كوپ ادامنىڭ اراسىندا كىم جۇرگەنىن قۇقىق قورعاۋشىلاردان وزگە ەشكىم تاپ باسىپ ايتا المايدى. ال ازاماتتىعى انىقتالماعاندار جۇرسە, نە دەۋگە بولادى؟ ءدال سوندايلار اتىراۋدا دا بار ەكەن.
ىشكى ىستەر مينيسترلىگى كوشى-قون قىزمەتى كوميتەتى توراعاسىنىڭ ورىنباسارى, پوليتسيا پولكوۆنيگى س.سەيىتجانوۆتىڭ مالىمدەۋىنشە, قازىر ەلىمىزدە كسرو كەزەڭىنەن بەرى قۇجاتتاندىرىلماعان نەمەسە جەكە باسىن كۋالاندىراتىن قۇجاتى جوق, تولقۇجاتىن اۋىستىرماعان ازاماتتاردى انىقتايتىن رەسپۋبليكالىق اكتسيا ءوتىپ جاتىر. اكتسيانىڭ ماقساتى – سونداي ادامداردى قۇجاتتاندىرۋ.
– اتىراۋ وبلىستىق پوليتسيا دەپارتامەنتىنىڭ كوشى-قون قىزمەتى باسقارماسى اتالعان اكتسيا كەزىندە 12 تۇلعانى انىقتادى. ونىڭ ىشىندە كسرو-نىڭ قىزىل پاسپورتىمەن جۇرگەن ءۇش ادام انىقتالدى. سونداي-اق قازاقستان رەسپۋبليكاسىنىڭ ازاماتى ەكەنىن باسقا قۇجاتپەن ايقىندايتىن قۇجاتسىز ءۇش ادام بار. پرەزيدەنت جارلىعىمەن قازاقستان رەسپۋبليكاسىنىڭ ازاماتتىعىنان شىعۋىنا بايلانىستى ازاماتتىعى جوق ادام دەپ تانىلعان 1, شەت مەملەكەتتىڭ ازاماتتىعىنان شىعۋىنا بايلانىستى ازاماتتىعى جوق ادام دەپ تانىلعان 6 تۇلعا بەلگىلى بولدى, – دەيدى پوليتسيا پولكوۆنيگى س.سەيىتجانوۆ.
وبلىستىق پوليتسيا دەپارتامەنتىنىڭ قىزمەتكەرلەرى رەيدتىك ءىس-شارالار كەزىندە قازاقستان رەسپۋبليكاسىنىڭ زاڭناماسىن بۇزعانى ءۇشىن شەتەلدىك 1986 ازاماتتى اكىمشىلىك جاۋاپكەرشىلىككە تارتتى.
– ولاردىڭ كوشى-قون زاڭناماسىن بۇزعانى دالەلدەنىپ, 184-ءى ەلدەن شىعارىلدى. شەتەل ازاماتتارىنا قاتىستى 49 قىلمىس تىركەلىپ, 43 شەتەلدىك تاراپىنان قىلمىس جاسالعانى بەلگىلى بولدى. ونىڭ كوپشىلىگى وزبەكستان رەسپۋبليكاسىنىڭ ازاماتتارى تاراپىنان ورىن الادى. جالپى, ءتۇرلى اكىمشىلىك قۇقىق بۇزعان شەتەلدىكتەردەن 5 ملن تەڭگە ءوندىرىلدى. سونداي-اق اكىمشىلىك جاۋاپكەرشىلىككە قازاقستاندىق 10 جۇمىس بەرۋشى تارتىلدى, – دەيدى وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆ.
ونىڭ ايتۋىنشا, جىل باسىنان بەرى اتىراۋ وبلىسىنا قونىس اۋدارعان شەتەلدىكتەر سانى وتكەن جىلمەن سالىستىرعاندا 77%-عا ازايىپ وتىر. دەگەنمەن اتىراۋلىق پوليتسەيلەر شەتەلدىكتەرگە پاتەنتتەر بەرۋ ياعني جەكە تۇلعالارعا جۇمىس ىستەۋگە رۇقسات بەرۋ ارقىلى زاڭداستىرۋ بويىنشا جۇمىستاردى بەلسەندى جۇرگىزىلۋدە. جىل باسىنان پوليتسيا قىزمەتكەرلەرى تەك اتىراۋ قالاسىندا 50 مىڭ شەتەلدىككە جەكە تۇلعالاردا جۇمىس ىستەۋىن جۇزەگە اسىرۋعا ارنالعان پاتەنتتەر راسىمدەگەن. ولاردىڭ باسىم بولىگى وزبەكستان ەلىنىڭ ازاماتتارىنا قاتىستى بولعان.
