قازاقستانداعى ادام قۇقىقتارى جونىندەگى ۋاكىل سەرىكتەستەرىمەن بىرگە كوشى-قون باعدارلاماسىنىڭ ناتيجەلەرىن تالقىلاۋعا ارنالعان ونلاين-كەزدەسۋ وتكىزدى.
ەۋروپالىق وداق جانە بۇۇ بالالار قورى (يۋنيسەف) قازاقستانداعى ادام قۇقىقتارى جونىندەگى ۋاكىلمەن بىرلەسىپ «كوشى-قون ۇدەرىستەرىندەگى بالالاردى قورعاۋ» باعدارلاماسى اياسىندا مەملەكەتتىك ورگانداردىڭ, ورتالىق ازيا ەلدەرى ەلشىلىكتەرىنىڭ, بۇۇ بجكب, حمۇ, اكادەميالىق ۇيىمدار مەن ۇەۇ وكىلدەرىمەن ونلاين-كەزدەسۋ وتكىزدى. باعدارلاما سەرىكتەستەرى كوشى-قون ۇدەرىستەرىندەگى بالالاردىڭ قۇقىقتارىن قورعاۋدىڭ ناتيجەلەرى مەن بولاشاق ارەكەتتەرىن تالقىلادى.
جاقىندا Coram International حالىقارالىق عىلىمي-زەرتتەۋ ينستيتۋتىنىڭ قاتىسۋىمەن باعدارلاما اياسىندا جۇرگىزىلگەن نۇر-سۇلتان, الماتى جانە شىمكەنت قالالارىنداعى كوشى-قون پروتسەستەرىندەگى بالالارعا قاتىستى احۋال مەن جاعدايدى زەرتتەۋ از قامتىلعان وتباسىلاردىڭ قۇجاتتارى جوق بالالارىنىڭ قيىندىققا تاپ بولاتىنىن انىقتادى.
اتا-انالارىنىڭ شەتەلگە قونىس اۋدارۋى كەزىندە وتباسىنىڭ تۋىستارىمەن نەمەسە دوستارىمەن قالعان قازاقستاندىق بالالار كەيىننەن تۋىستارىمەن نەمەسە وتباسىلىق دوسىمەن قامقورشىلىق شارتىن رەسىمدەيتىن سەنىمحاتتىڭ بولماۋىنا بايلانىستى مەكەمەلەرگە ورنالاستىرىلادى. اتا-اناسىز جانە قاراۋسىز قالعان بالالار قاناۋ, ساتۋ جانە زورلىق-زومبىلىققا ۇشىراۋ قاۋپىنە ۇشىرايدى.
«كوشى-قون پروتسەستەرىندەگى بالالار وزدەرىنىڭ قۇقىقتارى مەن مۇددەلەرىن ەرەكشە قورعاۋدى قاجەت ەتەدى. ولار قاي جەردە بولسىن جانە ولاردىڭ تاريحى قانداي بولسىن, ميگرانت بالالار, ەڭ الدىمەن, باسقالارمەن تەڭ قۇقىلى بولۋى ءتيىس. وسى زەرتتەۋ كورسەتكەندەي, قازاقستانداعى كوشى-قون پروتسەستەرىنە قاتىساتىن ءار بالانىڭ ءوزىن قورعالعان جانە قاۋىپسىز سەزىنۋى ءۇشىن ءالى دە كوپ نارسە جاساۋ كەرەك. ءبىز باعدارلاماعا قاتىسقان جانە ونى ءتيىمدى جۇزەگە اسىرۋعا كومەكتەسەتىن قازاقستان ۇكىمەتىنە, ادام قۇقىقتارى جونىندەگى ۋاكىلگە, ەۋروپالىق وداققا جانە بارلىق سەرىكتەستەرىمىزگە العىس ايتامىز», دەدى يۋنيسەف-ءتىڭ قازاقستانداعى وكىلى ارتۋر ۆان ديزەن.
2020 جىلدىڭ ساۋىرىندە قازاقستاندا كوشى-قون بويىنشا بىرلەسكەن باعدارلاما شەڭبەرىندە تاڭدالعان ءۇش ايماقتاعى بالالارعا كوشى-قون پروتسەستەرىندە قىزمەت كورسەتەتىن جوبالار ىسكە قوسىلدى: نۇر-سۇلتان, الماتى جانە شىمكەنت/تۇركىستان وبلىسى. بۇل جوبالاردىڭ جالپى ماقساتى – كوشى-قون پروتسەستەرىندە بالالارعا جان-جاقتى الەۋمەتتىك, پسيحولوگيالىق جانە قۇقىقتىق كومەك كورسەتۋ.
