەدى, – دەيدى جىگەر.
كەيدە ءسوز جاردەمىنىڭ ءوزى ۇلكەن ءرول اتقاراتىنىن ايتقان اڭگىمەلەسۋشىمىز زامانداستارىنىڭ وسىنداي يگى ىسكە جاقىن بولعانىن, ەلىمىزدە ۆولونتەرلەر قىزمەتىنىڭ ودان سايىن جاندانا تۇسكەنىن تىلەيدى.
«ۆولونتەرلەردىڭ دە ەڭبەگىن باعالاعان ابزال»
I توپتاعى مۇگەدەك بولعانىنا قاراماستان, كاسىبىن دوڭگەلەنتىپ, ۇلكەن سپورتپەن دە اينالىسىپ جۇرگەن شاحان جولداسباەۆتىڭ ۆولونتەرلەرگە دەگەن قۇرمەتى الابوتەن. وسى سالاداعى ءبىرتالاي جاقسى جىگىتتەرمەن, قىزدارمەن ارالاساتىن ول ەلىمىزدەگى ۆولونتەرلەر قوزعالىسىنا قامقورلىقتىڭ ءالى كەمشىن ەكەنىن ايتادى.
– 2011 جىلدان بەرى اقتوبەلىك ەرىكتىلەرمەن تىعىز بايلانىستامىن دەسەم بولادى. ولار تاعدىرلاستارىما ماتەريالدىق قانا ەمەس, رۋحاني, فيزيكالىق تا قولداۋ كورسەتەدى. مىسالى, پاراليمپيادالىق ويىندارعا قاتىسۋشىلاردىڭ جانىندا سەپتەسىپ ءجۇرۋىنىڭ ءوزى – ۇلكەن دەمەۋ. قول جالعاپ, قولارباسىن كوتەرىپ, وزگە دە كۇشى جەتپەي جاتقانداعى كومەگىن ايتىپ وتىرمىن. ءوز باسىم ءدال مۇنداي ساناتتاعى ۆولونتەرلەردىڭ كومەگىنە اسا كوپ جۇگىنبەيمىن. سەبەبى ءىنىم ءاردايىم قاسىمدا جۇرەدى. بىراق مەن ارالاساتىن ورتادا ولاردىڭ ورنى بولەك ەكەنىن بىلەمىن جانە اقتوبەدە وسى ماقساتتاعى «سپورتيكي» ۆولونتەرلەر كلۋبىنىڭ جۇمىس ىستەپ جاتقانىنا قۋانىشتىمىن.
وكىنىشكە قاراي, بىزدە ءالى كۇنگە دەيىن ۆولونتەرلەردى ەرىگىپ جۇرگەن جاستار رەتىندە قابىلدايتىندار كوپ. ولاردىڭ پىكىرىنشە, قايىرىمدى ىسپەن تەك قولى بوس جەتكىنشەكتەر اينالىسادى. بۇل – قاتە تۇسىنىك. ءيا, قازاقستاندا ۆولونتەرلەردىڭ دەنى – جاستار, بىراق ولاردىڭ اراسىندا شىنىمەن ىزگى ىستەرگە ۇمتىلعانى از ەمەس. باسقا ويدى كوزدەگەندەر دە بار. ءبىر انىعى, بىزدە شەتەلدەگىدەي ۆولونتەرلەرگە قولداۋ اتىمەن جوق. ايتالىق, جۇمىسقا تۇراردا ونىڭ قوعامدىق قىزمەتى, اقىسىز كومەككە ۇلەسى ەسكەرىلە بەرمەيدى. ءبىز بۇل جاعىنان اقش, گەرمانياداعى دەڭگەيگە جەتە قويمادىق.
بۇگىنگە دەيىن ۆولونتەرلەرمەن كوپتەگەن جوبانى ىسكە اسىردىق. حالىقارالىق جارىستارعا قاتىساردا اۋدارما ىسىنە كومەكتەسكەندەرى دە بولدى. كەلىنشەگىم دە كەزىندە بەلسەندى ۆولونتەرلەردىڭ ءبىرى بولعان. جالپى, بۇل قاتارداعى دوستارىم بارشىلىق. سوندىقتان ولارعا ءسوز جۇزىندە عانا ەمەس, ىسپەن قولداۋ كورسەتىلگەنىنە تىلەكتەسپىن. وقۋ اقىسىنا جەڭىلدىك جاسالىپ, ولاردى وزگە زامانداستارىنا ۇلگى ەتسە, اتقارۋشى بيلىك ەڭبەگىن ەلەسە, ارتىق بولمايدى, – دەيدى شاحان.
90 توپ. 2 مىڭ ادام
اقتوبە وبلىستىق جاستار ساياساتى ماسەلەلەرى باسقارماسىنىڭ باسشىسى ءسابيت مۇقانوۆتىڭ ايتۋىنشا, جىل باسىندا وڭىردەگى ۆولونتەرلىك توپتاردىڭ سانى 35 بولسا, قازىر 90-عا جەتكەن. بۇل ۇيىمداردىڭ قۇرامىندا 2 مىڭنان استام ۆولونتەر بار.
– وبلىس بويىنشا ۆولونتەرلەر بازاسى جاساقتالىپ جاتىر. ساناتتارىنا قاراي ايتساق, 45 پايىزى جۇمىسشى جاستار بولسا, قالعانىن ستۋدەنتتەر مەن وقۋشىلار قۇرايدى. بىزگە تىركەلگەن ۆولونتەردىڭ ەڭ ۇلكەنى 41 جاستا, ال كىشىسى – 2006 جىلى تۋعان ءجاسوسپىرىم.
«ۆولونتەر جىلىنىڭ» «بىرگەمىز» تۇجىرىمداماسى نەگىزىندە 7 باعىتتا جالپىۇلتتىق جوبالار جۇزەگە اسىرىلىپ جاتىر, ولار – ء«بىلىم», «ساباقتاستىق», «ساۋلىق», «تازا قازاقستان», «اسىل مۇرا», «قامقور» جانە ء«ۇمىت». ارقايسىسىنىڭ باعىتى ارقيلى. مىسالى, ەكولوگيانى جاقسارتۋ ماقساتىندا ۆولونتەرلەر جىل باسىنان بەرى 138 تازالىق اكتسياسىن وتكىزدى. ال «اسىل مۇرا» جوباسى بويىنشا ويىل, شالقار, مۇعالجار, قوبدا, العا اۋداندارىنا ەكسپەديتسيا ۇيىمداستىرىلدى. شاراعا 40-قا جۋىق ۆولونتەر تارتىلىپ, تۋعان ولكەنىڭ تاريحي جەرلەرىمەن تانىسۋعا مۇمكىندىك الدى. مۇنداي جۇمىستار كەلەسى جىلى دا جالعاسىن تابادى, – دەيدى ول.
سونىمەن قاتار اقتوبەلىك ۆولونتەرلەر «جاقىنىڭا جاناشىر بول!» اكتسياسى اياسىندا قوعامدىق ورىنداردا 2 مىڭعا جۋىق مەديتسينالىق ماسكانى ۇلەستىرىپ, كارانتين كەزىندە قولدان كەلگەنشە قولداۋ كورسەتكەن. ولاردىڭ رياسىز كوڭىلى ەلەۋسىز قالماعان. 40 ۆولونتەر ەلباسىنىڭ, پرەزيدەنتتىڭ, وبلىس اكىمىنىڭ العىس حاتتارىمەن ماراپاتتالىپتى.
ايبەك تاسقاليەۆ,
جۋرناليست
اقتوبە