ال وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىنا قاراعاندا, شەتەلدىكتەر تاراپىنان اكىمشىلىك قۇقىقبۇزۋشىلىق ازايماي وتىر. اكىمشىلىك جاۋاپكەرشىلىككە تارتىلعان شەتەلدىكتەرگە ودان ءارى شارالار قابىلداۋ ءۇشىن كوشى-قون قىزمەتى بولىمدەرىنە 70-تەن استام قۇجات تۇسكەن ەكەن. ماسەلەن, قىلمىستىق, اكىمشىلىك قۇقىقبۇزۋشىلىقتاردىڭ الدىن الۋ ءۇشىن جۇرگىزىلگەن شارالار كەزىندە انىقتالعان شەتەلدىكتەردىڭ اراسىندا وزبەكستان ازاماتتارى دا بار. شەتەل ازاماتتارى تاراپىنان الكوگولدىك ىشىمدىك ءىشىپ, قوعامدىق ورىنداردا ءجۇرۋ, اۆتوكولىكتى ماس كۇيدە جۇرگىزۋ, قوعامعا قاۋىپ توندىرەتىن باسقا دا قۇقىقبۇزۋشىلىقتار جاسالعان. ازاماتتىق تارتىپتە قاراۋ ءۇشىن جيناقتالعان قۇجاتتار اتىراۋ قالالىق سوتىنا جولداندى.
ءتارتىپ ساقشىلارى ءتۇرلى قۇقىقبۇزۋشىلىق جاساعان شەتەلدىكتەردىڭ تايراڭداپ جۇرۋىنە جول بەرگەن جوق. بيىل سوت شەشىمىمەن وسىنداي تەرىس ارەكەتىمەن تانىلعان شەتەلدىك ازاماتتاردىڭ ەل اۋماعىنان شىعارىلۋىن ۇدايى قاداعالادى.
– قۇقىق بۇزعان شەتەلدىكتىڭ ءبىرى – 29 جاستاعى ازاماتتىڭ كولىكتى ماس ءارى جۇرگىزۋشى كۋالىگىنسىز باسقارعانى انىقتالدى. وزبەكستان رەسپۋبليكاسىنىڭ بۇل ازاماتى اكىمشىلىك قۇقىقبۇزۋشىلىق تۋرالى كودەكستىڭ 608-بابىنىڭ 6-بولىگىنە سايكەس 20 تاۋلىككە قاماۋعا الىندى. وسى ازاماتقا قاتىستى جيناقتالعان قۇجاتتارمەن تانىسقان اتىراۋ قالالىق سوتى 13 قازاندا ونى دەپورتاتسيالاۋ تۋرالى شەشىم قابىلدادى. وزبەكستان ەلىنىڭ تاعى ءبىر ازاماتى جاقىندا قوعامدىق ورىندا ماس كۇيىندە جۇرگەنى ءۇشىن ۇستالدى. 1986 جىلى تۋعان ازاماتقا اكىمشىلىك قۇقىقبۇزۋشىلىق تۋرالى كودەكستىڭ 440-بابىنىڭ 1-بولىگىنە ساي, اكىمشىلىك ايىپپۇل سالىنىپ, ەلدەن شىعارۋ تۋرالى شەشىم شىعارىلدى, – دەيدى وبلىستىق پوليتسيا دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا.
سوت شەشىمىمەن كەيىن اتىراۋ قالالىق پوليتسيا باسقارماسىنىڭ قىزمەتكەرلەرى شەتەلدىكتەردىڭ ەل اۋماعىنان شىعىپ كەتۋىنە ىقپال ەتتى. ءسويتىپ شەتەلدىكتەردى تۇركىستان وبلىسىنىڭ سارىاعاش اۋدانىندا ورنالاسقان «جىبەك جولى» باقىلاۋ-وتكىزۋ پۋنكتىنە دەيىن جەتكىزىپ, قازاقستان تەرريتورياسىنان شىعارۋ ءۇشىن شەكارا قىزمەتىنىڭ قىزمەتكەرلەرىنە تاپسىردى.
اتىراۋ وبلىسى