ء«بىزدىڭ سەرىكتەستىكتەرىمىز – «رودنيك», «سانا سەزىم», «ادام قۇقىقتارى جانە زاڭدىلىقتىڭ ۇستەمدىگى جونىندەگى قازاقستاندىق حالىقارالىق بيۋرو» ۇكىمەتتىك ەمەس ۇيىمدارى بىزگە قازىر وسى قىزمەتتەردى تاڭدالعان ايماقتاردا ەنگىزۋگە كومەكتەسەدى, وسىلايشا قازاقستان ميگرانت بالالار مەن ولاردىڭ وتباسىلارىنا ءتيىمدى قولداۋ جۇيەسىن دامىتادى. كوشى-قون پروتسەستەرىندەگى بالالار, ولاردىڭ مارتەبەلەرىنە قاراماستان, وزدەرىنىڭ بارلىق قۇقىقتارىن قولداۋعا جانە پايدالانۋعا قۇقىلى», دەدى قازاقستانداعى ادام قۇقىقتارى جونىندەگى ۋاكىل ەلۆيرا ازيموۆا.
كەزدەسۋ بارىسىندا قاتىسۋشىلار, سونىمەن بىرگە زەرتتەۋ ناتيجەلەرى مەن ۇسىنىستارىن, اتالعان ساناتتاعى بالالاردىڭ جاعدايىن, كوشى-قون ماسەلەلەرىمەن اينالىساتىن مامانداردى دايارلاۋدى تالقىلادى. سونىمەن قاتار كوشى-قون ماسەلەلەرىن ۇلتتىق جانە ايماقتىق دامۋ ستراتەگيالارىنا ينتەگراتسيالاۋ سالاسىنداعى حالىقارالىق وزىق تاجىريبەلەردى قاراستىردى.
«ەۋروپالىق وداق قازاقستاننىڭ كوشى-قون پروتسەستەرىندەگى بالالاردىڭ قۇقىقتارىن قورعاۋ جونىندەگى شارالارىن قولدايدى. يۋنيسەف-پەن بىرلەسكەن باعدارلامامىزدىڭ شەڭبەرىندە ءبىز وزىمىزگە دە, جەرگىلىكتى جانە بيلىك ورگاندارىنا دا قازاقستانداعى كوشى-قون پروتسەستەرىن جاقسى تۇسىنۋگە كومەكتەسەتىن زەرتتەۋلەر جۇرگىزدىك. سونىمەن قاتار ءبىز كوشى-قون ماماندارىن بالالارعا ءتيىمدى قىزمەت كورسەتۋ بويىنشا وقىتتىق. باعدارلاما قازاقستاندا ءالى دە ءوز جالعاسىن تابۋدا جانە بۇل كوشى-قون پروتسەستەرىنە قاتىساتىن بالالاردىڭ ءومىرىن جاقسارتۋعا كومەكتەسەدى دەپ ويلايمىز. ويتكەنى, كەز كەلگەن بالا باقىتتى جانە الاڭسىز بالالىق شاققا لايىق», دەدى ەلىمىزدەگى ەۋروپالىق وداق وكىلدىگىنىڭ ىنتىماقتاستىق ءبولىمىنىڭ باسشىسى يوحاننەس ستەنبەك مادسەن.
ايتا كەتەيىك, كوشى-قون ۇدەرىستەرىندەگى بالالاردى قورعاۋعا باعىتتالعان كوپجاقتى باعدارلامانى يۋنيسەف ەۋروپالىق وداقتىڭ قارجىلاي قولداۋىمەن بانگلادەش, مالايزيا, ميانما, قازاقستان, قىرعىزستان, تاجىكستان, وزبەكستان جانە تايلاند سياقتى بىرنەشە مەملەكەتپەن بىرلەسىپ جۇزەگە اسىرادى. نەگىزگى ماقسات – كوشى-قون ۇدەرىستەرىندەگى بالالاردىڭ قۇقىقتارىن ءتيىمدى قولداۋ مەن قورعاۋدى قامتاماسىز ەتۋ. ىسكە اسىرۋ مەرزىمى – 2017-2021 جىلدار ارالىعى.