بيىل جىلۋ بەرۋ جىلداعىدان 5 كۇن ەرتە باستالماق. بۇل تۋرالى قالا اكىمدىگىنىڭ ءباسپاسوز ورتالىعىندا وتكەن بريفينگتە قالا اكىمىنىڭ ورىنباسارى ەلمۇرات راحماتۋللاەۆ حابارلادى.
"جىلۋ بەرۋ ارنايى قاعيداعا سايكەس بەس تاۋلىك بويى سىرتقى اۋانىڭ ورتاشا تەمپەراتۋراسى +80س جانە ودان تومەن بولعان جاعدايدا باستالۋ قاجەت. وسى كەزگە دەيىن بۇل كەزەڭ تاجىريبە كورسەتكەندەي قازان ايىنىڭ 15-نە تۋرا كەلىپ ءجۇردى. بيىل اۋا تەمپەراتۋراسىنىڭ كۇرت تومەندەپ كەتۋىنە بايلانىستى قالا اكىمىنىڭ 1 قازانداعى شەشىمىنىڭ نەگىزىندە جىلۋ قازان ايىنىڭ 10 كۇنى بەرىلەدى", - دەدى ول.
جىلۋ بەرۋ جۇمىستارىنىڭ جۇرگىزىلۋى جانە كوپقاباتتى تۇرعىن ۇيلەر مەن ينجەنەرلىك جۇيەلەردىڭ ازىرلىگى تۋرالى مالىمدەگەن قالالىق تۇرعىن ءۇي كوممۋنالدىق شارۋاشىلىق جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى ءبولىمىنىڭ باسشىسى ءبىرجان دالاباەۆ بارلىق نىساندار جىلۋ ماۋسىمىنا قوسىلۋعا تولىعىمەن دايىن ەكەنىن جەتكىزدى. بيىلعى ماۋسىمدا وبلىس ورتالىعىنا شامامەن 37800 توننا كومىر قاجەت. قورداعى كومىر قىستان شىعۋعا تولىق جەتەدى.
ءوز كەزەگىندە "قىزىلوردا جىلۋ ەلەكترورتالىعى" مەكەمەسىنىڭ ديرەكتورى ناۋرىز ساتحانوۆ جىلۋ ورتالىقتارىنىڭ دايىندىعى تۋرالى حابارلاما جاساپ, جىلۋ بەرۋ ماۋسىمىنا ازىرلىك جۇمىستارى بەكىتىلىگەن كەستەگە سايكەس جۇرگىزىلىپ, ۋاقىتىلى اياقتالعانىن باياندادى.
ايتا كەتەيىك, وبلىس ورتالىعىندا بارلىعى 815 كوپ قاباتتى تۇرعىن ءۇي بار, ونىڭ 757 ورتالىقتاندىرىلعان جىلۋ جۇيەسىنە قوسىلعان, 58 ءۇي جەكە جىلۋ كوزدەرىنەن جىلىتىلادى.