ءوڭىر جۇرتشىلىعىنا قولايلى جاعداي تۋعىزۋ ماقساتىندا حالىققا قىزمەت كورسەتۋ ورتالىعى جاڭا عيماراتقا كوشىرىلدى. «ازاماتتارعا ارنالعان ۇكىمەت» مەملەكەتتىك كورپوراتسياسى كەاق اتىراۋ وبلىستىق فيليالىنىڭ ديرەكتورى مۇسا حايرۋلليەۆتىڭ ايتۋىنشا, بۇل باستاما ەلباسى نۇرسۇلتان نازارباەۆتىڭ ء«بىر تەرەزە» قاعيداتىمەن ىسكە اسىرىلىپ وتىر. بۇعان وبلىس اكىمدىگى قولداۋ ءبىلدىرىپتى.
التى قاباتتى جاڭا ورتالىق زاماناۋي تالاپقا ساي جابدىقتالدى. عيماراتتىڭ ءبىرىنشى قاباتىندا تسيفرلى ورتالىق بار. مۇندا 30 ادام ءبىر مەزگىلدە «وزىنە ءوزى قىزمەت كورسەتۋ» مۇمكىندىگىن پايدالانا الادى. ال ەكىنشى قاباتتا قىزمەت كورسەتۋ زالى جۇمىس ىستەيدى. زالدىڭ سىيىمدىلىعى – 100 ورىن. بۇل زالدا ءبىر ۋاقىتتا 30 قىزمەت الۋشىنى قابىلداۋعا مۇمكىندىك جاسالىپ وتىر. ءۇشىنشى قاباتتا الەۋمەتتىك قامسىزداندىرۋ مەكەمەلەرى قىزمەت كورسەتەدى. جەر كاداسترى جانە جىلجىمايتىن مۇلىكتى تەحنيكالىق تەكسەرۋ دەپارتامەنتى ءتورتىنشى قاباتتا تۇرعىنداردى قابىلدايدى, – دەيدى م.حايرۋلليەۆ.
سونداي-اق بۇل ورتالىقتا تۇرعىندارعا ءتۇرلى ماسەلەگە قاتىستى كەڭەس بەرەتىن كەڭەسشىلەرگە ارنالعان, قۇجاتتاندىرۋ مەن حالىقتى تىركەۋ, دايىن قۇجاتتاردى بەرۋ سەكتورلارى, بالالار وينايتىن شاعىن بولمە بار. جاڭا عيماراتتا ازاماتتاردىڭ وپەراتورلاردى كۇتپەي-اق, ەلەكتروندى قىزمەتتەردى پايدالانا بەرۋىنە بولادى. الايدا تۇرعىنداردىڭ ايتۋىنا قاراعاندا, جاڭا ورتالىققا جەتۋ قيىن. ويتكەنى قاتىنايتىن اۆتوبۋس سانىنىڭ ازدىعى قولايسىزدىق تۋدىرىپ وتىر. وسىعان وراي وبلىس اكىمى ماحامبەت دوسمۇحامبەتوۆ اۆتوبۋس سانىن كوبەيتۋدى تاپسىردى.
اتىراۋ وبلىسى