الماتىدا گرەك-ريم كۇرەسىنەن “قازاقستاندىق چەمپيون بالۋاندار – قۇرمەت تۇعىرىندا” اتتى سپورتتىڭ وسى ءتۇرىن دامىتۋ ماقساتىندا قابىلدانعان باعدارلامانى ىسكە اسىرۋ جانە ۇلتتىق قۇراماعا سپورتشىلاردى ىرىكتەۋ ماقساتىندا ەل بىرىنشىلىگى ءوتتى.
وعان ەلىمىزدىڭ 14 وبلىسى مەن استانا جانە الماتى قالالارىنان 170-كە جۋىق بالۋان قاتىسىپ, 7 سالماق دارەجەسى بويىنشا كۇش سىنىستى. بۇل باسەكەگە بەيجىڭ وليمپياداسىنىڭ قولا جۇلدەگەرى نۇرباقىت تەڭىزباەۆ پەن اسەت مامبەتوۆ, ازيا چەمپيونى دارحان باياحمەتوۆ, گران-پري جارىسى مەن يۆان پوددۋبنىي تۋرنيرىنىڭ جەڭىمپازى المات كەبىسباەۆ سياقتى بالۋاندار قاتىسقان جوق. ولاردىڭ ورنىن مارعۇلان اسەمبەكوۆ, ەلدار قايراتوۆ, بەيبىت نۇعمانوۆ, اسحات قۇدايبەرگەنوۆ پەن اندرەي ساموحين باستى.
چەمپيوناتتا وسىلاردىڭ ىشىنەن سوڭعىسىنان باسقالارىنىڭ ءبارى جەڭىس تۇعىرىنىڭ بيىك ساتىسىنان كورىندى. اتاپ ايتقاندا, 55 كيلو سالماقتا قازاقستاننىڭ وتكەن جىلعى چەمپيونى اسحات قۇدايبەرگەنوۆ بيىل دا بابىندا ەكەنىن كورسەتىپ, باس جۇلدەنى جەڭىپ الدى. كەلەسى 60 كيلو سالماقتا مارات كارىشالوۆ اقتىق سىندا ءتاجىريبەلى بالۋانداردىڭ ءبىرى ەربول قوڭىراتوۆتىڭ جاۋىرىنىن جەرگە تيگىزىپ, تۇڭعىش رەت ەرەسەكتەر اراسىندا چەمپيون اتاندى.
بۇدان كەيىن 66 كيلو سالماقتا بولعان بالۋاندار بەلدەسۋى اسا تارتىستى وتكەنىن اتاپ ءوتۋ ءجون. وسى سالماقتا “دوستىق” سپورت كەشەنىندە توسەلگەن كىلەمدە ەلىمىزدىڭ مىقتى دەگەن بالۋاندارى كۇش سىناستى. دەگەنمەن باس جۇلدە بابى مەن باعى كەلىسكەن ەلدار قايراتوۆقا عانا بۇيىردى. ايتپەسە ونىمەن بەلدەسىپ, كۇمىس جۇلدەنى يەلەنگەن بەيبىت نۇعمانوۆ پەن قولا ءجۇلدەنى قاناعات تۇتقان شىڭعىس قايىرماعانبەتوۆتى جانە نۇرداۋلەت ەرمۇراتوۆتى وسال بالۋاندار ەكەن دەپ ايتا المايمىز. بيىلعى باسەكەدە بۇدان باسقا اسەت ءادىلوۆ (74 كگ), ءالزاحۋر وزديەۆ (84 كگ), جاسۇلان سادىقوۆ (96 كگ) ءوز سالماق دارەجەلەرىندە چەمپيون اتاندى. ال 120 كيلو سالماقتا ازيانىڭ ەكى دۇركىن چەمپيونى مارعۇلان اسەمبەكوۆ فينالدا ابدىمالىك سارتپاەۆتىڭ الدىن وراپ, باس جۇلدەنى جەڭىپ الدى.
چەمپيونات سوڭىندا بالۋانداردىڭ باسەكەسىنە قاناعاتتانارلىق باعا بەرگەن كۇرەس فەدەراتسياسىنىڭ قۇرمەتتى پرەزيدەنتى, “سامۇرىق-قازىنا – استانا” كورپوراتيۆتى قورىنىڭ باس ديرەكتورى, فيلا بيۋروسىنىڭ مۇشەسى داۋلەت تۇرلىحانوۆ پەن فەدەراتسيا باسشىسى بەكزات سارمانوۆ ءبىرىنشى ورىندى يەلەنگەن بالۋانداردىڭ ءبارى ۇلتتىق قۇراماعا الىناتىنىن ايتتى.
– قازىر ءبىزدىڭ باستى ماقساتىمىز – جاڭا قۇراما جاساقتاپ, قىتايدا وتەتىن جازعى ازيا ويىندارىندا باس جۇلدەنى جەڭىپ الۋ. ودان باسقا بيىلعى چەمپيوناتقا قاتىسا الماعان نۇرباقىت تەڭىزباەۆتىڭ الدىنا ماسكەۋدە وتەتىن الەم چەمپيوناتىندا التىن مەدالدى جەڭىپ الۋ تۋرالى مىندەت قويىلىپ وتىر, – دەدى داۋلەت بولات ۇلى.
ال ۇلتتىق قۇرامانىڭ باس باپكەرى مۇراتبەك قاسىمحانوۆتىڭ ايتۋىنشا, چەمپيوناتتان كەيىن بالۋانداردىڭ ءبارى وقۋ-جاتتىعۋ جيىندارىندا بىرگە بولىپ, مامىر ايىندا ءۇندىستاندا وتەتىن ازيا چەمپيوناتىنا دايىندالادى. وسى جاتتىعۋ قۇرلىق بىرىنشىلىگىنە كىمدەردىڭ قاتىساتىنىن كورسەتەدى.
داستان كەنجالين