ءداستۇر بويىنشا قارۋلى كۇشتەردە قازاننىڭ جيىرماسى كۇنى بايلانىس اسكەرلەرىنىڭ كۇنى اتاپ وتىلەدى, دەپ حابارلايدى Egemen.kz.
اسكەري بايلانىسشىلار تاۋلىك بويى قارۋلى كۇشتەردى زاماناۋي, ءتيىمدى جانە سەنىمدى بايلانىسپەن قامتاماسىز ەتۋمەن اينالىسادى. ولار قارۋ-جاراق پەن اسكەرلەردى باسقارۋ جۇيەسىنىڭ جۇمىسىن ساپالى دەڭگەيدە جۇرگىزىپ, بايلانىس توراپتارى مەن تەحنيكالىق قۇرالداردىڭ جارامدىلىعىن باقىلايدى.
قازىرگى كەزدە قارۋلى كۇشتەردە زاماناۋي بايلانىس قۇرالدارىمەن جابدىقتاۋ, ولاردى ستاندارتيزاتسيالاۋ جانە اقپاراتتى جولداۋدىڭ ساندىق ادىسىنە تولىقتاي كوشۋ بويىنشا ءبىرشاما جۇمىس اتقارىلۋدا. بەلگىلەردى قابىلداۋ-جولداۋ, ودان كەيىن اقپاراتتى كودتاۋ مەن شيفرسىزداندىرۋ ءۇشىن بايلانىسشىلار وقۋ-جاتتىعۋلاردا, حالىقارالىق جارىستار مەن كۇندەلىكتى قىزمەتتە قولدانىلاتىن قۇرالداردىڭ كوپتەگەن تۇرىنە يە.
قازاقستاندىق بايلانىسشىلار اۋقىمدى حالىقارالىق جارىستار مەن وقۋ-جاتتىعۋلارعا ۇدايى تۇردە قاتىسادى. 2018 جانە 2019 جىلدارى ارميا حالىقارالىق ويىندارى اياسىندا وتكەن "سەنىمدى قابىلداۋ" كونكۋرسىندا قر قارۋلى كۇشتەرى بايلانىس اسكەرلەرىنىڭ كومانداسى ءبىرىنشى ورىندارعا يە بولدى.
قازاقستاننىڭ قارۋلى كۇشتەرى ءۇشىن بايلانىس ماماندارىن راديوەلەكترونيكا جانە بايلانىس اسكەري-ينجەنەرلىك ينستيتۋتى دايارلايدى. وندا قازىرگى زامانعى زەرتحانالار مەن تەحنيكالىق قۇرالدارمەن جابدىقتالعان بايلانىس جانە اسكەري تەحنيكا بايلانىسىن ۇيىمداستىرۋ كافەدراسى ءوز جۇمىسىن اتقارۋدا.
قازاقستاندىق اسكەردىڭ قۇرىلۋ شەبىندە گەنەرال-مايور مۇبارەك ورىنبەك ۇلى ورىنبەكوۆ, پولكوۆنيك ەرجان توكتار ۇلى قاسىمحانوۆ, پولكوۆنيك تيمۋر توقان ۇلى كەمەرباەۆ, پولكوۆنيك سەرىك قادىلبەك ۇلى قۇرمانوۆ, پولكوۆنيك يگور ۆياچەسلاۆوۆيچ حاليموۆ, پولكوۆنيك ۆالەري الەكساندروۆيچ گەراسيموۆ, پولكوۆنيك رافيك لاتيف ۇلى حاسەنوۆ سىندى بايلانىس قىزمەتىنىڭ ارداگەرلەرى تۇر. ولاردىڭ ارقايسىسى قازاقستاننىڭ قورعانىس قابىلەتىن نىعايتۋعا زور ۇلەستەرىن قوستى.