قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلى قايرات وماروۆ ەقىۇ باس حاتشىسىنىڭ مىندەتىن اتقارۋشى, قاقتىعىستاردى بولدىرماۋ ورتالىعىنىڭ ديرەكتورى تۋلا يۋرەلاعا سەنىم قۇجاتىن تابىستادى. ءراسىم اۋستريا استاناسىندا ەقىۇ حاتشىلىعىنىڭ شتاب-پاتەرىندە ءوتتى, دەپ حابارلايدى Egemen.kz
كەزدەسۋ بارىسىندا ت.يۋرەلا قازاقستاننىڭ ەقىۇ-مەن ىنتىماقتاستىعىنا جوعارى باعا بەرىپ, بۇل سەرىكتەستىكتىڭ ودان ءارى نىعاياتىنىنا سەنىم ءبىلدىردى. ەقىۇ وكىلىنىڭ ايتۋىنشا, قازاقستان ۇيىمنىڭ قىزمەتىندە ماڭىزدى ءرول اتقارادى جانە ونىڭ بەلسەندى قاتىسۋشىسى بولىپ تابىلادى.
ءوز كەزەگىندە, ق.وماروۆ ەقىۇ-نىڭ ءۇش ولشەمدەگى ماڭىزدى جۇمىسىن اتاپ ءوتىپ, مەملەكەتتىمىزدىڭ ۇيىممەن قالىپتاسقان ىنتىماقتاستىقتىڭ جوعارى دەڭگەيىن راستادى. وتاندىق ديپلومات ەلدەگى قوعامدىق ءومىردىڭ ءتۇرلى سالالارىندا جۇرگىزىلىپ جاتقان رەفورمالار جايىندا حاباردار ەتتى. سونىمەن قوسا, 2021 جىلعى 10 قاڭتاردا ماجىلىسكە وتەتىن پارلامەنتتىك سايلاۋعا ەقىۇ بايقاۋشىلار ميسسياسىنىڭ بەلسەندى قاتىساتىنىنا سەنىم ءبىلدىردى.
تۇراقتى وكىل ۇيىمعا ءۇش ونجىلدىق بارىسىنداعى تابىستى مۇشەلىلىگىنە, ءارى 1998 جىلدان باستاپ ەقىۇ-نىڭ ەلىمىزدە ميسسياسىنىڭ بولۋىنا نەگىزدەلىپ, ەقىۇ-مەن ىنتىماقتاستىقتىڭ جاڭا مازمۇنىن دامىتۋعا ۇمتىلاتىنىن اتاپ ءوتتى.
سونىمەن قاتار, تاراپتار كۇن ءتارتىبىنىڭ وزەكتى ماسەلەلەرىن, ەقىۇ-نىڭ وڭىرلىك ماسەلەلەردى شەشۋدەگى جانە ورتالىق ازيا ەلدەرىنىڭ الەۋمەتتىك-ەكونوميكالىق دامۋىنا حالىقارالىق قولداۋدى بەلسەندىرۋدەگى ءرولىن تالقىلادى.