اتىراۋدا تاعى ءبىر ماس جۇرگىزۋشى 7 جىلعا كولىك جۇرگىزۋ قۇقىعىنان ايرىلدى, دەپ حابارلايدى Egemen.kz.
اتىراۋ قالالىق پوليتسيا باسقارماسىنىڭ پاترۋلدىك پوليتسيا قىزمەتكەرلەرى 17 قازاندا تۇنگى ساعات 01:30-دا تاسقالا اۋىلىنىڭ 9-كوشەسىندە "Skoda Rapid" ماركالى اۆتوكولىكتى توقتاتقان ەكەن. شەتەلدىك كولىكتىڭ رۋلىندە وتىرعان جۇرگىزۋشىدەن الكوگولدىك ىشىمدىكتىڭ ءيىسى شىققان.
"جۇرگىزۋشى جەكە باسىن انىقتاۋ ماقساتىندا قۇجاتتارىن سۇراعان پوليتسيا قىزمەتكەرلەرىنىڭ زاڭدى تالابىنا باعىنباعان. پوليتسيا قىزمەتكەرلەرىنە قارسىلىق كورسەتىپ, قۇجاتتارىن بەرۋدەن باس تارتقان. پاترۋلدىك پوليتسەيلەر ماس جۇرگىزۋشىنى وبلىستىق ناركولوگيالىق ديسپانسەرگە جەتكىزىپ, ساراپتامادان وتكىزدى. ساراپتاما قورىتىندىسىمەن 34 جاستاعى جۇرگىزۋشىنىڭ جەڭىل دارەجەدەگى ماساڭ كۇيدە ەكەندىگى انىقتالدى", - دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
ماس جۇرگىزۋشىگە قاتىستى قر اكىمشىلىك قۇقىقبۇزۋشىلىق تۋرالى كودەكستىڭ ەكى بابىمەن (اۆتوكولىكتى ماساڭ كۇيدە باسقارعانى جانە پوليتسيا قىزمەتكەرىنىڭ زاڭدى تالابىنا باعىنباۋ) حاتتامالار تولتىرىلىپ, سوتقا جولداندى. اكىمشىلىك سوتتىڭ شەشىمىمەن قالا تۇرعىنى 7 جىلعا كولىك قۇرالىن باسقارۋ قۇقىعىنان ايىرىلىپ, 15 تاۋلىككە قاماۋعا الىندى.