نۇر-سۇلتانعا مىسىردان كەلگەن جولاۋشى ينفەكتسيانىڭ سيمپتومسىز تاسىمالداۋشىسى بولىپ شىقتى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
19 قازان كۇنى تاڭەرتەڭ ايەل شارم-ەل-شەيحتەن پتر تەستىنەن وتپەي ۇشىپ كەلگەن. اۋەجايدا بىردەن قالانىڭ كارانتيندىك ستاتسيونارىنا جەتكىزىلدى, وندا وعان قاجەتتى زەرتحانالىق تالداۋلار جاسالدى. تالداۋ ناتيجەلەرى بويىنشا پاتسيەنتتە COVID-19 انىقتالدى.
ادەتتە, كوروناۆيرۋس ينفەكتسياسىنىڭ بارلىق سيمپتومسىز تاسىمالداۋشىلارىن ۇيدە مەديتسينا ماماندارى باقىلايدى.
الايدا, ناۋقاس وبلىس تۇرعىنى بولىپ تابىلعاندىقتان جانە ونى جەدەل ءۇي كارانتينىنە وقشاۋلاۋ مۇمكىن ەمەستىگى ەسكەرىلىپ, ول ەلورداداعى ينفەكتسيالىق ستاتسيونارعا جاتقىزىلدى.
"ناۋقاس اۋرۋحانادا تولىق تەكسەرۋدەن ءوتىپ, 5 كۇنگە دەيىن بولادى. ەگەر كلينيكالىق كورىنىستەر پايدا بولا باستاسا, وندا وعان حاتتاماعا سايكەس ءتيىستى ەمدەۋ تاعايىندالادى", - دەيدى اۋرۋحانانىڭ جۇقپالى اۋرۋلار دارىگەرى.
بۇگىنگى كۇنى قالالىق جۇقپالى اۋرۋلار ستاتسيونارىندا كۆي جۇقتىرعان 29 پاتسيەنت بار.
ەستەرىڭىزگە سالا كەتەيىك, بۇعان دەيىن كارانتيندىك ستاتسيوناردا پتر تەستىنەن وتپەگەن 2 اۆياجولاۋشىدان سيمپتومسىز ۆيرۋس انىقتالعان. ەلوردالىق دارىگەرلەردىڭ جەدەل ارەكەتتەرى ارقاسىندا حالىق اراسىندا ىندەت مەيلىنشە از تاراۋدا.
بيىل 19 قازاندا 7 حالىقارالىق رەيس قابىلداندى ء(باا-دەن 2, تۇركيادان 2, بەلورۋسسيادان 1, گەرمانيادان 1, ەگيپەتتەن 1). كەلگەن 769 جولاۋشىدان COVID-19 تەستىنەن وتكەندىگى تۋرالى انىقتاما 171 قازاقستان ازاماتىندا بولعان جوق. ولاردىڭ بارلىعى كارانتيندىك ستاتسيونارعا جەتكىزىلدى.