قازاقستان رەسپۋبليكاسى سىرتقى ىستەر مينيسترلىگىنىڭ يۋنەسكو ۇيىمى جانىنداعى تۇراقتى وكىلدىگى ۇلىتاۋ وڭىرىندە جۇمىس ىستەيتىن « ۇلى تاعزىم» قوعامدىق قورىنىڭ مارتەبەلى قۇزىرەتكە يە بولعانىن قۋانا جەتكىزدى, دەپ حابارلايدى Egemen.kz
«پاريجدەگى يۋنەسكو شتاب-پاتەرىندە وتكەن ماتەريالدىق ەمەس مادەني مۇرانى قورعاۋ جونىندەگى كونۆەنتسياعا قاتىسۋشى مەملەكەتتەر باس اسسامبلەياسىنىڭ VIII سەسسياسىنىڭ شەشىمىمەن « ۇلى تاعزىم» قوعامدىق قورى ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتتە كەڭەسشى قىزمەتىن اتقارۋ ءۇشىن راستالعان قۇزىرەتى بار ۇكىمەتتىك ەمەس ۇيىم رەتىندە اككرەديتاتسيادان ءوتتى. قازاقستاندىق ۇيىمدار اراسىندا بۇل ءبىرىنشى جاعداي بولىپ تۇر. قۇتتىقتايمىز!», دەلىنگەن اتالعان وكىلدىكتىڭ حابارلاماسىندا.
ياعني, « ۇلى تاعزىم» قوعامدىق قورى الداعى ۋاقىتتا يۋنەسكو-نىڭ اتالعان ۇكىمەتارالىق كوميتەتىنىڭ ماجىلىستەرىنە قازاقستاننىڭ اتىنان تۇراقتى وكىل رەتىندە قاتىسىپ, تالقىعا تۇسەتىن ماسەلەلەرگە قاتىستى پىكىر ايتۋ قۇقىعىنا يە بولدى.
اتالعان قور 2009 جىلدان بەرى جۇيەلى تۇردە جۇمىس ىستەپ كەلەدى. ۇيىم ۇلىتاۋدىڭ تاريحي, تابيعي جانە رۋحاني باي مۇراسىن ساقتاۋ جانە ولاردى كەڭ اۋقىمدا ناسيحاتتاۋدى ءوزىنىڭ باستى ماقساتى سانايدى. قازىرگى تاڭدا قوعامدىق قور تۇركيا, رەسەي, قىرعىزستان, وزبەكستان, تاجىكستان جانە باسقا دا مەملەكەتتەرمەن ارىپتەستىك تىعىز قارىم-قاتىناس ورناتقان.
وسى ورايدا, « ۇلى تاعزىم» قوعامدىق قورىنىڭ باسشىسى بالعىن سالىقوۆا مەن ۇيىمنىڭ يدەيالىق قولداۋشىسى, « ۇلىتاۋ» ۇلتتىق تاريحي-مادەني جانە تابيعي قورىق-مۇراجايىنىڭ ديرەكتورى باقتيار قوجاحمەتوۆتىڭ ساتىمەن ىسكە اسقان شارۋاعا قوسقان سۇبەلى ۇلەستەرىن ايتا كەتكەن ءجون.
قاراعاندى وبلىسى