قر پرەمەر-ءمينيسترى اسقار مامين مەن اقش ساۋدا ءمينيسترى ۋ. روسس اقش ساۋدا پالاتاسىنىڭ جانىنداعى قازاقستان-امەريكا ىسكەرلىك كەڭەسىنىڭ ونلاين اشىلۋ راسىمىنە قاتىستى.
ۇكىمەت باسشىسى امەريكا قۇراما شتاتتارى قازاقستاننىڭ ءىرى ەكونوميكالىق, ساۋدا جانە ينۆەستيتسيالىق سەرىكتەستەرىنىڭ ءبىرى ەكەنىن اتاپ ءوتتى. قر تاۋەلسىزدىك العان جىلدارى اقش-تان قازاقستانعا تىكەلەي ينۆەستيتسيالار اعىنى $53 ملرد-تان نەمەسە تارتىلعان شەتەلدىك كاپيتالدىڭ جالپى كولەمىنىڭ 15%-ىنان استى.
امەريكانىڭ جەتەكشى كومپانيالارىنىڭ كوپ بولىگى قر ەكونوميكاسىنىڭ ماشينا جاساۋ, حيميا, قۇرىلىس, IT جانە اگروونەركاسىپ, تاۋ-كەن مەتاللۋرگياسى جانە مۇناي-گاز سەكتورلارىندا جۇمىس ىستەيدى.
پرەمەر-مينيستر قازاقستان ەكونوميكاسىنىڭ قالپىنا كەلتىرۋ باعىتىنا شىعۋىنا وراي الەم نارىقتارىنداعى قازىرگى داعدارىس اياسىندا ۇكىمەتتىڭ قر-عا امەريكالىق وندىرىستەردى تارتۋ بويىنشا جۇمىستاردى كۇشەيتۋگە نيەتتى ەكەنىن جەتكىزدى.
ۇكىمەت باسشىسى ناقتى سەكتوردىڭ تۇراقتىلىعىنىڭ جوعارى دەڭگەيى اياسىندا قازاقستان ەكونوميكاسىنىڭ ءبىرشاتا باسەكەگە قابىلەتتىلىگىنىڭ ارتقانىن اتاپ ءوتتى.
ۇلتتىق ەكونوميكانىڭ تۇراقتىلىعىن جەتەكشى حالىقارالىق نەسيە اگەنتتىكتەرى باعالادى. Moody’s, Fitch جانە S&P مەملەكەتتىك قارىزدىڭ تومەندىگىن, فيسكالدى جۇيەنىڭ تۇراقتىلىعىن, ۇكىمەت قابىلداپ جاتقان داعدارىسقا قارسى شارالاردىڭ تيىمدىلىگىن اتاپ ءوتتى.
پرەمەر-مينيستر قازاقستاننىڭ 2025 جىلعا دەيىنگى ستراتەگيالىق دامۋ جوسپارى, شەتەلدىك كاپيتالدى تارتۋعا تارگەتتەلگەن ءتاسىل جانە ينۆەستيتسيالىق احۋالدى ودان ءارى جەتىلدىرۋ جونىندەگى شارالار تۋرالى ايتتى
"ينۆەستيتسيالار تارتۋ ءبىزدىڭ جاڭا ەكونوميكالىق مودەلىمىز ءۇشىن اسا ماڭىزدى. جاڭا شارالار قر ينۆەستيتسيالىق احۋالىنا الەمنىڭ اسا باسەكەگە قابىلەتتى ەكونوميكالارىنا ساي كەلۋگە مۇمكىندىك بەرەدى", - دەدى ا.مامين.
ءوز كەزەگىندە راسىمدە ءسوز سويلەگەن اقش ساۋدا ءمينيسترى ۋ. روسس, اقش ساۋدا پالاتاسىنىڭ پرەزيدەنتى ت. دوناحيۋ جانە Chevron كومپانياسىنىڭ باس اتقارۋشى ديرەكتورى م. ۆيرت قازاقستان-امەريكا ىسكەرلىك كەڭەسىنىڭ قۇرىلۋىمەن ەلدەر اراسىنداعى ينۆەستيتسيالىق ىنتىماقتاستىقتىڭ ساپالى جاڭا دەڭگەيگە شىعاتىنىن اتاپ ءوتتى. بۇل رەتتە, امەريكالىق بيزنەس ءۇشىن قازاقستاندىق ەكونوميكانىڭ تۇراقتىلىعى مەن تارتىمدىلىعى اتاپ ءوتىلدى.
تەلەكوپىر رەجيمىندەگى ءىس-شاراعا جەتەكشى امەريكالىق كومپانيالاردىڭ – Chevron, GE, Shell, J.P.Morgan Chase, Princeton Healthcare Alliance, Pfizer, Tyson Foods, IBM, Oracle, Facebook, Google, DuPont Pioneer جانە باسقا دا كاسىپورىنداردىڭ 100-دەن استام وكىلدەرى, اقش مەملەكەتتىك دەپارتامەنتىنىڭ, قر ۇكىمەتىنىڭ مۇشەلەرى, «سامۇرىق-قازىنا» ۇاق» اق, قر ۇلتتىق كومپانيالارى مەن دامۋ قورلارىنىڭ باسشىلارى, قر-نىڭ اقش-تاعى ەلشىلەرى ە. قازىحانوۆ جانە اقش-تىڭ قر-داعى ەلشىسى ۋ. موزەر قاتىستى.
اقش ساۋدا پالاتاسى جانىنداعى قازاقستان-امەريكا ىسكەرلىك كەڭەسى (USKZBC) قازاقستاندا كوممەرتسيالىق قىزمەت جۇرگىزەتىن امەريكالىق كومپانيالاردى بىرىكتىرەدى. ىسكەرلىك كەڭەستىڭ توراعاسى بولىپ Chevron كومپانياسىنىڭ باس اتقارۋشى ديرەكتورى م. ۆيرت سايلاندى.