الماتىدا 511 اۆتوبۋس جۇرگىزۋشىسى جاۋاپكەرشىلىككە تارتىلدى, دەپ حابارلايدى Egemen.kz
الماتى قالاسىندا 21-23 قازان ارالىعىندا "اۆتوبۋس" جەدەل-الدىن الۋ شاراسى وتكىزىلىپ جاتىر. قازىر پوليتسيا اۆتوكولىكتىك كاسىپورىندارى مەن جولاۋشىلار تاسىمالىن جۇزەگە اسىراتىن جەكە كاسىپكەرلەردىڭ, ازاماتتاردى تاسىمالداۋ قاۋىپسىزدىگى تالاپتارىنا سايكەستىگىن تەكسەرۋدە.
قالاداعى اۆتوبۋستاردىڭ تەحنيكالىق جاعدايىنا جانە بالالاردى تاسىمالداۋمەن اينالىساتىن جۇرگىزۋشىلەردىڭ جول ەرەجەلەرىن ساقتاۋىنا ەرەكشە نازار اۋدارىلادى.
رەيدكە 1694 پوليتسيا قىزمەتكەرى جۇمىلدىرىلعان. ونىڭ 1448-ءى – پاترۋلدىك پوليتسيا قىزمەتكەرى, 210 – ۋچاسكەلىك پوليتسيا ينسپەكتورى, 36 – ىشكى ىستەر ورگاندارىنىڭ باسقا بولىمدەرىنىڭ قىزمەتكەرى.
وسى ۋاقىتقا دەيىن بارلىعى 511 جۇرگىزۋشى اكىمشىلىك جاۋاپكەرشىلىككە تارتىلدى. ونىڭ ىشىندە جولاۋشىلاردى, باگاجدى جانە جۇكتەردى تاسىمالداۋ ەرەجەلەرىن بۇزعان 56 جۇرگىزۋشى, ەڭبەك جانە دەمالىس رەجيمىن بۇزعان – ءۇش, كولىگىن ءتيىستى رۇقساتسىز قايتا جابدىقتاعان – 31, ساپار الدىنداعى تەكسەرۋدەن جانە مەديتسينالىق تەكسەرۋدەن وتپەگەن – 22, مەملەكەتتىك نەمەسە مىندەتتى تەكسەرۋدەن وتپەگەن – 27, كولىك جۇرگىزۋ بارىسىندا ۇيالى تەلەفوندى پايدالانعان – 189, مانەۆر جاساۋ ەرەجەلەرىن بۇزعان – 175, قارسى جولاققا شىعىپ كەتكەن – 4, كولىكتى ماس كۇيىندە باسقارعان – 1, مىندەتتى ساقتاندىرۋ تۋرالى زاڭنامانى بۇزعان 5 جۇرگىزۋشى جاۋاپكەرشىلىككە تارتىلدى.
"ايىپپۇل تۇراعىنا 20 اۆتوبۋس قويىلدى, 26 مەملەكەتتىك ءنومىر شەشىپ الىندى, رۇقسات ەتىلمەگەن 9 تۇراق جابىلدى, 6 اۆتوبۋس پاركىنىڭ لاۋازىمدى تۇلعالارى اكىمشىلىك جاۋاپكەرشىلىككە تارتىلدى, 49 اۆتوبۋستىڭ جىلۋ, ەلەكتر جابدىقتارىنىڭ سايكەستىگى تەكسەرىلدى. سونىمەن قاتار, زاڭسىز قوسىمشا جابدىقتالعان اۆتوبۋستاردىڭ, سونداي-اق تەحنيكالىق جاعدايى مەن قۇرىلىمى بەلگىلەنگەن جول قاۋىپسىزدىگى تالاپتارىنا سايكەس كەلمەيتىن اۆتوبۋستار مەن تاكسيلەردىڭ جۇمىسىنا تىيىم سالۋ بويىنشا شارالار قابىلدانادى", دەدى الماتى قالالىق پد جەرگىلىكتى پوليتسيا قىزمەتى باسقارماسىنىڭ باستىعى ماناپ ساتتاروۆ.
ءمالىم ەتىلگەندەي, زاڭسىز ميگرانتتار مەن تاسىمالداۋشىلاردى انىقتاۋ ماقساتىندا كوشى-قون پوليتسياسى ترانزيتتىك كولىكتەردى تەكسەرەتىن بولادى.