قۇرمانعازى – قازاقستان-رەسەي شەكاراسىنداعى اۋدان. ەندى بۇل اۋداننىڭ تۇرعىندارى مەلمەكەتتىك قىزمەتتىڭ تۇرلەرىن ءبىر ورتالىقتان الاتىن بولدى, ويتكەنى, مۇندا "اشىق اكىمدىك" كەڭسەسى اشىلدى.
وبلىس اكىمىنىڭ ورىنباسارى ەرجان ءابىلحانوۆتىڭ پىكىرىنە سۇيەنسەك, تۇرعىندارعا جەدەل ءارى ساپالى قىزمەت كورسەتۋ ارقىلى سىبايلاس جەمقورلىققا جول بەرمەۋ كوزدەلىپ وتىر. وسى ورايدا اۋدان تۇرعىندارىنىڭ ءبىر ورتالىقتاعى مەملەكەتتىك ورگانداردىڭ وكىلدەرىنەن قۇقىقتىق جانە الەۋمەتتىك كومەك الۋىنا قولايلى جاعداي جاسالدى.
"پرەزيدەنت "حالىق ۇنىنەن قۇلاق اساتىن مەملەكەت» تۇجىرىمداماسىن ۇسىندى. وسىعان وراي وڭىردە "اشىق اكىمدىك" جوباسى قولعا الىندى. اشىق فورماتتاعى كەڭسەدە اۋىل شارۋاشىلىعى, قۇرىلىس جانە باسقا سالالار بويىنشا مەملەكەتتىك قىزمەتتەر كورسەتىلەدى. ءبىزدىڭ ماقساتىمىز – مەملەكەتتىك قىزمەتتەردى ءبىر ورتالىققا شوعىرلاندىرۋ.
مۇندا "وزىنە-ءوزى قىزمەت كورسەتۋ بۇرىشى" جاساقتالىپ, عالامتور جەلىسىمەن قامتىلدى. دەربەس كومپيۋتەردى قولدانۋ ارقىلى ءار تۇرعىن وزىنە قاجەتتى قىزمەتتى الادى. ارنايى كۇتۋ زالى, بالالاردىڭ ويىن الاڭى جاساقتالىپ وتىر, دەدى وبلىس اكىمىنىڭ ورىنباسارى ەرجان ءابىلحانوۆ.
قر سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ مىندەتىن اتقارۋشى قانات قوجاحمەتوۆ بۇل كەڭسەنىڭ ءتيىمدى تۇستارىنا توقتالدى.
"مەملەكەت باسشىسى بيىلعى جولداۋىندا ەكى ارادا ادام ەمەس, قاعازدىڭ جۇگىرۋى قاجەتتىگىن العا تارتتى. اشىقتىق, ادالدىق, پاراساتتىلىق – ادىلدىكتىڭ باستى قاعيدالارى. سول سەبەپتەن, وسىنداي فورماتتاعى "اشىق اكىمدىك" كەڭسەسى سىبايلاس جەمقورلىققا قارسى ساياساتقا سايكەس كەلەدى", دەدى ول.
اتالعان دەپارتامەنت باسشىسىنىڭ ءبىرىنشى ورىنباسارى ايدوس مامىتتىڭ ايتۋىنشا, "اشىق اكىمدىك" كەڭسەسى – تۇرعىندار ءۇشىن قاجەتتى اقپاراتتار بەرەتىن, مەملەكەتتىك قىزمەت كورسەتەتىن الاڭ.
"ماقساتىمىز – مەملەكەتتىك قىزمەتكەر مەن قاراپايىم حالىقتىڭ اراسىندا تىكەلەي ديالوگ ورناتۋ. مۇنى "حالىق ۇنىنە قۇلاق اساتىن مەملەكەت" قۇرۋ كونتسەپتسياسىنىڭ نەگىزگى قاعيداتتارىنىڭ ءبىرى دەۋگە بولادى. تۇرعىندار وسى كەڭسەدەن مەملەكەتتىك قىزمەتتەرگە باعا بەرە الادى" دەدى ايدوس مامىت.