بۇگىن وبلىس اكىمى گۇلشارا ابدىقالىقوۆا «ورمان شارۋاشىلىعى قىزمەتكەرلەرى كۇنى» كاسىبي مەرەكەسىنە وراي ايماقتاعى بىرقاتار سالا ارداگەرلەرى مەن قىزمەتكەرلەرىن قۇتتىقتادى. ايماق باسشىسى وبلىستىڭ ەكولوگيالىق جاعدايىن جاقسارتۋدا ورمان شارۋاشىلىعىنىڭ قىزمەتى ەرەكشە ەكەندىگىن اتاپ ءوتتى.
- قازاقستاننىڭ ءشولدى ايماعىندا ورنالاسقان ءبىزدىڭ ءوڭىر ءۇشىن ورمان شارۋاشىلىعىنىڭ ءوز ورنى بار. تىنىس-تىرشىلىگىمىز ءۇشىن ماڭىزى زور سالانى نىعايتۋدا سىزدەر بىلىكتى دە ءبىلىمدى, ىسكەر دە قابىلەتتى مامان رەتىندە وزگەلەرگە ۇلگى-ونەگە بولىپ, وبلىسىمىزدىڭ الەۋمەتتىك-ەكونوميكالىق جانە ورمان شارۋاشىلىعى سالالارىنىڭ دامۋىنا ولشەۋسىز ۇلەس قوسىپ كەلەسىزدەر. «اتادان مال قالعانشا, تال قالسىن» دەيدى دانالارىمىز. ولاي بولسا, سىر ەلىنىڭ تابيعاتىن ساۋىقتىرۋ, ورماندى ساقتاۋ, قورعاۋ مەن مولىقتىرۋعا ءارى قاراي دا ايانباي ەڭبەك ەتە بەرەتىندەرىڭىزگە سەنىم ءبىلدىرىپ, قيىندىعى مەن قىزىعى قاتار جۇرگەن ەڭبەكتەرىڭىزگە تولاعاي تابىس, شاڭىراقتارىڭىزعا شاتتىق, قۇت-بەرەكە تىلەيمىن, - دەدى ايماق باسشىسى گ.ابدىقالىقوۆا.
كەزدەسۋدە ايماقتىڭ ەكولوگيالىق احۋالىن جاقسارتىپ, ورمان القاپتارىنىڭ ارتۋىنا ۇلەس قوسقان سالا ارداگەرلەرى مۇحيدين يسمايلوۆ, ساقتاعان ەشماحانوۆقا قۇرمەت گراموتاسى, ارداگەر قاديشا الىمبەتوۆا جانە سالا ماماندارى ءسابيت سادىقوۆ, گاۋحار جۇماباەۆا, باقىتجان ءالىمجانوۆ, ايبولات بەرەكەشوۆ, ەربولسىن ۇسەنباەۆ, ەرجان ءجۇنىسوۆ, تەمىرباي سارىمباەۆ, جانىبەك سارىباەۆقا وبلىس اكىمىنىڭ العىس حاتى تابىستالدى.
شارادا ءسوز العان سالا ارداگەرلەرى مۇحيدين يسمايلوۆ, ساقتاعان ەشماحانوۆ جانە قاديشا الىمبەتوۆا سوڭعى جىلدارى ورمان شارۋاشىلىعىنا مەملەكەتتەن قولداۋدىڭ ارتقانىن ايتىپ ءوتتى. وسىنىڭ ارقاسىندا سىر وڭىرىندە اۋقىمدى جۇمىستار اتقارىلىپ, سەكسەۋىل القاپتارىنىڭ وسكەنىن جەتكىزدى. كاسىبي مەرەكەدە ورمانشىلاردى قۇتتىقتاپ, قۇرمەت كورسەتكەن وبلىس اكىمىنە ريزاشىلىعىن ءبىلدىردى.